Karatiya 5 - Deoso-ka Yama Hani

Dai yaditonamaro, dai‑ya Yeso seekanane

¹ Yeso Kirisito dai manakone‑ya nanahabemari, ati dai nofe, Deoso‑ka dai toha, dai noko wadahi. Dai‑ya mai yaditonamatasariyahi.

² Baoro ama·oni. Owati dai mitahi. Dai sowiri tati ataro‑ya mai wisinakosiya, Deoso dai‑ya ati somawamebona dai atibodi ati na awineni. Dai sowiri tati ataro aba ene Deoso dai‑ya ati somawame‑mana, Yeso Kirisito abe honitabise tohane.

³ Owati dai mitahi. I‑di Mose ati ene dai‑ya Deoso ati somawamebona dai ati na, ati nafi dai tokadabaho. Hiniya dai sowiri tati ataro‑ya mai wisinakosa, Mose ati nafi dai tokadabara, Deoso dai‑ya ati somawamarebonane.

⁴ Yeso dai manakone nafi‑ya nanahabare‑mana, dai sowiri tati ataro‑ya dai manakone kote dai nanahababone dai ati na, Yeso Kirisito‑ka dai toharamone owatibodi ati ni neni.

⁵ Ai‑ta Yeso ati ai nofa, Deoso‑ka Doni ai‑ya sawi, Yeso Kirisito kamebona ai nimana, Yeso kamataseya, Deoso ene ai ene amosa hinama tohaboneni.

⁶ Yeso Kirisito‑ka ai toha ai sowiri tati ataro‑ya mai wisinakosa, ai‑ya kasomarihi, mai wisinakosara, ai‑ya kasomarihi, Yeso ati ai nofa, mai one ai kasoma na ai‑ya kasomabisateni.

⁷ Hibati‑ya Yeso ati dai nofamaro, ebeni‑ke ati ene ati dai tokadabamarati?

⁸ Deoso dai‑ya haanemari, hini ene tohi awirene.

⁹ Femeto i‑isi ne ene baho tonafiteni. Mai ati towe i‑isi na dai kayafiya, dai ati amosamaraboneni, dai nafi.

¹⁰ Deoso ene owati dai nofabone owatibodi ati neni. Dai‑ya mai kanawato a‑arira, mai oni owatora, mai manakone Deoso daahina, amosaraboneni.

¹¹ Dai sowiri tati ataro dai wisinakosabone onamone mai ati na. Keyehe‑ya mai hirina, mai ati amani. “Dai sowiri tati ataro dai wisinahi.” Oterani. Mai ati‑nima ona‑mani, owa‑ya mai weenami awira neni. Awa‑ya Yeso abemari, ai manakone nafi‑ya nanahabemari, owatobisineni. Tamine ohiyaratene. Yeso tamine ohiyari awira‑mani, owa‑ya mai weenami awira neni.

¹² Dai sowiri tati ataro ababone mai ati na, dai‑ya keyehe‑ya mai hirikana, mai dane noki‑ta ababisiya, sibabisarineni.

¹³ Deoso dai‑ya kadikemari, dai ene towe dai‑ya yaditonamaraboneni. Yeso ati‑ya dai nofa, dai atibodi bote ati‑nima dai namariyahi. “Owa‑ta ya‑yai·obisaboneni. Owatibodi bote ati‑nima onaboneni.” Dai ati riyahi. Deoso dai‑ya seekane, dai atibodi yati ati‑nima dai naboneni. Dai ibi nofiya, dai ibi kasoma niya, dai nafi ya‑yainaboneni.

¹⁴ Hini dai‑ya dai nofi‑nima mai‑ya dai nofiyahi. Haa‑nima dai niya, yama sibaraboneni. Fara‑nima i‑di Mose ati nane.

¹⁵ Dai ibi wee, dai ibi bisi, dai ibi tokatowe na, dai abawahaba awineni. Dai noko wadahi dai nafi abarabonehe. Dai ibi nofabisiyahi.

Deoso‑ka Doni ati dai tokadabahi, dai ene amosabonehe

¹⁶ Owati dai mitahi. Deoso‑ka Doni ati dai tokadaba, dai ene amosaboneni. Yama towe‑ya dai atibodi koboraboneni.

¹⁷ “Deoso‑ka Doni ati okadababoneni.” Ai atibodi yati ati teni. “Owa ene‑maro‑nima owa ene namatasaboneni.” Ai atibodi bote ati teni. Ai atibodi bote ai atibodi yati‑ya kaka, Deoso‑ka Doni ati‑ya ai tokadabiya, nofaterani.

¹⁸ Hibati‑ya i‑di Mose ati dai‑ya barikane, hibayata Deoso‑ka Doni dai‑ya sawi, dai‑ya nawade, Deoso‑ka Doni ene Mose ati dai‑ya barikanamarene.

¹⁹ Mai atibodi bote ati‑ya mai tokadaba, eya mai ihi teni. Mai ihi amosara, mai one‑ka yibote mai‑ya mai kayafa, mai makidi one‑ya mai aha teni.

²⁰ Mai‑ka deoso bare‑ya mai kahiyara, madi mai‑ya mai hiyara, mai ibi wee, mai ati yawa, mai ibi kaka, mai yorotokaterani. Hini mai‑ya mai nofabisineni.

²¹ Mai one‑ka yama‑ya mai ati kobo, kawi ihi mai towe toha, mai dami ibi aha na, mai tamine owati dai mitahi. Hibati‑ya dai‑ya okaminamaro, okaminamatasaboneni. Haa‑nima mai ihi na, Deoso tabaro‑ya mai winateraboneni.

²² Deoso‑ka Doni ai‑ya sawi, ai atibodi yati toha, Deoso‑ka Doni ene eya ai teni. Ai ibi nofa, ai ya‑yai, ai atibodi ai‑ya weerihi, ai atibodi ati somabisateni. Ai ati yawa kanibote rihi, ai ibi kasoma, Deoso ati ai tokadaba ai na, yama amosa teni, ai ati‑nima ai teboneni.

²³ Mai ihi amosara, mai ihi amosawamabone, mai‑ya ai kasomateni. Ai ati, ai atibodi ati, ai ene na ai nawadateni. Ai ene‑ya yama hani ati barini awirini.

²⁴ Yeso Kirisito‑ka ai toha, hibati‑ya Yeso Kirisito abemarine, ai ene amosara manakone‑ya nanahabebonaha. Awa‑ya Yeso‑ya mai baakanamaro, owa ene amosara ene Yeso‑ya mai baakanamaroni. Fara Yeso Kirisito abe‑nima ai atibodi bote ati ai nanahabahi. Ai ene‑maro‑nima ai ene namariyahi.

²⁵ Deoso‑ka Doni ai‑ya sawi, ai atibodi yati‑ya foye, ene ai atibodi yati ati kita, Deoso‑ka Doni ati‑nima ai nahi.

²⁶ Deoso‑ka Doni ai ene‑ya namose, ai‑ya ai kahiyarariyahi. Ai ibi weerihi, ai one‑ka yama‑ya ai ati koborihi ai nahi.