Korito daidi 15 - Deoso-ka Yama Hani

¹ Oka soho dai amani, owati dai mitamatasahi. Hibati‑ya Deoso Ati Amosabote dai‑ya okamine, ati dai nofemari, ati‑nima dai teni.

² Deoso Ati Amosabote ati dai nofa, Deoso tabaro‑ya dai winaboneni. Deoso Ati Amosabote‑ya mai atibodi nofara, hiniya mai ati hinofabise, Deoso tabaro‑ya mai winateraboneni.

³ Yeso Kirisito yama owa‑ya hikaminamaro, dai‑ya okaminamakitasineni. “Kirisito abe, ai manakone‑ya nanahabematane.” Deoso‑ka yama hani ati na, fara dai‑ya okaminamaroni.

⁴ “Yeso abe, mai hikame, amoni fama, amoni ohari ne‑ya Deoso hinakitamane.” Deoso‑ka yama hani ati nineni.

⁵ Yeso kitame, i‑di Bedoro‑kaya tokomakiya, i‑di Bedoro awi bahe, makobote Yeso‑ya mai da‑daba mai 12 toha, Yeso kitame‑ya mai awamakitasa nameteni.

⁶ Makobote 500 mai fiyakana, Deoso ati‑ya mai no‑nofa mai yorotokana, Yeso kitame‑ya mai awameteni. 500 mai fiyakana, mai dama mai hasina, mai fa‑famaraba na‑ta mai abineni.

⁷ Makobote i‑di Tiyako hiawamatasane, nowati‑ya Yeso‑ka yo‑yose mai nafi hiawawahane.

⁸ Makobote amoni dameya, oawane. Yeso bofe‑ya wineya, oawaterene. Neme‑ya toki hawa toheya, oawawahemarine.

⁹ Yeso‑ka yo‑yose mai one amosabisa, owa‑ta towe ama·oni. Hibati‑ya Yeso ati‑ya mai no‑nofa mai‑ya bisi·onamaroni. Owa ene‑maro Deoso owa‑ya yosere‑mana, sibare nane. Owa‑ya yosemarine.

¹⁰ Deoso owa‑ya kasomi nafi, owa‑ya yosemarine, Yeso ati okaminabonehe. Deoso owa‑ya kasome ene honita tohare, owa‑ya kasomi nafi ene mai dami‑ya Yeso ati okaminabisa, mai one ihi‑ya owa ene fiyakanineni. Owa ene yokana tohara, Deoso owa‑ya kasome ene tohabisane.

¹¹ “Yeso Kirisito abe, kitamematane.” Yeso‑ka yo‑yose mai one ati toha, fara owati toha na, oda ati dai mita, oda ati dai nofamaroni.

¹² Yeso Kirisito abe, Deoso hinakitame tamine oda kaminamaro, hini yamata ihi ai aba, ai kitamaterabone dai one ati niti?

¹³ Ai kitamaterabone‑mani, Yeso kitami awire nane.

¹⁴ Yeso kitami awire‑mana, oda ati honita toha neni. Yeso kitamare‑mana, ati dai nofe dai‑ya kasomare nane.

¹⁵ Ai kitamatera‑mani, Deoso tamine‑ya keyehe oda hirina neni. Yeso‑ya Deoso nakitame oda ati na, ai kitamara‑mani, Yeso kitamare nane.

¹⁶ Ai‑ya Deoso nakitami awirebona‑mana, Yeso‑ya nakitamare namatane.

¹⁷ Yeso kitami awire‑mana, dai manakone‑ya nanahabare nane. Yeso kitami awire‑mana, dai manakone towe wadasa na, dai abiya, madi mai tabori‑ya dai ohina neni.

¹⁸ Yeso kitami awire‑mana, Kirisito ati‑ya mai nofamete mai aba, Deoso tabaro‑ya mai winara neni.

¹⁹ “Bofe‑ya ai wina ai‑ya Deoso kasomi oharine.” Dai owa ati ne, Ai‑ya nakitamarebona‑mana, Deoso ati ai tokadaba ai manakone wadara neni. Ai‑ya mai bisi, ai‑ya mai kosi, ai‑ya mai nanahaba na, ai manakone honita tohaneni. Deoso ati‑ya mai nofara mai‑ya mai bisirihi, mai‑ya mai kosirihi mai‑ya mai nanahabarihi na, mai kome bi‑bidi ai komene ba‑basi nineni.

²⁰ Yeso abe, kitami dai tohe, nowati‑ya mai aba mai kitamaboneni.

²¹ Ai‑ka idi i‑di Adaho ene ai aba, Yeso ene ai kitama, ai naboneni.

