JABUR 11 - Kitab Sutji

MASMUR 11 Sang Yehuwah iku jumeneng dadi pangayoman 11:1-7

¹ Kanggo lurah pasindhen. Anggitane Prabu Dawud. Aku ngayom marang Sang Yehuwah, kepriye dene kowe padha wani kandha marang aku: “Mabura menyang gunung kaya manuk!”

² Awit delengen, wong duraka padha menthang gandhewa, panahe dietrapake ing sendheng, sumedya dilepasake marang wong kang burus atine ana ing panggonan kang peteng.

³ Samangsa tetalese padha dibubrahi, wong mursid iku bisa nindakake apa?

⁴ Sang Yehuwah ana ing padalemane kang suci; Sang Yehuwah dhampare ana ing swarga; tingale maspadakake, kedheping tingale niti-priksa anaking manungsa.

⁵ Sang Yehuwah ndadar wong mursid lan wong duraka, lan gething marang wong duraka, kang seneng tumindak keras.

⁶ Wong duraka padha diudani areng mengangah lan welirang; angin kang nggesengake ngebaki tuwunge.

⁷ Amarga Sang Yehuwah iku adil; remen marang kaadilan: wong kang burus atine bakal nyawang wedanane.