AYUB 38 - Kitab Sutji

BAB 38-42 PARING WANGSULANE GUSTI ALLAH MARANG AYUB Pangwasaning Pangeran ing sajroning alam jembar 38:1–39:33

¹ Pangeran Yehuwah banjur paring wangsulan marang Ayub saka ing sajroning prahara, pangandikane:

² “Sapa ta kang gawe petenging pepesthen kalawan pangucap kang tanpa pamikir?

³ Mara rumantia dikaya wong lanang! Sira Sundangu, Ingsun unjukana pratela.

⁴ Sira ana ngendi, nalika Ingsun nalesi bumi. Munjuka manawa sira mangreti!

⁵ Sapa kang nemtokake ukurane – Sira rak sumurup? – Tuwin sapa kang menthang tali ukurane?

⁶ Pilar-pilare tumancep ing ngendi lan sapa kang masang watu pojokan,

⁷ ing nalikane lintang-lintang esuk padha asuka-rena bebarengan tuwin para putraning Allah padha asurak-surak?

⁸ Sapa kang mbendung sagara kalawan plawangan nalika lagi kumrasak metu saka ing guwa-garba,

⁹ nalika Sunkaryakake mega minangka sandhangane tuwin pepeteng minangka gegedhonge;

¹⁰ nalika Ingsun nemtokake watese, sarta masang slarak lan lawang;

¹¹ nalika Ingsun ngandika: Tekan ing kene bae, aja kliwat, ana ing kene alunira kang gumunggung bakal padha katambak!

¹² Ing sajroning uripira apa sira tau ngundang marang gagat-raina lan mrenahake bangbang wetan,

¹³ supaya padha nyekel poncoting bumi sarta ngebutake wong duraka?

¹⁴ Bumi mau banjur salin rupa dadi lempung kang diecap, samubarang kabeh awujud kaya busana.

¹⁵ Para wong duraka padha kailangan pepadhange, tangan kang kaacungake katugel.

¹⁶ Apa sira wus bisa tumurun nganti tekan ing etuking sagara lan wus ndlajahi dhasaring samodra-raya?

¹⁷ Apa gapuraning pati wus padha katon marang sira sarta apa sira wus ndeleng lawanging teleng palimengan?

¹⁸ Apa sira mangreti jembaring bumi? Caritakna, manawa sira wus nyumurupi iku kabeh!

¹⁹ Ana ing ngendi dalan kang anjog ing papan padununganing pepadhang, lan ana ing ngendi prenahe pepeteng,

²⁰ supaya sira banjur bisa mrenahake ana ing wewengkone dhewe-dhewe lan nyumurupi dalan-dalan kang anjog ing padunungane?

²¹ Mesthine sira wus sumurup, amarga nalika samana sira wus lair, lan wus akeh cacahing dinanira!

²² Apa sira wus lumebu ing gedhong parawatane salju, sarta apa wus ndeleng parawatane udan krikil,

²³ kang Ingsun simpen kanggo ing dina karubedan, kanggo ing mangsa pacampuhan lan perang?

²⁴ Ana ing ngendi dalane menyang ing papan sumebaring pepadhang, lan papan pencaring angin ing salumahing bumi?

²⁵ Sapa kang karya ilen-ilening udan deres lan dalan kanggo kilating gludhug,

²⁶ supaya tanah kang ora dienggoni ing wong lan ara-ara kang suwung padha kodanan;

²⁷ sarta supaya pasamunan lan tanah kang ludhes padha kawaregan apadene suket-suket padha thukul seger?

²⁸ Apa udan iku ana bapakne? Sarta sapa kang nganakake tetesing ebun?

²⁹ Es iku metu saka ing guwa-garbane sapa, lan ebun kang njendhel ing langit iku sapa kang nglairake?

³⁰ Banyu njendhel nganti kaya watu, lan lumahing samodra dadi atos.

³¹ Apa sira bisa mbundheli talining lintang Wuluh, lan nguculi bebandaning lintang Wluku?

³² Apa sira bisa ngetokake lintang Bima Suci ing kala mangsane, lan nuntun lakune lintang Prau saanak-anake?

³³ Apa sira nyumurupi pranataning langit sarta netepake anggone mrentah ana ing bumi?

³⁴ Apa sira bisa ngulukake swaranira nganti tekan ing mega, temah sira banjur kebanjiran?

³⁵ Apa sira bisa nglepasake kilat, temah padha samber-samberan kalawan calathu marang sira: Sandika?

³⁶ Sapa kang ndunungake kawicaksanan ana ing mega utawa sapa kang paring budi marang mendhung?

³⁷ Sapa bisa ngetung mendhung kalawan kawicaksanan, lan sapa kang bisa nyuntak ejuning langit,

³⁸ nalika lebu njendhel dadi logam tuwin prongkalan lemah padha lelengketan dadi siji?