JABUR 146 - Kitab Sutji

MASMUR 146 Mung Gusti Allah kang paring pitulungan ora ana liyane 146:1-10

¹ Haleluya! Dhuh nyawaku, saosa puji marang Pangeran Yehuwah!

² Aku bakal ngluhurake Sang Yehuwah sajegku urip, Allahku bakal dakpuji kalawan masmur sajrone aku isih ana.

³ Aja kumandel marang para panggedhe, lan marang anaking manungsa kang ora bisa aweh karahayon.

⁴ Manawa nyawane pecat, banjur bali menyang ing lemah; ing dina iku uga kekarepane sirna.

⁵ Rahayu wong kang ndarbeni Allahe Rama Yakub minangka pamomonge, kang pengarep-arepe marang Sang Yehuwah, Gusti Allahe,

⁶ Panjenengane kang nitahake langit lan bumi, segara lan saisine kabeh, kang tetep setya ing salawase,

⁷ kang njejegake kaadilan tumrap wong kang padha ditindhes, kang paring pangan marang wong kang padha keluwen, Pangeran Yehuwah ngluwari wong kang padha kinunjara.

⁸ Pangeran Yehuwah ngelekake mripate para wong wuta, Pangeran Yehuwah njejegake para wong kang tumungkul, Pangeran Yehuwah ngasihi marang para wong mursid.

⁹ Pangeran Yehuwah ngreksa marang wong ngamanca, bocah lola lan randha padha disantosakake maneh, nanging dalane wong duraka dienggokake.

¹⁰ Pangeran Yehuwah iku jumeneng raja ing salawase, Allahmu, he Sion, turun-tumurun. Haleluya!