Yowaho daidi 3 - Deoso-ka Yama Hani

Deoso bidi ai tohawaha

¹ Deoso ai‑ya nofi nafi, dai awaho, ai‑ya bidine. Deoso‑ya mai dami watora ene oda‑ya mai watorani.

² Hibayata Deoso bidi ai toha, ai abano‑bone‑nima ai abano tohasa ra. Makobote Yeso kame, Yeso ai awiya, Yeso abano‑nima ai abano nawahaboneni.

³ Yeso‑nima ai nabone ai atibodi ati na, ai ene ai namosateni, Yeso ene amose‑nima ai ene amosabonehe.

⁴ Mai ihi amosara, Deoso ati‑nima mai ni awirani.

⁵ Hibati‑ya Yeso kame, ai ene amosara, ai manakone‑ya nanahabemarine. Yeso ene amose hinama amane.

⁶ Mai ihi amosanadira, Yeso‑ka mai tohara. Yeso‑ya mai awara, Yeso‑ya mai watoterani.

⁷ Oka dai toha, owati dai mitahi. Oka dao dai toha, dai‑ya keyehe‑ya mai hirikariyahi. Dai ene amosa, Yeso‑ka dai tohani. Yeso ene amose, Yeso ene‑nima mai ihi na, Yeso‑ka mai tohateni.

⁸ Mai ihi amosara, Satanasi‑ka mai toha, Satanasi ene amosaremata, ene amosanasa rene. Deoso Bidi i‑di Yeso kamemarine, Satanasi ene‑ya nanahabebonaha.

⁹ Deoso bidi ai toha, ai ene towe hinama tohateraboneni. Ai‑ka abi ene‑nima ai ene nabone, Deoso bidi ai toha, ai ene amosawamaboneni.

¹⁰ Mai ihi ai awiya, mai‑ka abi oni ai watoteni. Mai ihi amosara, mai one‑ya mai nofarihi na, Deoso bidi mai tohara, Satanasi bidi mai tohani.

Ai ibi nofahi

¹¹ Yeso tamine dai miti baha, oda ati dai mita, “Dai ibi nofahi.” Oda ati namaro, fara dai ibi nofahi.

¹² I‑di Kaina‑nima ai riyahi. I‑di Kaina sori‑ya nanahabematane. I‑di Kaina Satanasi‑ya abi ne, badi ene‑nima ene ne. Hini yamata‑nima ne sori‑ya nanahabamatati? Sori ene amosabise i‑di Kaina‑ta ene amosare, yawe, sori‑ya nanahabematane.

¹³ Dai‑ya Satanasi‑ka mai kaka, dai korikasariyahi.

¹⁴ Ai ibi nofa, ai abarabone ai wato, mai one‑ya mai nofara, mai ababoneni.

¹⁵ Mai‑ka mai‑ya mai ka‑kako, mai‑ya mai ihi ide‑nima mai ihi teni. Mai‑ya mai nanahaba, Deoso tabaro‑ya mai winateraboneni.

¹⁶ Deoso ai‑ya nofa, Yeso ai‑ya nofa ne, ai manakone‑ya nanahabemarine. Yeso ene ai awa, ai‑ya nofe‑ya ai watowahineni. Yeso ene‑nima ai ene na, ai‑ka mai ihi ai aba, ai sibaraboneni.

¹⁷ Tika yamata dama toha, ai one‑ka yamata awira, hika yamata‑ba daatiyahi. Yamata daatira‑mani, tiwa‑ya Deoso nofe‑ya mai awaraboneni.

¹⁸ Owati dai mitahi. Mai‑ya ai ati nofa, Hiniya mai‑ya ai ati nofariyahi. Mai ai nofi yokana toha, mai ai kasomahi.

¹⁹ Mai ai nofa, mai ai kasoma, Deoso‑ka ai toha ai watoneni. Deoso‑ya ai awamakiya, ai habo siitoni awiraboneni.

²⁰ Ai atibodi ai‑ya weenaba awineni. Ai atibodi ai‑ya weena, Deoso yama nafi‑ya wato, Deoso ai‑ya weeni awireya, ai sibaraboneni.

²¹ Ai atibodi ai‑ya weera, Deoso ai hiyara, ai habo siitoni awiraboneni.

²² Deoso‑ya ai hiyara, ai ati‑ya mitatene. Deoso ati ai tokadaba, yama hinofa‑nima yama na ai haana, yama‑ya daatene.

²³ Deoso ati dai mitahi. “Oka dao i‑di Yeso Kirisito ati dai nofiya, owati‑maro‑nima dai ibi nofahi.” Deoso ati nemarine.

²⁴ Deoso ati ai nofa, ati ai tokadaba, Deoso‑ka Doni ai‑ya sawitene. Deoso‑ka ai toha, ai‑ya sawi ai watotene.