AYUB 39 - Kitab Sutji

¹ Apa sira bisa nggolekake memangsaning singa wadon, lan bisa maremake marang singa enom,

² manawa padha mendhek-mendhek ana ing guwane manawa padha ndingkik ana ing grumbulan?

³ Sapa kang nyawisake pakaning gagak, manawa anake padha sesambat marang Gusti Allah, padha klambarangan marga ora ana pangan?

⁴ Sira apa sumurup wancine wedhus gunung duwe anak, utawa apa namatake menjangan anggone nglarani?

⁵ Apa sira bisa ngetung pirang sasi anggone meteng sarta apa bisa nyumurupi ing eleke?

⁶ Anggone nglairake anake, kalawan njengking lan banjur ngetokake isining guwa-garbane.

⁷ Anake padha dadi rosa lan gedhe ana ing ara-ara, padha lunga lan ora bali marang embokne.

⁸ Sapa kang ngumbar kuldi alasan, utawa sapa kang nguculi dhadhunge kuldi ing ara-ara?

⁹ Ara-ara kang Sunparingake dadi papan padunungane lan tanah asin dadi pasabane.

¹⁰ Ramening kutha dipoyoki, ora krungu swarane kang nggiring;

¹¹ banjur golek pangonan ing gunung-gunung, lan ngluru samubarang kang ijo.

¹² Apa bantheng gelem teluk marang sira utawa gelem turu ing sacedhaking ambenira manawa bengi?

¹³ Apa sira bisa meksa bantheng ngenut kalenaning wluku kalawan keluhan, utawa nggaru bumi ing lebak ngetutake lakunira?

¹⁴ Apa sira pracaya, marga gedhe karosane? Utawa banjur sira pasrahi pagaweanira kang abot?

¹⁵ Apa sira nemtokake, yen bakal ngulihake pametuning buminira, lan nglumpukake ing papan panutonira?

¹⁶ Manuk unta kekablak kalawan bungah nanging apa elar lan wulu iku mratelakake katresnan?

¹⁷ Awit endhoge ditinggal ing lemah, lan dietogake sarta diangremake ana ing pawedhen,

¹⁸ nanging lali, manawa endhog mau bisa kapidak ing sikil, lan kailes-iles ing kewan alasan.

¹⁹ Pangrengkuhe marang anak-anake keras kaya-kaya dudu anake dhewe; sanajan rekasane tanpa guna, ora dipreduli,

²⁰ amarga ora kaparingan kawicaksanan dening Gusti Allah lan ora dipandumi pangreten.

²¹ Manawa kekablak kalawan gumunggung. banjur nggeguyu jaran lan kang nunggangi.

²² Apa sira kang aweh karosan marang jaran? Apa sira kang nyandhangi suri ing githoke?

²³ Apa sira kang mbisakake mlumpat kaya walang? Panggabere kang nggegirisi medeni.

²⁴ Anggone thakur-thakur ing lemah kalawan gambira, anggone maju methukake gegaman kalawan kakuwatan.

²⁵ Sabarang kang nggegirisi digeguyu, sarta ora tau wedi apadene ora gelem mundur manawa arep-arepan karo pedhang.

²⁶ Endhong panah kamrincing ing sadhuwure, tumbak lan towok pating cleret.

²⁷ Kalawan ringas lan galak lemah dikemah-kemah, sarta banget notole manawa krungu unining kalasangka;

²⁸ ngerik-ngerik manawa kalasangka kaunekake; lan saka ing kadohan wus bisa ngambus anane perang, bantering abane para panggedhe tuwin suraking wadya-bala.

²⁹ Apa kapinteranira kang mulang mabur manuk wulung kalawan ngegarake swiwine ngener mangidul?

³⁰ Apa marga saka prentahira manuk beri iku anggone banjur mumbul lan nusuh ing panggonan kang dhuwur?

³¹ Anggone manggon lan nusuh ana ing gunung parang, ing pucaking gunung parang lan ing gunung kang angel ingunggahan.

³² Ana ing kono anggone ingak-inguk madik-madik memangsane, matane ngingat-ngingatake saka ing kadohan;

³³ anake padha ngokop getih lan ing ngendi ana bathang, manuk beri mesthi ana ing kono.”

Ayub ngesorake awake ana ing ngarsaning Allah 39:34-38

³⁴ Sang Yehuwah tumuli nyambeti, pangandikane marang Ayub:

³⁵ “Si juru panutuh apa isih arep mabeni marang Kang Mahakwasa? Kang nacad marang Gusti Allah iku supaya mangsulana!”

³⁶ Ing kono unjuke Ayub marang Sang Yehuwah:

³⁷ “Saestu, kawula punika asor sanget, kawula badhe ngaturaken wangsulan punapa dhateng Paduka? Cangkem kawula kawula tutupi kalayan tangan.

³⁸ Sapisan kawula sampun gadhah pangucap, nanging badhe boten kawula lairaken malih; malah kaping kalih, nanging boten badhe kawula lajengaken.”