JABUR 114 - Kitab Sutji

MASMUR 114 Lelakon kang elok, nalika Israel metu saka ing tanah Mesir 114:1-18

¹ Nalika Israel budhal saka ing tanah Mesir, nalika turune Yakub metu saka ing tengahe bangsa kang seje basane,

² nuli Yahuda dadi papan pasucene, Israel dadi wewengkoning pangwaose.

³ Segara weruh banjur lumayu, bengawan Yarden bali mandhuwur,

⁴ gunung-gunung padha mencolot-mencolot kaya wedhus lanang, tengger-tengger padha lincak-lincak kaya cempe.

⁵ He segara, kena ngapa dene kowe kok lumayu? He bengawan Yarden, dene kowe bali mandhuwur,

⁶ he gunung-gunung, dene kowe padha cecolotan kaya wedhus lanang? He tengger-tengger, dene kowe padha lincak-lincak kaya cempe?

⁷ Gumetera he bumi, ana ing ngarsane Pangeran, ana ing ngarsane Gusti Allahe Rama Yakub,

⁸ kang ngowahi parang dadi blumbang, tuwin watu kang atos dadi sendhang.