Karatiya 3 - Deoso-ka Yama Hani

Hini ai ene Deoso tabaro‑ya ai koboteraboneni

¹ Karatiya‑ya dai wi‑wina dai ka‑kana nawaha awineni. Mai‑ka keyehe‑ya dai nofawahineni. Hibati‑ya dai tabaro‑ya oda wina, Yeso Kirisito tamine oda kaminamaroni. Keyehe‑ya dai‑ya oda hirikaramaroni. “Yeso awa‑ya abemarine, ai manakone‑ya nanahaberi.” Oda ati namaroni. Yeso ati ai nofiya, ai sibarabone ona. Owati dai mita, owati dai watamaroni.

² Hibati‑ya Mose ati‑nima dai na, Deoso‑ka Doni dai‑ya sawine? Dai‑ya sawi awiremarine. Yeso Kirisito tamine‑ya oda kamina, Yeso ati dai nofa, Deoso‑ka Doni dai‑ya sawiwahabisane.

³ Deoso‑ka Doni ene Deoso‑ka dai tohawaha, hini dai ene dai amosawamabone dai ati na awineni? Dai ka‑kana na awineni. Dai ene amosawamabone dai ati na, dai ene tohi awiraboneni. Deoso‑ka Doni ene tohabisebonane.

⁴ Hibati‑ya Yeso ati dai nofa, dai‑ya mai bisina, dai eme komamaroni. Yeso ati dai nofami awira‑mani, dai eme komene honita toha neni. “Dai eme komene honita tohi awirani.” Owatibodi ati neni.

⁵ Owati dai mitamatasahi. Mose ati‑nima dai namaro, Deoso‑ka Doni dai‑ya sawine? Dai‑ya sawi awirane. Mose ati‑nima dai na, Deoso ene kite dai awane? Ene dai awi awirane. Kirisito tamine oda kamine tamine dai nofabisiya, Deoso ene kite dai awineni.

⁶ Fara‑nima Deoso ati‑ya Abaraho nofemarine. Abaraho tamine i‑di Deoso hiyare, “Abaraho amosane. Abaraho owati‑ya nofe, sibarane.” Deoso ati nemarine.

⁷ Deoso ati‑ya ai nofa, Abaraho‑ka nodi ai tohaboneni. Dai one Bara toha, Deoso ati‑ya dai nofa, Abaraho‑ka nodi mai dai tohahareboneni. Abaraho Deoso ati‑ya nofemari‑nima dai na, fare Abaraho‑ka nodi dai amani.

⁸ Hibati‑ya Yodeo mai toha, Bara mai toha mai na, mai tamine‑ya Deoso hiyarane Abaraho‑ya. Deoso hini Ati Amosabote‑ya kaminemarine. “Abaraho, tabora dami‑ya mai wi‑wina mai okasomaboneni, mai nafi. Owati tinofa‑nima owati‑ya mai nofiya, mai okasomaboneni.” Deoso ati nemarine. Deoso ati‑ya mai kanahanamaroni, Deoso‑ka yama hani‑ya.

⁹ Deoso ati‑ya Abaraho nofe‑ya Deoso kasomemarine. “Abaraho owati tinofa sibarineni.” Deoso ati nemarine. Abaraho‑nima ai ni‑ya, Kirisito ati ai nofiya, Deoso ai‑ya kasomaharibonane. “Owati dai nofa dai sibarineni.” Deoso ati nebonane.

Yeso ati ai nofa ai manakone aba ai sibarani

¹⁰ I‑di Mose ati dai tokadaba ene Deoso ati somawamebona dai ati na, i‑di Mose ati nafi dai tokadabariya, Deoso ati somawamarebona, ati yawabisebona i‑di Mose‑ka yama hani ati nineni.

¹¹ I‑di Mose ati nafi ai tokadabaterani. Ai ene amosa hinama tohaterani. Hini ai ene Deoso ati somawamaterebonane. Yeso ati‑ya ai nofa, ai manakone aba‑ya Deoso aweya, ati somawamatene.

¹² Hibati‑ya Mose‑ya Deoso hiyare, “Tiwati nafi‑ya mai tokadaba, mai sibaraboneni. Ati mai hinofabise, ati nafi mai tokadabare, mai ababoneni.” Ati nematane.

¹³ Mai ihi amosara nafe, awa‑ya mai mai nawaanateni, mai ababonehe. “Awa‑ya mai waana, mai aba, mai‑ya Deoso yawatene.” Deoso‑ka yama hani ati neni. Yeso Kirisito ai ene towe‑ya kayafawahe, awa‑ya waane, abemarine. Ai manakone‑ya nanahababisemarine. Yeso Kirisito‑ya Deoso yawemari, ai‑ya yawarebonaha.

¹⁴ Abaraho‑ya Deoso kasomemarine. Yeso Kirisito ene Abaraho‑ya Deoso kasome‑nima Bara dai toha, Yeso ati dai nofiya, dai‑ya Deoso kasomaharibonane. Deoso‑ka Doni dai‑ya sawiwahebonane.

I‑di Abaraho‑ya Deoso hiyari bahi i‑di Mose‑ya hiyaramakine

¹⁵ Soho, owati dai mitahi. Yama ai kanika, manakone nafi abi awisariya, yama hani‑ya ai oni‑ya ai kanahano, makobote yama hani ati‑nima ai teni. Yama hani kote ai kanahanomakitera, ati kote ai nanahabateni.

