Mateo 13 - Deoso-ka Yama Hani

Yamata noki tamine‑ya hiyare

¹ Mahi itamise‑ya Yeso toke, Karireya‑ka Wara Webote widi‑ya itabasemarine.

² Mai dama mai yorotokanamaroni, Yeso ati‑ya mai mitabonehe. Mai dama mai ihi kanawa‑ya Yeso foye, itari, faha widi‑ya mai dama mai nahobasamaroni.

³ Deoso tamine‑ya mai‑ya Yeso kanawatobona, mai‑ya hiyare, “Ai owa yamata noki‑ya werene,

⁴ hawi fowari‑ya noki one sona, bani bidi mai hikabani.

⁵ Yamata noki one yati dama iti‑kaya sona, yati mese‑ya wami si‑sifina fore ihi noki yana kanibote na,

⁶ yati ihi habi tokara, mahi hewene ene wayatokana, fahi wadamara, abani.

⁷ Atiwa mete‑ya yamata noki one sona, atiwa ene yamata yani amosarani.

⁸ Bodo‑ya yamata noki one sona, yana, ade ohare‑ya boni 100 toha, ade one‑ya boni 60 toha, ade one‑ya boni 30 toha nani.

⁹ Owati dai mita, owati dai tokadabahi.” Yeso ati nemarine.

¹⁰ “Mai‑ya tihiyara, hini yamata‑bone hiyara bara‑ya mai‑ya tihiyariti?” Yeso‑ya oda da‑daba oda ati namaroni.

¹¹ “Neme‑ke ai nafi‑ka hidi kitabote tohawahebona tamine dai watobisaboneni. Mai hiwatorebonane.

¹² Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Yama nafi‑ya mai watowahaboneni. Deoso ati‑ya mai mita, ati mai hinofareya, yama‑ya mai watoteraboneni.

¹³ Hiyara bara ohiyarateni, yama‑ya mai watorabonehe. Owa ene‑ya mai awa, owa‑ya mai watora, owati‑ya mai mita, mai narabi hawira, owati‑ya mai watorani.

¹⁴ Hibati‑ya mai tamine‑ya Deoso hiyare, ati‑ya i‑di Isa·iya kanahanomatane. ‘Owati‑ya mai mita, owa ene‑ya mai awa na, mai narabi hawira, yama‑ya mai watoraboneni.

¹⁵ Owati miti‑ya mai nofara, mai narabi‑ya mai barikana‑nima mai na mai toha, mai noki barikana‑nima mai na mai toha, mai naboneni, oka yama‑ya mai watorabonehe. Mai narabi hawe‑mani, owa ene‑ya mai awa, yama‑ya mai watoya, mai ihi‑maro‑nima mai ihi namariya, mai okasoma neni.’ Deoso ati nemata, ati‑ya i‑di Isa·iya kanahanomatane.

¹⁶ Dai ya‑yainahi, dai noko wada, dai narabo hawi, dai nibisateni.

¹⁷ Owati amosa dai mitahi. Hibati‑ya Deoso ati‑ya mai mi‑mita‑mete mai toha, Deoso ati‑ya mai no‑nofa‑mete mai toha, mai na, owa‑ya mai awabone mai ati namete, owa‑ya mai awi awirameteni. Owati‑ya mai mitabone mai ati namete, owati‑ya mai miti awirameteni.

¹⁸ Yamata noki‑ya werene tamine yokana dai mitahi.

¹⁹ Fadara‑ka wami ai atibodi tamine amani. Neme‑ke ai nafi‑ka hidi kitabote tohawahebona tamine‑ya mai mita, ati mai hiwato awireya, mai ati kadamowama kanibote na. Hawi fowari‑ya yamata noki sona‑nima mai na, Satanasi ati ene Deoso ati‑ya mai ati kadamowamani.

²⁰ Wami si‑sifina‑ya yamata noki one sona, yana kanibote na, aba kanibote na, fara Deoso ati‑ya mai mita, mai ya‑yai kanibote na, mai tamine amani.

²¹ Deoso ati‑ya mai nofara mai mai weehiniya, mai atibodi kitara, mai maakana kanibote na, Deoso ati‑ya mai tokadabamarani.

²² Atiwa mete‑ya yamata noki sona, fara Deoso ati‑ya mai mita, makobote yamataha, bora, yinero na‑ya mai nokotonihe, Deoso ati‑ya mai nokotonimara, yamata atiwa‑ya daba, bonora‑nima mai na, mai ihi amosa‑ba wadarani.

