Karatiya 6 - Deoso-ka Yama Hani

Dai ibi kasomiyahi

¹ Dai narabo hawihi. Dai owa ene amosare, Yeso ati‑ya dai no‑nofa, dai owa‑ya dai hiyarahi. “Tiwa ene amosara tiwa oda awa, tiwa oda nofa, tiwa ene amosawamahi.” Dai ati nahi. Dai owa‑ya dai hiyarabone, dai noko wadahi, dai owa ene‑nima dai ene ni awiraboneni.

² Dai ibi kasomiyahi. Dai ibi kasoma, Yeso ati dai tokadababoneni.

³ Dai‑ta dai amosabisa‑mone dai ati na, dai‑ya dai keyehe, dai amosabisarani.

⁴ Mai ihi dai kadikariyahi, hini dai ene‑ta dai kadikabisahi. Dai ene amosa, dai ya‑yainaboneni.

⁵ Ai‑ka yama anini‑bone‑ya Deoso ai‑ya daa, mai‑ka yama anini‑bone‑ya Deoso mai‑ya daane. Ai‑ka yama‑ya ai ani, mai‑ka yama‑ya mai ani mai teni.

⁶ Deoso Ati Amosabote‑ya dai‑ya mai kanawata, yama dai kiha‑ya mai‑ya dai kasomahi.

⁷ Dai‑ya keyehe‑ya dai hirikariyahi. Yamata ai kama, yana hini hini‑nima namatasateni. Fara‑nima hini ai ene‑nima ai manakone naboneni. Deoso‑ya keyehe‑ya ai hirina, ai ati‑ya Deoso nofaterebonane. Ai ene amosa, ai manakone amosabisaboneni. Ai ene amosara, ai manakone amosaraboneni.

⁸ Ai owa hini atibodi bote ati amosare‑ya tokadabe, abeya, Deoso tabaro‑ya winaterebonane. Madi mai tabori‑ya winawahebonane. Ai owa Deoso‑ka Doni ati‑ya nofe, Deoso ati‑ya tokadabe, abeya, Deoso tabaro‑ya winebonane.

⁹ Deoso ene mai ai kasoma, mai kasomi ai fawani awiriya, ai manakone wadaboneni. Ai‑ka yama amosabote‑bone‑ya Deoso daanebonane.

¹⁰ Yama‑ya mai kihara mai dai kasomahi. Dai‑ka yama dama, dai one‑ka yama‑ba dai daanahi. Yeso ati‑ya mai nofara mai dai kasomi bi‑bidi, Yeso ati‑ya mai no‑nofa mai dai kasomi ba‑basi nahi.

Baoro ati fawanebonane

¹¹ Owa yehe‑ya yama hani okanahana, fota‑ya dai nafi awahi.

¹² “Dai sowiri tati ataro abahi.” Mai ati na, “Yeso tamine ai kaminiya, ai‑ya mai weenaboneni.” Mai atibodi ati neni.

¹³ Mai sowiri tati atori mai hinahabamaro, Mose ati nafi‑ya mai tokadabaterani. Mai ati ihi dai sowiri tati ataro dai nanahaba, hini mai‑ya mai kahiyaraboneni. “Oda ati‑ya mai nofa mai damineni. Mai dai awahi.” Mai ati naboneni.

¹⁴ Owa okahiyari awiraboneni. Ai‑ka Ayo, Yeso, awa‑ya waane, ai manakone‑ya nanahabemari, Yeso‑ta okahiyarabisaboneni. Yeso ati‑ya mai nofara, owa‑ya mai nofaharira, mai ihi‑nima owa ene teraboneni.

¹⁵ Yeso Kirisito ati ai tokadaba, ai sowiri tati ataro aba, sibarihi, ai sowiri tati ataro abara, sibarihi nineni. Ai atibodi yati tohawaha‑ya Deoso nofabisane.

¹⁶ Yeso ati‑ya mai tokadaba, Yodeo mai toha, Bara mai toha na, mai‑ya Deoso kasome mai atibodi mai weerabone, Deoso‑ka mai toha, Isara·eo‑ka yokana mai toha neni.

¹⁷ Owa dai weenamariyahi. Yeso ati‑ya okamina, owa‑ya mai bisinamaro, mai‑ka yama ihi‑ya sako oneni.

¹⁸ Oka mai dai toha dai tamine‑ya Yeso‑ya ohiyarateni. “Ayo Yeso, Karatiya‑ya mai wi‑wina tiwati‑ya mai no‑nofa mai tikasomahi.” Oteni. Feye amani.