²² Ai‑ka idi i‑di Adaho ene ai abano ababoneni, ai nafi. Ai‑ka Ayo i‑di Yeso Kirisito ati ai nofa, ai kitamaboneni, ai nafi.

²³ Yeso Kirisito abano kitami dai tohemata, Yeso‑ka ai tohawaha, Yeso kamataseya, ai abano kitamamakitasaboneni.

²⁴ Yeso kameya, neme‑ya mai wi‑wina mai toha, bofe‑ya mai wi‑wina mai toha, bai‑ya mai wi‑wina mai toha na, Deoso ati‑ya mai nofara, wara hirini‑ya Yeso mai‑ya weretowitibonane. Makobote yama hasina‑ya Badi i‑di Deoso‑ya daaneya, yama nafi hawa tohawahaboneni.

²⁵ Hibayata Yeso Kirisito ai‑ka hidi tohe, mai dama Yeso Kirisito‑ya mai kakonasa nineni. Makobote Yeso Kirisito‑ya mai ka‑kako‑maro, Deoso ene Yeso noko‑kaya mai moikanisabone, “Yeso kitabote tohane.” Mai ati nawahaboneni.

²⁶ Yeso kamataseya, ai abamarihi, yama one abamarihi, yama ai‑ya ka‑kako wadamarihi, teboneni.

²⁷ Deoso ene ai nafi‑ka Hidi i‑di Yeso Kirisito tohe, Deoso‑ka Hidi‑ta wadaterene. Deoso ene Yeso Kirisito yama nafi‑ka Hidi tohene.

²⁸ Yama nafi‑ka Hidi Yeso Kirisito toheya, Yama nafi‑ya daanebonane, Deoso‑ya. “Abi, tiwati‑nima oda nafi naboneni.” Yeso ati nebonane. Yama nafi‑ka hidi i‑di Deoso tohebonane.

²⁹ “Mai aba, mai kitamateraboneni.” Dai one ati nihi, “Oka mai habanisara mai abamaro, mai ihi owa dai habanirisahi, oka mai habanisa‑nima mai nawahabonehe.” Dai one ati nihi namoneni. Mai abamaro mai kitamarabone dai ati na, hini yamata‑bone dai‑ya mai habanirisiti?

³⁰ Ai kitamarabone owatibodi ati na‑mani, ai kitami tamine‑ya ohiyarara neni. Ai kitami tamine‑ya ohiyarariya, owa‑ya mai kakorihi, owa‑ya mai ati nanahabarihi neni. Ai kitamaboneni.

³¹ Oka soho dai toha, ai‑ka ayo Yeso Kirisito ene dai onofi nafe, yama‑ya dai wato awisa ra awineni. Ai kitamaboneni. Mahi‑nima owa‑ya mai ati nanahabateni.

³² Ai aba, ai kitamarabone‑mani, Deoso‑ka yama ai nokotonira neni. Ai kitamabone, Deoso‑ka yama ai nokotonihe, ai aba nowati‑ya manakone ai kayafaboneni. Efesiyo‑ya Deoso‑ka yama noko·onihe, yama‑ka bani mai hama‑nima Efesiyo‑ka mai hama mai na, owa‑ya mai nanahabi yanatoneni. Okitamarabone‑mani, owa manakone wadara neni. Ai kitamarabone‑mani, hiniya ai tafa, faha ai fawa, ai aba niya, ai wadamara neni.

³³ Dai noko wadahi. Mai ihi amosara mai‑ya dai daba, dai ene amosaraboneni.

³⁴ Dai amona‑nima dai na, dai dodafiya, dai atibodi dai kadikahi, dai ene amosabonehe. Mai one yama‑ya mai wa‑wato‑mone mai ati na, Deoso‑ya mai nofara dai‑ya keyehe‑ya mai hirikanateni, dai ene amosarabonehe. Yama dai watabone ona, yama dai watora awineni.

³⁵ “Ai aba, ai kitama, hini yamata‑nima ai noko nibati?” Dai ati na awineni.

³⁶ Yama‑ya dai wato awineni? Awa bono noki ai kama, moone, ade yanateni. Awa bono noki aba‑nima ni awiriya, yanaterani.

³⁷ Awa bono noki ai kama, awa aboni ai kamara, noki‑ta ai kamateni. Noki awi‑nima ade awiterani.

³⁸ Deoso ene ayawa noki ai kama, ayawa ade yanabisa teni. Yama bara yanaterani. Kimi noko ai kama, kimi ade yana tene. Yama bara yanaterani.

³⁹ Yama dama fara nafi tohaterani. Ai eme bara toha, bani mai ime bara toha, bani mai afe wada mai ime bara toha, aba mai ime bara toha teni.