²³ Bodo‑ya yamata noki sona‑nima mai na, Deoso ati‑ya mai mita, Deoso ati‑ya mai atibodi nofa, mai tamine amani. Mai ihi amosani. Mai one ihi amosi bi‑bidi, mai one ihi amosi ba‑basi teni.” Yeso ati nemarine.

Yamata tamine‑ya hiyare

²⁴ “Hiyara one dai mitahi. Neme‑ke ai nafi‑ka hidi kitabote tohawahebona, haa‑nima tebonane. Ai owa yamata noki amosa‑ya werenane.

²⁵ Yamata hidi‑ya kako yama soki‑ya kaki, yama towe kabara noki‑ya werenamakitase, tokomane.

²⁶ Yamata noki amosa yana, yama kabara noki yanahari neni.

²⁷ Yama kabara‑ya hidi‑ka yo‑yose mai awa, mai‑ka hidi‑ya mai hiyara, ‘Yamata noki amosa weretina‑ya yama kabara dabawahani.’ Mai ati neni.

²⁸ ‘Owa‑ya kako ene amane.’ Hidi ati nane. ‘Yama kabara oda boreniba?’ Hika yo‑yose mai ati na,

²⁹ ‘Dai boreriyahi. Yama kabara dai boreniya, yamata amosa‑ya dai boreriyahi.’ Hidi ati nane.

³⁰ Yamata marafakaniya, dai oyosebone, ‘Yama kabara dai boreni bahiya, dai yadiniyahi, sarikanabonehe. Yamata amosa‑ta oka yobe‑ya dai nawadahi.’ Onaboneni.” Yeso ati nemarine.

Yamata noki i‑isi na tamine

³¹ Yeso mai‑ya kanawatobona mai‑ya hiyare, “Neme‑ke ai nafi‑ka hidi kitabote tohawahebona haa‑nima tene. Mositada noki‑ya maki hika fadara‑ya korotoni‑nima tene.

³² Mositada noki i‑isi na yana, ade tonafe, awa webote tohawaha, bani mai kake, awa ini‑ya mai bori‑bone‑ya mai wamateni.” Yeso ati nemarine.

Femeto tamine

³³ Mai‑ya kanawatomakibona, mai‑ya hiyaramatase, “Femeto‑ya fana kemabone, farina tiriko 7 kiro toha bodi‑ya femeto bide‑ya fana ibe, femeto dodama ihi farina tiriko nafi‑ya femeto sawineni. Neme‑ke ai nafi‑ka hidi kitabote tohawahebona haa‑nima nebonane.” Yeso ati nemarine.

³⁴ Deoso ati tamine‑ya Yeso hiyare, yama bara tamine‑ya hiyaremarine. Mai dama mai‑ya hiyare, yama tamine yokana‑ya kamini awiremarine.

³⁵ Hibati‑ya Deoso ati‑ya mi‑mita‑mata i‑di Yeso tamine‑ya kanahanomata, “Hiyara bara‑ya mai‑ya hiyarebona, hibati‑ya yama‑ya mai watora yama tamine‑ya mai‑ya kanawatobonane.” Deoso‑ka yama hani ati nineni.

Yamata tamine yokana

³⁶ Yeso hiyari hawa tohe, oda toka, yobe doro‑ya oda eyehe tokiyomemarine. Yeso‑ya oda hiyara, “Yama kabara tamine‑ya tihiyara, yama kabara tamine oda mitaboneni.” Oda ati namaroni.

³⁷ “Yamata noki amosa‑ya we‑were owa tamine amani.

³⁸ Maki‑ka wami ai nafi wi‑wina‑ka tamine amani. Deoso‑ka dai toha, yamata noki amosa‑nima dai nineni. I‑di Satanasi ati‑ya mai no‑nofa yama kabara noki‑nima mai nineni.

³⁹ Yama kabara noki‑ya werene i‑di Diaboro tamine amane. Yobe‑ya yamata‑ya mai nawada, yama towe mai sarikana na, yama faina‑bone tamine amani. Yamata‑ya mai a‑ani Deoso‑ka yo‑yose mai tamine amani.

⁴⁰ Yama faina koboniya, yama kabara‑ya mai sarikana‑nima mai ihi towe‑ya mai sarikanaboneni.

