Korito daidi 14 - Deoso-ka Yama Hani

¹ Mai dai nofahi. Deoso‑ka Doni‑ka da‑daa dai kayafabone, yama amosa mai‑ya kasomabone dai haa, Deoso ati dai kaminabone dai haa nahi.

² Mai one ati‑ya dai hiyara, mai ati‑ya dai watora, dai ati‑ya mai mita mai hiwatora, hini dai atibodi ati toha, dai atibodi ati‑ya Deoso watobisebonane.

³ Deoso ati dai kamina dai ati‑ya mai mita, mai dai kasomaboneni. Dai ati ene yama‑ya Deoso nofe‑ya mai wata, ati‑nima mai ihi nabone, mai nofaboneni. Mai atibodi koma Deoso ati‑ya mai mita, mai atibodi kome fawanaboneni.

⁴ Mai one ati‑ya dai hiyara, hini dai‑ya dai ya‑yainibisa, mai dai kasomi awiraboneni. Deoso ati‑ya dai kamina, Kirisito‑ka mai dai kasomaboneni.

⁵ Mai one ati‑ya dai ati toha, dai sibarineni. Owatibodi ati nineni. Mai one ati‑ya tiwati yanani dai toha, makobote ai ati‑ya tiwati yananamatasiya, ai‑ya tikasomaba awineni. Deoso ati tikamine, ai nafi‑ya kasomatene.

⁶ Dai tabaro‑ya okiya, mai one ati‑ya dai‑ya ohiyariya, owati‑ya dai watoriya, dai‑ya okasomaraboneni. Dai tabaro‑ya okiya, yama‑ya Deoso owa‑ya kanawato, dai ati‑ya dai okanawatomakiya, dai‑ya okasomabisaboneni.

⁷ Kaida‑ya mai afo, araba‑ya mai deona, mai‑ka yama ati one nafi, ati one i‑isi na, ati ai mitiya, yama ai wataba awineni. Ati ohariya, yama ai watoraboneni.

⁸ Ho‑hori sodado mai afohina, ati‑ya sodado mai one mita, ati mai hiwata, mai tokomakiteni, mai one‑ya mai taonabonehe. Ho‑hori afoni‑ya sodado watore, ho‑hori‑ya afoneya, sodado mai one tokomakiterani. Yama bara‑ya haane awane, mai ati niya, mai tokomakiterani.

⁹ Mai one ati‑ya dai hiyariya, dai ati oda mitara, dai ati ababoneni.

¹⁰ Mai one ati dama, hini mai ati‑ya mai watoteni.

¹¹ Mai one ati‑ya mai hiyariya, mai ati owatora, “Bara mai amani.” Owatibodi ati naboneni. Owati yananiya, owati‑ya mai mitara, “Bare amane.” Mai ati naboneni.

¹² Yama‑ya Deoso‑ka Doni dai‑ya daanebona dai nokotonihemone, Kirisito‑ka mai dai kasomabone dai nokotonihari nahi.

¹³ Mai one ati‑ya dai ati yanana, mai ati dai watora, Deoso‑ya dai haana, “Abi Deoso, mai one ati‑ya owati yanana, mai ati owatora, oda ati‑ya hini yamata‑nima owati niti? Owa‑ya tikaminiya, oda ati‑ya mai‑ya okaminamakeboneni.” Dai ati nahi.

¹⁴ Mai one ati‑ya Deoso‑ya ohiyariya, owatibodi ati toha, owa‑ya kasomaraneni.

¹⁵ Deoso‑ya ohiyariya, owati‑ya ohiyara, owatibodi hiyarahari teni. Deoso‑ka wayoma hiri·oniya, owati‑ya hiri·ona, owatibodi wayoma hirinahariteni.

¹⁶ Mai one ati‑ya Deoso‑ya dai kahiyariya, dai ati‑ya mai watora, Deoso‑ya mai kahiyari awiraboneni. Ai ati‑ya Deoso‑ya dai kahiyariya, dai eyehe Deoso‑ya mai kahiyaraboneni.

¹⁷ Mai one ati‑ya dai ati yanana, Deoso‑ya dai ati amosa awineni. Hiniya dai ati‑ya mai mita, dai ati‑ya mai watora, mai‑ya kasomi awiraboneni.

¹⁸ Deoso‑ya ohiyara, mai one ati‑ya owati yanani dama, Deoso owati‑ya wato, ya‑yai·oteni. Dai‑ta mai one ati‑ya dai ati yanani damarani.

¹⁹ Ai yorotokana, Deoso tamine dai‑ya ohiyara, dai ati‑ya owati 5‑ta toha, owati ihi Deoso‑ya dai nofi ba‑basi naba awineni. Mai one ati‑ya owati yanani 10,000 kana, dai‑ya kasomara, Deoso‑ya dai nofi ba‑basi ni awiraboneni.

²⁰ Soho, madehe i‑isi na yama towe‑ya mai atibodi kadikaterani. Mai‑nima yama towe‑ya dai kadikariyahi. Madehe yama‑ya watora, mai‑nima dai riyahi. Ai hawa toha, yama‑ya wato‑nima yama dai watobisahi.

