JABUR 111 - Kitab Sutji

MASMUR 111 Kasaenane Gusti Allah 111:1-10

¹ Haleluya! Pangeran Yehuwah arep dakcaosi pamuji sokur kalawan gumolonging atiku, ana ing pakumpulane para wong mursid lan ana ing pasamuwan.

² Pakaryane Sang Yehuwah iku agung, patut dititi-priksa dening sakehing wong kang kasengsem.

³ Pakaryane iku agung lan mulya, tuwin kaadilane tetep ing salawas-lawase.

⁴ Kaelokane wus didadekake pangeling-eling; Pangeran Yehuwah iku sih-mirma sarta welasan.

⁵ Para wong kang ngabekti marang Panjenengane iku padha diparingi pangan, prajanjiane diengeti ing salawase.

⁶ Daya-kekiyataning pakaryane wus ditedahake marang umate, padha diparingi tanah pusakane para bangsa.

⁷ Pakaryaning astane iku kabeneran lan kaadilan, sakehing prentahe iku padha kena diugemi,

⁸ salawas-lawase lan ing sateruse kukuh, katindakake kalawan bener lan jujur.

⁹ Umate pinaringan pangentasan, Gusti Allah dhawuh supaya prajanjiane iku kanggo ing salawas-lawase, asmane iku suci sarta nggegirisi.

¹⁰ Pangabekti marang Pangeran Yehuwah iku wiwitaning kawicaksanan, sarupaning wong kang nglakoni iku padha duwe budi padhang. Pangalembana marang Gusti Allah iku langgeng ing salawase.