⁴⁰ Neme‑ya mai wi‑wina mai aboni bara toha, bofe‑ya ai wi‑wina ai abano bara toha, ai teni. Neme‑ya mai wi‑wina mai amosa, bofe‑ya ai wi‑wina ai amosa, hiniya neme‑ya mai wi‑wina mai amosi bara toha, bofe‑ya ai wi‑wina ai amosi bara toha, ai teni.

⁴¹ Mahi noko amosa, abariko noko amosa ne, mahi noko‑nima abariko noko terene. Amowa mai noki amosa, mai noki‑nima mahi noko ni awire, abariko noko‑nima amowa nokoni awirene, amowa owa bare toha, owa bare toha tene.

⁴² Deoso ai‑ya nakitameya, ai bara tohawahaboneni. Ai aba, ai abano batateni. Ai kitamiya, ai abamarihi, ai batamarihi teboneni.

⁴³ Ai aba, ai abano amosaterani. Ai abano kitara, Deoso ai‑ya nakitameya, ai amosa, ai kitawahaboneni.

⁴⁴ Atabo‑ya ai abano wamani toha, Deoso ai‑ya nakitameya, neme‑ya mai wi‑wina mai aboni‑nima ai abano nawahaboneni. Bofe‑ya ai wi‑wina atabo‑ya ai abano wamani toha, neme‑ya mai wi‑wina yama bara‑ya mai aboni wamani toha nineni.

⁴⁵ Hibati‑ya ai‑ka idi‑bona i‑di Adaho tamine‑ya Deoso hiyare, “I‑di Adaho atabo‑ya wama·one, ai tohawahane.” Deoso‑ka yama hani ati nineni. I‑di Adaho yoto‑ke Kirisito tohe, ai abano yati‑ya daanebonane.

⁴⁶ Neme‑ke abano ai kayafi dai tohara, bofe‑ke abano ai kayafi baha, bofe‑ke abano abeya, neme‑ke abano ai kayafawahaboneni.

⁴⁷ I‑di Adaho bofe‑ke atabo‑ya Deoso wamahine, Adaho owa i‑di Yeso Kirisito neme‑ke amane.

⁴⁸ Bofe‑ya ai wi‑wina Adaho abano‑nima ai abano na, neme‑ya ai winiya, Kirisito abano‑nima ai abano nawahaboneni.

⁴⁹ Hibayata i‑di Adaho abano‑nima ai abano na, makobote i‑di Yeso Kirisito abano‑nima ai abano nawahaboneni.

⁵⁰ Soho, dai okanawatabone, owati dai mitahi. Bofe‑ke abano ai weyeniya, neme‑ya ai tokaraboneni. Bofe‑ke abano fawaneya, neme‑ke abano ai weyeniya, neme‑ya ai tokaboneni. Neme‑ke Hidi Deoso tohe, yama ababone neme‑ya koboteraboneni. Ai abano neme‑ke abaterebonane.

⁵¹ Ai nafi abaraboneni. Ai one aba, ai one hasi na, ai nafi tohiyaboneni. Deoso ati ene ai tohiya, neme‑ke abano ai weyenaboneni. Ai tohiyabone, hibati‑ya tamine mai himitara, hibayata tamine ai mitawahineni.

⁵² Neme‑ke abano sakoni nahorebonane. Ai noko ataro yebekana‑nima neme‑ke abano ai sakone, sakoni nahoterebonane. Deoso‑ka ho‑hori ati yananiya, mai abamete mai kitamiya, mai abamateraboneni. Ai hasina, neme‑ke abano ai sakonaboneni.

⁵³ Ai hasina, neme‑ke abano ai sakona, neme‑ke abano abaterebonane.

⁵⁴ Ai abano bote fawaniya, ai abano yati ai sakonawaha, Deoso ati‑mata‑nima yama nawahaboneni. “Ai abamaterabone, Deoso tabaro‑ya ai wini ohareboneni.

⁵⁵ Ai abamaterabone ene ai aba tamine ai kadikamarabone, mai ababone mai korikasa mai‑nima ai korikasaraboneni.” Deoso‑ka yama hani ati nineni.

⁵⁶ Hibayata Deoso ati hinama mai tokadabariya, mai ihi amosara manakone ababone, fara mai korikasateni.

⁵⁷ Deoso‑ya ai kahiyarahi. Deoso ene ai‑ka Ayo Yeso Kirisito ai manakone‑ya nanahabane, ai abarabonehe.

⁵⁸ Oka dai amani, owati dai mitahi. Dai eme kitahi. Ai‑ka Hidi ati‑nima dai nabone, dai‑ya mai we‑wee, mai ati dai nokotoniriyahi. Ai‑ka Hidi ati‑nima dai niya, dai manakone amosa wadaboneni.