JABUR 112 - Kitab Sutji

MASMUR 112 Rahayu wong kang bener 112:1-10

¹ Haleluya! Rahayu wong kang ngabekti marang Pangeran Yehuwah, kang banget kasengsem marang sakehing pepakone,

² anak-putune bakal santosa ana ing bumi, turune wong bener bakal diberkahi,

³ omahe kanggonan bandha lan kasugihan, sarta kautamane iku tetep ing salawas-lawase.

⁴ Ing sajroning peteng wong kang bener kaplethekan pepadhang, tresna welasan lan adil.

⁵ Begja wong kang kadunungan welas lan nyenyilihake, kang ngrampungake urusane kanthi samesthine,

⁶ sabab ora bakal gonjing ing salawase, wong kang mursid iku bakal pinengetan ing salawase,

⁷ ora wedi marang kabar kang ala, atine teteg, kumandel banget marang Pangeran Yehuwah,

⁸ atine santosa, ora kadunungan wedi, temah nganggep remeh marang para satrune.

⁹ Blaba pawewehe, adedana marang wong miskin, kamursidane tetep ing salawas-lawase, sungune bakal saya dhuwur ing sajroning kamulyan.

¹⁰ Wong duraka padha ndeleng, banjur lara atine, nggeget untu banjur luluh; pepenginane wong duraka iku tumuju marang ing karusakan.