⁴¹ Oka yo‑yose mai oyosebone, owati ihi oka wami nafi‑ya mai tokabone, mai ihi amosara mai‑ya mai sokinaboneni.

⁴² Yama sa‑sarikana‑ka yama wiye‑ya mai‑ya mai weretowitebone, fara‑kaya mai ohinabone, mai kome kitaboneni.

⁴³ Mai ihi amosa mai‑ka Abi neme‑ke‑ya mai saweboneni. Mai wahi wadabone, mahi wehene‑nima mai wahi nawahaboneni. Owati dai mita, owati dai tokadabahi.” Yeso ati nemarine.

Oro, daro‑ka kasaro na tamine‑ya hiyare

⁴⁴ “Hiyara one dai mitamakitasahi. Fadara‑ya yama manakone nafe‑ya ai owa wasi, ya‑yaine, yama‑ya barikaname, hika yama nafi‑ya daane, fadara‑ya kanike, yama manakone nafe‑ya kayafebonaha. Fara‑nima Neme‑ke ai nafi‑ka hidi kitabote tohawahebona‑ya dai nokotoni kitahi.” Yeso ati nemarine.

⁴⁵ “Neme‑ke ai nafi‑ka hidi kitabote tohawahebona tamine dai mitamakihi. Yama‑ya ka‑kanika daro‑ka kasaro amosa‑ya sibatene.

⁴⁶ Makobote daro‑ka kasaro amosabote‑ya wasi, hika yama nafi‑ya daane, daro‑ka kasaro amosabote‑ya kanikane.” Yeso ati nemarine.

Mayadera tamine‑ya hiyare

⁴⁷ Neme‑ke ai nafi‑ka hidi kitabote tohawahebona tamine dai mitamakihi. “Mayadera‑ya mai yadina, aba mai dama mai wasineni.

⁴⁸ Mayadera‑ka aba mai kiba, mai‑ya mai horokana, hisiri‑ya aba mai amosa mai‑ya mai teena, aba towe mai‑ya mai weretowitineni.

⁴⁹ Yama faina‑ya Deoso‑ka yo‑yose mai kamakeboneni, mai ihi amosara mai‑ya mai kadika,

⁵⁰ yama sa‑sarikana‑ka yama wiye‑ya mai‑ya mai weretowitebone, fara‑kaya mai ohinabone, mai kome kitaboneni.

⁵¹ Owati nafi dai watokarini?” Yeso ati ne, “Hehe, tiwati nafi oda watoneni.” Oda ati namaroni.

⁵² “Mose‑ka yama hani ati‑ya mai ka‑kamina Neme‑ke ai nafi‑ka hidi kitabote tohawahebona tamine‑ya mai watomakiniya, yama nafi‑ya mai wataboneni. Mai one‑ya mai kanawataboneni. Yama hani‑ya kanahanomata tamine toha, hibayata ati tamine toha ne‑ya mai‑ya mai kanawataboneni.” Yeso ati nemarine.

Nasare‑ya Yeso ati‑ya mai nofara

⁵³ Hiyari hawa tohe, tokomemarine.

⁵⁴ Yeso hini yana‑mata‑kaya toke, Deoso‑ya mai hi‑hiyara‑ke yobe‑ya tokiyomemarine, mai‑ya kanawatobonaha. Yeso ati‑ya mai mita, “Ka! Ebeni‑ke ene Yeso yama‑ya watoti? Ebeni‑ke ene Yeso ene kitati?

⁵⁵ Yama‑ya wa‑wama bidi tohatekare? I‑di Mariya bidi tohatekare? I‑di Tiyako, i‑di Yose, i‑di Simaho, i‑di Yoda, mai na, mai‑ka ayo tohatekare?

⁵⁶ Hika asima ai‑ya mai sawe, ebeni‑ke Yeso‑ya kanawatoti?” Mai ati namaroni.

⁵⁷ Yeso‑ya mai nofaramaroni. Mai‑ya Yeso ati yanane, “Tabora bara‑ya Deoso ati‑ya mai mi‑mita mai one nafi‑ya mai nofateni. Hini mai tabori‑ka mai toha, mai one toha, mai na, mai‑ya mai nofaterani. Fara‑nima oka dai toha owa‑ya dai nofi awirani.” Yeso ati nemarine.

⁵⁸ Yeso ati‑ya mai nofara, Yeso mai nafi‑ya nakitami awiremarine.