Roka 20 - Deoso-ka Yama Hani

Hini yamata ihi mai kanatiniti? Mai ati na

¹ Deoso‑ka yobe‑ya Yeso mai‑ya kanawato, Deoso ati amosabote tamine‑ya Yeso hiyareya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha, mai na, mai kamake, Yeso‑ya mai weenabone, Yeso‑ya mai hiyara,

² “Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati nameteni.

³ “Dai ati omiti bahaboneni.

⁴ Yowaho Batita mai dama mai‑ya habanirise, ebeni‑ke ati ene tohati? Deoso ene toha, ai owa ene toha ne awane, hini yamata‑nima dai ati niti?” Yeso ati nematane.

⁵ Mai ibi hiyara, “‘Deoso ati ene amane.’ Ai ati niya, ‘Hini yamata ihi Yowaho Batita ati dai nofariti?’ Yeso ati nebonane.

⁶ ‘Ai owa ati ene amane.’ Ai ati niya, yati‑ya ai‑ya mai nanahababa awini. Yowaho Batita Deoso ati‑ya mai mi‑mita mai‑ka owa amane, mai dama mai ati na.” Mai ibi hiyara, mai ati nameteni.

⁷ Yeso‑ya mai hiyaramatasa, “Yowaho Batita tamine oda wato awirini.” Mai ati nameteni.

⁸ “Dai ati yanara, owati yananahariraboneni.” Yeso ati nematane.

Ofa‑ya mai na‑nawada

⁹ Yeso mai‑ya kanawatobona mai‑ya hiyare, “Ofa‑ya maki kame, yama yaki‑ya tokebona, wininama kanibote ni awirebona atibodi ati ne, mai one‑ya yose, ‘Oka awa bono dai nawadahi. Ofa hadiya, one dai kayafa, one okayaha onaboneni.’ Ofa hidi ati ne, ‘Hehe, sibarini.’ Mai ati namaroni. Fa‑fai‑ya yama yaki‑ya hidi tokawahemarine.

¹⁰ Ofa hadiya, ofa hidi‑ka yo‑yose owa‑ya yose, ‘Owa tabaro one‑ya tikamahi. Ofa one‑ya tiwa‑ya mai daaniya, ofa tiwakamiyahi.’ Hidi ati nene. Hika yo‑yose tokome, mai‑ya haane, ofa‑ya mai daara, hiniya mai bisihine, honita kamene.

¹¹ Hika yo‑yose owa‑ya yosemakitase, ofa‑ya mai daarani. Hika yo‑yose‑ya mai wee, mai bisihine, honita kamatasene.

¹² Makobote hika yo‑yose owa‑ya yosemakine, awa bono‑ya tonakebonaha. Kobone, mai bisihine, awa widi‑ya mai korohiwitine.

¹³ ‘Hini yamata‑nima obati? Oka dao oyosebisaboneni. Oka dao onofi nafi. Oka dao ati‑ya mai nofabisaba awineni.’ Ofa hidi atibodi ati nene.

¹⁴ Ofa hidi bidi kobone‑ya mai awa, mai ibi hiyara, ‘Bidi ai nanahabaho. Ai nanahabeya, badi abamakiya, mai‑ka yama nafi ai kayafawahaboneni.’ Mai ati nani, mai ibi hiyararo.

¹⁵ Bidi mai hinahabe, awa beheri‑kaya abo mai korohiwitine. Bidi abe tamine‑ya badi mite, hini yamata‑nima ene nabati?

¹⁶ Kamakiya, hika ofa‑ya mai na‑nawada‑maro mai‑ya nanahabeya, ai one‑ya awa‑ya hidi daanawahebonane, mai hinawadawahabonehe.” Yeso ati nematane. “Ka! Haa‑nima yama riyahi.” Mai ati nameteni.

¹⁷ Yeso mai‑ya kakatome, “Yama‑ya dai watora, Deoso‑ka yama hani ati dai mitahi. ‘Yobe‑ya mai wa‑wama awa mai werehiwite, yobe tati mese ewene tohawahemarine.’ Deoso‑ka yama hani ati nineni.

¹⁸ Yobe tati mese‑bona home‑ya ai sonariya, ai bakatonaboneni. Yobe tati mese ewene soneya, ai‑ya koboneya, ai abi ohareboneni.” Yeso ati nematane.

¹⁹ Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, mai yawa, “Ofa‑ya mai na‑nawada mai tamine‑ya Yeso hiyare, fara oda tamine amani. Yeso ati kasirone.” Mai atibodi ati nameteni. Yeso‑ya mai watabone mai ati na, mai dama mai‑ya mai nayofina, mai maanamameteni.

“Yeso ati tosawariba awane.” Mai atibodi ati na

²⁰ Yeso‑ya mai kakatoma, “Ai‑ka yo‑yose Yeso‑ya mai hiyariya, ai‑ka yo‑yose mai‑ya Yeso watoreya, mai ati ihi Yeso ati tosawariba awane. Ati towe ai miteya, kofeno‑ya ai daanebonane.” Mai atibodi ati nameteni. Mai‑ka mai‑ya mai yosemeteni, Yeso‑ya mai hiyarabonehe. Owa kobone, ati yanane,

²¹ “Ayo, keyehe‑ya hirititerani. Mai nafi tinofa, mai one tinofi bi‑bidi tini awirani. Deoso ati tikamine amose hinama tohe, fare ene tiwati oda mitaboneni.

