Yowaho daidi 1 - Deoso-ka Yama Hani

Yeso awire‑ya, ai aba neni

¹ Hibati‑ya yama nafi Deoso wamahinamete awisari‑ya Yeso winemata kaki, ati oda mita, abano oda awa, oda boyonemarine. Yeso ai‑bone‑ya wamanemata tamine okanahanaboneni. Yeso awire‑mana, ai awira neni.

² Hibati‑ya ai‑bone‑ya wamane, neme‑ya Deoso eyehe winemata, ai tabaro‑ya kaki, oda awemari tamine okanahanoneni. Yeso ene ai atibodi abateraboneni.

³ Yama oda awa, ati oda mitanamaro tamine okanahano, oda wata dai watohareboneni. Ai‑ka Abi i‑di Deoso, Bidi i‑di Yeso Kirisito‑ya fame, ai‑ya mai nofa, mai ai nofa, ai ibi hiyari nofateni.

⁴ Owati dai kadikiya, owati dai tokadabiya, ai ya‑yainaboneni.

⁵ Yeso ati‑mari dai mitahi. “Deoso‑ya yama tehe hinama toha, ene amose hinama toha, yama sokirihi, ene towe toharihi, tene.” Yeso ati nemarine.

⁶ “Deoso‑ka ama·oni.” Ai owa ati ne, ene amosanadire, keyehe‑ya hirine, Deoso‑ka tohare, yama soki‑ya winasa nane.

⁷ Yama tehe‑ya Deoso wini‑nima yama tehe‑ya ai wina, ai ibi hiyari nofateni. Ai ene amosara ai atibodi bisa toha, Deoso Bidi i‑di Yeso ai atibodi‑ya sokotene, ai atibodi besene fawanabonehe.

⁸ “Owa ene amosa hinama amani.” Mai ati na, keyehe‑ya mai hiriteni. Ai ene amosa hinama tohaterani.

⁹ Ai ene amosara, Deoso‑ya ai hiyara kanibote nahi. “Abi Deoso, owa ene amosara, owa‑ya tiwati somawamahi.” Ai ati nahi. Ai ene amosara tamine Deoso‑ya ai hiyara, Deoso ati somawame, ai ene amosara‑ya kadikamaterebonane.

¹⁰ “Mai ihi amosa hinama mai tohaterani.” Deoso ati nematane. “Deoso owa‑ya watore, owa ene amosa hinama tohani.” Mai ati na, Keyehe‑ya mai hirina, Deoso ati‑ya mai nofaterani.