JABUR 136 - Kitab Sutji

MASMUR 136 Sih-susetyaning Allah marang bangsa Israel 136:1-26

¹ Padha saosa puji marang Pangeran Yehuwah, sabab Panjenengane iku becik! awit langgeng sih-kadarmane.

² Padha saosa puji marang Allahe para allah, awit langgeng sih-kadarmane.

³ Padha saosa puji marang Gustine para gusti, awit langgeng sih-kadarmane.

⁴ Marang Panjenengane kang nindakake kaelokan gedhe piyambakan, awit langgeng sih-kadarmane.

⁵ Marang Panjenengane kang nitahake langit kalawan kawicaksanan, awit langgeng sih-kadarmane.

⁶ Marang Panjenengane kang njereng bumi kadhasaran banyu, awit langgeng sih-kadarmane.

⁷ Marang Panjenengane kang nitahake barang-barang kang madhangi kang gedhe ing langit, awit langgeng sih-kadarmane.

⁸ Srengenge kang mengku raina, awit langgeng sih-kadarmane.

⁹ Sarta rembulan lan lintang-lintang kang mengku ing wayah bengi, awit langgeng sih-kadarmane.

¹⁰ Kang mejahi para pembarepe wong Mesir, awit langgeng sih-kadarmane.

¹¹ Lan ngirid Israel metu saka ing satengahe, awit langgeng sih-kadarmane.

¹² Sarana asta kang rosa lan kalawan ngayatake lengene, awit langgeng sih-kadarmane.

¹³ Segara Teberau dipiyak dadi loro, awit langgeng sih-kadarmane.

¹⁴ Lan nyabrangake Israel metu ing tengahe, awit langgeng sih-kadarmane.

¹⁵ Sang Pringon sawadya-balane dikelemake ana ing segara Teberau, awit langgeng sih-kadarmane.

¹⁶ Gusti Allah kang ngirid lakune umate metu ing segara wedhi, awit langgeng sih-kadarmane.

¹⁷ Kang ngasorake perange raja gedhe-gedhe, awit langgeng sih-kadarmane.

¹⁸ Para ratu kang mulya padha dipateni, awit langgeng sih-kadarmane.

¹⁹ Sihon, ratune bangsa Amori, awit langgeng sih-kadarmane.

²⁰ Lan Og, ratu ing Basyan, awit langgeng sih-kadarmane.

²¹ Tanahe banjur diparingake dadi pusakane, awit langgeng sih-kadarmane.

²² Dadi pusakane Israel, abdine, awit langgeng sih-kadarmane.

²³ Gusti Allah kang ngengeti kita sajroning kaasoran, awit langgeng sih-kadarmane.

²⁴ Padha diluwari saka ing tangane mungsuh kita, awit langgeng sih-kadarmane.

²⁵ Apadene paring pangan marang sakehing makhluk, awit langgeng sih-kadarmane.

²⁶ Padha saosa puji sokur marang Gusti Allahing swarga, awit langgeng sih-kadarmane.