JABUR 149 - Kitab Sutji

MASMUR 149 Kidung kaunggulan tumrap wong Israel 149:1-9

¹ Haleluya! Padha ngrepekna kekidungan anyar kagem Pangeran Yehuwah! Panjenengane saosana puji ana ing pasamuwane para wong mursid.

² Bangsa Israel cikben bungah-bungah awit saka Gusti Allah, kang nitahake, para anake Sion kareben padha asurak-surak awit saka ratune.

³ Iku kareben padha memuji asmane kalawan jejogedan, sarta kareben padha ngidungake masmur kagem Panjenengane kanthi swaraning terbang lan clempung,

⁴ awitdene Pangeran Yehuwah karenan marang umate, para wong andhap-asor bakal dimakuthani kalawan karahayon.

⁵ Para wong mursid kareben padha sukarena sajroning kamulyan, padha surak-surak ana ing paturone.

⁶ Kidung panggunggung marang Allah kareben ana ing gorokane, sarta tangane kareben padha sikep pedhang kang landhep kiwa-tengen,

⁷ kagawe nandukake piwales marang para bangsa, lan kanggo niksa marang para suku bangsa,

⁸ kanggo mblenggu para ratune kalawan rante, lan para panggedhene kalawan blenggu wesi,

⁹ kanggo matrapi paukuman marang wong-wong iku kaya kang wus katulisan. Iku kamulyane sakehing para kang dikasihi. Haleluya!