¹⁶ Abaraho‑ya Deoso hiyare, “Tiwa okasomaboneni, tika nodi eyehe.” Deoso ati nemarine. Ati dai mitamatasaho. Abaraho‑ka nodi mai dami tamine‑ya hiyari awirane. Hika nodi ohari tamine‑ya hiyarabisemarine. Abaraho‑ka nodi i‑di Yeso Kirisito tohe, fare‑ya Deoso kasomebonane.

¹⁷ Abaraho‑ya Deoso hiyare, “Owati‑nima yama teboneni.” Deoso ati ne. Ati‑ya mai kanahanamaroni. Makobote amoni dameya, faha fowe 430 tohamakiya, Deoso Mose‑ya hiyare, “Mai ihi‑bone onofabone mai‑ya tikaminiyahi.” Ati ne. Mose‑ya hiyareya, Abaraho‑ya hiyaremata ati abarene. Ati‑nima yama teboneni.

¹⁸ Abaraho‑ya Deoso hiyare, “Owati‑ya tika mai nofiya, mai‑ya owati somawamiya, mai sibaraboneni.” Deoso ati nemarine. Hiniya Mose ati‑ya ai tokadaba, Deoso ai‑ya kasome‑mana, i‑di Abaraho‑ya Deoso keyehe‑ya hirine nane. Deoso keyehe‑ya hiritere, Abaraho hiyaremata ati‑nima yama naboneni.

¹⁹ Hini yamata ihi i‑di Mose‑ya Deoso hiyarati? Ai ene amosara ai wato, ai ene amosara manakone ai wato, ai nabone‑ya Mose‑ya Deoso hiyarane. Ati‑ya Mose kanahanomatane. Abaraho‑ka nodi i‑di Yeso Kirisito kobonebona‑ya nimanane. Kirisito koboni awisareya, Deoso ai‑ya hiyarebona, hika yo‑yose‑ya hiyare, ati‑ya hika yo‑yose i‑di Mose‑ya hiyaramakitase, ati‑ya i‑di Mose ai‑ya hiyaramakitasematane.

²⁰ Abaraho‑ya Deoso hiyare, hini ene‑bona tamine‑ya hiyarane. Mose‑ya Deoso‑ka yo‑yose mai hiyara, “Deoso ati dai tokadabeya, Deoso dai‑ya kasomebona, ati dai tokadabareya, dai‑ya kosinebonane.” Mai ati neni.

²¹ I‑di Abaraho‑ya Deoso hiyare, ati amosa, i‑di Mose‑ya Deoso hiyare, ati amosahari nane. Deoso ati abaterene. Mose ati ene ai manakone aba‑mani, ai‑ya Deoso ati somawame nane. Mose ai manakone‑ya nanahabaterene.

²² Mose ati ene ai nafi manakone wada ai wato teni. Makobote Yeso Kirisito ati‑ya mai nofa, mai manakone abateni.

²³ Hibati‑ya Yeso Kirisito koboni awisareya, Deoso ati ai tokadababone i‑di Mose kanahanomarine. Mose ati ai‑ya kasomebona, ai‑ya barikane, makobote Yeso kobone, ati ai nofeya, Mose ati ai‑ya barikanamare, Yeso‑ka ai tohawahani.

²⁴ Yama ai nabone, yama ai rabone i‑di Mose ai‑ya kanawato, Yeso Kirisito koboni awisareya, Mose ati ai‑ya barikanane. Yeso kobone, ai manakone‑ya nanahabe, Deoso ai‑ya ati somawamebonaha. Yeso ati ai nofiya, Yeso ati ene ai sibawarineni.

²⁵ Yeso Kirisito ati‑ya ai nofawaha, i‑di Mose ati ai‑ya barikanami awirene.

²⁶ Yeso ati dai no‑nofa Deoso bidi dai tohawahani, dai nafi.

²⁷ Yeso Kirisito ati dai nofa Yeso‑ka dai amani. Deoso‑ka Doni dai‑ya sawiwahane. Dai‑ya mai habanirisa, “Yeso‑ka dai amani.” Mai ati neni. Fara‑nima Deoso‑ka Doni dai‑ya sawi, “Yeso‑ka dai amani.” Ai atibodi‑ya Deoso‑ka Doni ati tene.

²⁸ Ai hinama tohawahineni. Yeso‑ka ai nafi tohawahani. Yodeo ai one toha, Bara ai one toha, ai one‑ya mai kanika, ai one‑ya mai kanikarihi mai namaroni. Maki mai toha, mai fanawi toha na, Yeso‑ka ai nafi tohawahineni. Yeso Kirisito ati ai nofa, ai hinama tohawahineni.

²⁹ Yeso Kirisito ati‑ya ai nofa Abaraho‑ka nodi ai tohawahani. Abaraho‑ka nodi mai‑ya Deoso kasomebona ati nemari, Deoso hini ati‑mari‑nima ai‑ya kasomaharibonane. Deoso‑ka ai toha, Deoso bidi ai toha, ai‑na, hika yama nafi ai kayafaboneni.