²¹ Deoso ati‑ya mai kanahanamete, mai ati dai mitahi. “Isara·eo‑ka hini mai ati‑ya mai‑ya ohiyara, owati‑ya mai tokadabaramaroni. Mai one ati‑ya mai‑ya ohiyaramakiya, owati‑ya mai nofi awiraboneni.” Deoso ati nematane.

²² Mai ati‑ya Deoso mai‑ya hiyari bahe, ati mai hinofareya, mai one ati‑ya mai‑ya hiyaramakimatane. Yeso ati ai nofa, Deoso ati mai ka‑kamina, ai ya‑yaiteni.

²³ Kirisito‑ka dai toha, dai yorotokana, Deoso‑ya dai kahiyarabone, mai one ati‑ya dai ati yananiya, Deoso ati‑ya mai nofara, dai ati‑ya mai mita, dai ati‑ya mai watora, “Ka‑kana mai amani.” Mai atibodi ati naboneni.

²⁴ Ai ati‑ya Deoso ati‑ya dai kamina, Deoso ati‑ya mai watora mai koboniya, dai ati‑ya mai mitiya, mai ihi amosara mai atibodi hini mai‑ya weena, “Ka! Owa ene amosara tamine‑ya mai wata awineni.” Mai ati naboneni.

²⁵ Mai atibodi ati‑ya Deoso wato‑ya mai wata, mai moikanisa, “Deoso dai‑ya sawine.” Mai ati nabone, Deoso‑ya mai kahiyaraboneni.

²⁶ Oka soho dai amani. Owati dai mitahi. Dai yorotokana, Deoso‑ya dai kahiyarabone, mai nafi dai kasomabone, Deoso‑ka wayoma‑ya dai owa wayome, dai‑ka wayoma mai‑ya kasomiya, sibarini. Deoso dai‑ya kanawato, mai dai kasomabone, mai dai kanawatohi. Mai one ati‑ya dai owa hiyare, hini dai ati‑ya dai owa mai‑ya kaminamakitaseya, mai‑ya kasome, sibarineni. Dai ati hinama mai‑ya kasomiya, dai sibarihi nineni.

²⁷ Mai one ati‑ya dai hiyarabone dai damariyahi. Mai fama owa oharine sibara awineni. Mai fiyakariyahi. Mai oharirina mai hiyara, mai hawa tohiya, ai ati‑ya mai ati dai kaminamakitasahi.

²⁸ Dai yorotokana, Deoso‑ya dai kahiyarabone, mai one ati‑ya dai ati yananakosabone dai ati na, mai one ati kamini‑ya dai owa watore, dai ati yananakosariyahi. Hini dai atibodi‑ya dai ati toha, dai atibodi ati dai wato, Deoso hiwato hineni.

²⁹ Deoso ati‑ya mai mi‑mita mai kaminabone mai damariyahi. Mai fama owa oharineya, sibaraboneni. Mai ati dai mita, mai ati dai kadikiyahi.

³⁰ Deoso ati‑ya dai owa hiyare, dai owa itari atibodi‑ya Deoso ati‑ya mite, Deoso ati‑ya kamine ati fawaneya, itari ati yanane, sibarineni.

³¹ Deoso ati dai mita, dai oharirina Deoso ati dai kamina, dai ati‑ya mai nafi mitiya, yama‑ya mai watabone, mai ya‑yainaboneni.

³² Deoso ati‑ya mai ka‑kamina mai atibodi ati‑nima mai teni. Mai maakanabone mai atibodi ati na, mai maakana, mai ati yananabone mai atibodi ati na, mai ati yanateni.

³³ Deoso yama amosa‑ya nofatene. Dai dami ati yananiya, dai ati amosi awirini. Deoso‑ya mai kahiyarabone, mai ati ohaririteni.

³⁴ Deoso‑ka yobe‑ya dai yorotokaniya, mai fanawi ati yanariyahi. Mai‑ka yibote ati‑ya mai tokadaba, fara‑nima Mose ati nane.

³⁵ Mai fanawi yama‑ya watabone, tabora‑ya mai‑ka yibote mai‑ya mai hiyarahi. Deoso‑ka yobe‑ya mai ati yanariyahi.

³⁶ Korito‑ya dai wi‑wina dai‑ya Deoso hiyari oharibisemona dai atibodi ati na awineni. Deoso‑ka mai nafi‑ya Deoso hiyarane. Deoso‑ka mai one Deoso ati‑ya mai watoramone dai atibodi ati na, Deoso‑ka mai one Deoso ati‑ya watoharineni.

³⁷ Deoso ati‑ya dai mi‑mita dai toha, Deoso ati dai wato na, Deoso ati okamine dai watoneni.

³⁸ Deoso ati okamine‑ya mai watora‑mani, hiniya yama‑ya mai watora neni.

³⁹ Oka soho dai amani, owati dai mitahi. Deoso‑ka Doni ene Deoso ati dai kaminabone dai nokotonihi. Deoso‑ka Doni ene mai one ati‑ya dai owa hiyareya, dai ati baririyahi.

⁴⁰ Dai ene amosiyahi. Dai owa hiyari hawa toheya, dai ati yananiya, yama amosaboneni.