JABUR 121 - Kitab Sutji

MASMUR 121 Pangeran Yehuwah, kang rumeksa bangsa Israel 121:1-8

¹ Kidung jiyarah. Mripatku tumenga marang gunung-gunung; pitulunganku iku pinangkane saka ing ngendi?

² Pitulunganku iku pinangkane saka Sang Yehuwah, kang nitahake langit lan bumi.

³ Panjenengane ora bakal marengake yen sikilku gloyoran, kang ngreksa kowe ora bakal ngantuk.

⁴ Sayektine kang ngreksa Israel ora ngantuk lan ora sare.

⁵ Pangeran Yehuwah iku kang ngreksa kowe, Pangeran Yehuwah iku pangayomanmu ana ing tengenmu.

⁶ Srengenge ora bakal nglarani kowe ing wayah awan, utawa rembulan ing wayah bengi.

⁷ Kowe bakal direksa dening Sang Yehuwah, tumrap ing sakehing bilai; nyawamu direksa.

⁸ Pangeran Yehuwah bakal ngreksa marang lebu lan wetumu, wiwit ing samengko tumeka ing delahan.