²² Ai‑ka yinero‑ya Sesa haaneya, yinero ai daanibaraniha?” Mai ati nameteni.

²³ Mai atibodi ati‑ya Yeso wato, ati yanane,

²⁴ “Yara‑ka yinero ohari dai namoho. Ebeni‑ke korimari toha, oni tohanati?” Yeso ati nematane. “Sesa korimari, Sesa oni ne, yinero bako‑ya waanane.” Mai ati nameteni.

²⁵ “Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nematane.

²⁶ Mai dama mai noki‑ya Yeso ati tosawariba awane mai ati namaro, Yeso ati‑ya mai mita, “Ka! Yeso yama‑ya watone.” Mai atibodi ati na, mai ati fawanawahameteni.

²⁷ Sadoseo mai one kamakitasameteni, Yeso ati‑ya mai mitabonehe. “Ai aba ai kitamaterani.” Sadoseo mai ati teni.

²⁸ Fara mai kobona, Yeso‑ya mai hiyara, “Ayo, tiwati oda mitaboneni. Hibati‑ya i‑di Mose yama hikanahanamete tamine timitahi, ‘Ayo abeya, fadi hasina, bidi, bide, mai na, mai wadara, anidi fadi‑ya famawahiyaho. Bidi wadeya, anidi oni‑ya bidi weyenayaho.’ Mose‑ka yama hani ati nineni.

²⁹ Ai owa‑ka soho mai 6 kana fane, kahiware, abemarine.

³⁰ Fadi‑ya sohori famawahe, kahiwamakitasare, abamakitasemarine.

³¹ Fara hinama mai toha, mai fana, mai kahiwara, mai nafi abamaroni.

³² Mai nafi aba, mai‑ka yibote abamakemaroni.

³³ Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati nameteni.

³⁴ Yeso mai‑ya hiyare, “Bofe‑ka mai fanateni.

³⁵ Deoso ai nafi‑ka hidi kitabote tohawahebona‑ya mai sawiya, mai fanaterani.

³⁶ Deoso‑ka yo‑yose mai‑nima mai nawahabone, mai abamateraboneni. Mai aba, mai kitama, mai abamateraboneni. Deoso bidi mai tohawahaboneni.

³⁷ Ai aba, ai kitamaterabone dai ati na, Mose‑ka yama hani ati dai mitahi. Awa hirini‑ya i‑di Mose‑ya Deoso hiyare, ‘I‑di Abaraho, i‑di Isaki, i‑di Yako, mai na, mai‑ka Deoso ama·oni.’ Deoso ati nematamonane.

³⁸ Hibati‑ya mai abamete, mai wadamara mai‑ka Deoso tohaterene. Mai korimari hasinibisa, fara mai‑ka Deoso amane. Ai hasina ai toha, mai abamete mai toha, ai na, Deoso ai‑ya awatene.” Yeso ati nematane.

³⁹ Mose‑ka yama hani ati‑ya mai ka‑kamina Yeso ati‑ya mai mita, “Ayo, tiwati amosineni.” Mai ati nameteni.

⁴⁰ Yeso yama‑ya wato, Yeso‑ya mai nayofina, mai ati fawanawahameteni.

Deoso‑ka Ka‑kadika i‑di Dafi‑ka hidi amane

⁴¹ Yeso mai‑ya hiyare, “‘Deoso‑ka Ka‑kadika Dafi‑ka nodi amane.’ Mai ati teni.

⁴² Hibati‑ya Deoso‑ka Ka‑kadika tamine‑ya i‑di Dafi kanahanomatamonane, Deoso‑ka wayoma hani‑ya. ‘Oka hidi webote‑ya Deoso hiyare, —Owa mano kanika‑ya tiwitarihi.

⁴³ Owati ihi tiwa‑ya mai ka‑kako mai‑ka hidi tihawahaboneni.—’ Yama hani ati neni.

⁴⁴ Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare i‑di Dafi‑ka nodi tohe, i‑di Dafi‑ka hidi webote tohahari ne.” Yeso ati nematane.

⁴⁵ Yeso hika mai da‑daba mai‑ya hiyare, ati mai dama mai himite,

⁴⁶ “Dai noko wadahi. Mose‑ka yama hani ati‑ya mai ka‑kamina dai‑ya mai nokotoniteni, mai dai kahiyarabonehe. Fara yama ai ka‑kanika‑ke yobe‑ya mai naha, bora yaba‑ya mai sakona; Deoso‑ya mai hi‑hiyara‑ke yobe‑ya mai sawe, kadera amosa‑ya mai nahore; dai yorotokana, dai tafabone, mai sawe, kadera amosabisa‑ya mai nahore,

⁴⁷ Deoso‑ya mai hiyara, mai hiyari yaboteni, mai dai kahiyarabonehe. Mai fanawi‑ka yibote mai aba mai‑ka yama‑ya mai kayafateni. Mai ihi towe mai manakone fotaboneni.” Yeso ati nematane.