Karatiya 2 - Deoso-ka Yama Hani

Baoro ati‑ya Yeso‑ka yo‑yose mai nofa

¹ Faha fowe 14 tohamakiya, Deoso ati ene Yerosare‑ya okomakitasa, i‑di Banabe i‑di Tito mai fama, owa‑ya mai sawemaroni.

² Yerosare‑ya kobo·ona, Yeso ati‑ya mai no‑nofa mai webote‑ta mai‑ya ohiyarineni. Bara mai‑ya Deoso Ati Amosabote okamina, tamine mai‑ya ohiyarineni. Owatibodi yama‑ya dika, “Owati‑ya mai mitiya, owati‑ya mai nofaba awineni. Owa‑ya mai weenaba awineni. Owa‑ya mai one ati barinaba awineni.” Owatibodi ati namaroni. Webote mai‑ya ohiyara, “Bara mai‑ya Deoso Ati Amosabote okaminateni.” Onamaroni. “Sibarini, tiwa ene amosini. Bara mai‑ya Yeso tamine tikaminiyahi.” Mai ati namaroni.

³ Tito owa‑ya sawi, Yodeo tohi awirene, Kereko amane. Yodeo mai‑nima ni awirene, sowiri tati ataro wisinakosi awiremarine. “Sibarane.” Mai ati namaroni. Owa‑ya mai weeni awiramaroni.

⁴ Makobote Yodeo mai one mai kobona, Yeso‑ka mai toha‑mone mai ati na, Yeso‑ka mai tohi awiramaroni. I‑di Tito tamine‑ya mai mita, mai ati yawawahamaroni. Oda ati‑ya mai kamita, oda‑ya mai kakatomamaroni. Oda‑ya mai ati barinabone, oda‑ya mai hiyaramaroni. “I‑di Tito sowiri tati ataro abaho. Yeso‑ka ai tohabone, ai sowiri tati ataro abateboneni. I‑di Mose ati‑nima dai ni awiriya, Deoso‑ka dai tohateraboneni.” Mai ati namaroni. Ai yaditona‑nima ai‑ya mai nihebone mai ati amani. Keyehe‑ya ai‑ya mai hirikanaro, Yeso ati‑ya mai nofarani.

⁵ Deoso Ati Amosabote yokana dai watabone ona, mai ati oda tokadabi awiramaroni.

⁶ Yerosare‑ya mai wi‑wina Yeso ati‑ya mai no‑nofa mai‑ka webote owa‑ya mai weeni awirani. Owati‑nima mai ati namaroni. Ai‑ka webote mai‑mone mai ati na, hini ai owa mai amani. Deoso‑ka ai nafi toha, Deoso ai‑ya nofi nafitene.

⁷ Fa‑fai‑ya mai‑ka webote mai yorotokana, owati‑ya mai mita, mai ibi hiyara, “Hehe, i‑di Baoro‑ya Deoso yosemarine, Bara mai‑ya Yeso Ati Amosabote‑ya kaminebonaha. I‑di Bedoro‑ya Deoso yosenemarine, Yodeo mai‑ya Deoso Ati Amosabote‑ya kaminaharibonaha.” Mai ati namaroni.

⁸ Deoso ati ene Yodeo mai‑ya Yeso ati‑ya i‑di Bedoro kamine, Deoso ati ene Bara mai‑ya Yeso ati okaminahari oneni. Yeso Kirisito‑ka yo‑yose i‑di Bedoro amane. Yeso Kirisito‑ka yo‑yose‑hari ama·oni.

⁹ I‑di Tiyako, i‑di Bedoro, i‑di Yowaho mai na, webote mai‑mone, i‑di Banabe oda fama, oda ati‑ya mai mitamaroni. Oda ati‑ya mai mitiya, oda yehe‑ya mai waranamaroni. “Hehe, oda‑nima dai na, Bara mai‑ya Deoso Ati Amosabote‑ya dai kaminahi. Oda‑ta Yodeo mai‑ya Deoso Ati Amosabote oda kaminaboneni. Deoso dai‑ya kasomebonane.” Mai ati namaroni.

¹⁰ Mai ati one, “Yamata‑ya mai kihara, mai dai kasomiyahi.” Mai ati na. Fara mai ati‑nima oteni.

I‑di Bedoro‑ya Baoro weenawahe

¹¹ Atioki‑ya Bedoro kobonamaki, hini noko‑ya wee·onemarine, ene amosare ene.

¹² Atioki‑ya Bedoro koboni bahe, sibaremarine. Bara, Yeso ati‑ya mai no‑nofa mai eyehe i‑di Bedoro tafemarine. Yodeo mai‑nima mai ni awira, mai sowiri tati atori abi awira. Mai eyehe i‑di Bedoro tafemarine. Makobote i‑di Tiyako tabori‑ka Yodeo mai kamake, mai kobona, mai ati yanana, “Yeso ati‑ya mai nofabone, mai sowiri tati atori abahi.” Mai ati namaroni. Mai ati‑ya i‑di Bedoro mite, habo siitone, Bara mai eyehe tafami awiremarine.

¹³ Bedoro ene‑ya Yodeo mai one awa, mai habi siitona, Bara mai eyehe mai tafami awirani. I‑di Banabe ne hibati‑ya Bara mai eyehe tafe, Bara mai eyehe tafamarene.

¹⁴ I‑di Bedoro, Banabe mai fama mai ihi amosara, Deoso Ati Amosabote ati‑nima mai namara, i‑di Bedoro wee·owahani, mai dama owati‑ya mai mita, “Bedoro, Yodeo amatini. Yeso tinofawahamaro, Yodeo mai‑nima tini awira. Bara Yeso ati‑ya mai nofawaha, hini yama‑bone Yodeo mai‑nima mai nabone mai mai hina? Yodeo mai‑nima mai ni awiraboneni.

¹⁵ Ai wada, Yodeo ai toha, Bara ai tohi awirani, yama ai watoneni.

¹⁶ Bedoro, I‑di Mose ati‑ta ai ati tokadaba, Deoso ai‑ya ati somawamaterene. Yama tiwatoneni. Yeso Kirisito ai manakone‑ya nanahabe, ai‑ya hiyare, ‘Owa ene‑ta Deoso dai‑ya ati somawamebonane. Owati dai nofa, dai sibaraboneni. Deoso dai‑ya ati somawamebonane.’ Yeso ati nemarine. I‑di Mose ati nafi ai tokadabaterani. Mose ati ene Deoso ai‑ya ati somawamare. Fare Yeso ai manakone‑ya nanahabe, Yeso ati ai nofiya, Deoso ai‑ya ati somawamebonane.” Onamaroni, Bedoro‑ya ohiyararo.

¹⁷ Yeso ati‑ya ai no‑nofa Deoso ai‑ya ati somawamare‑mana, Yeso keyehe‑ya hirine nane. Keyehe‑ya Yeso hiriterene.

¹⁸ Mose ati ai tokadababone, Deoso tabaro‑ya ai kobonabonehe ai ati namaroni. Makobote Yeso ai manakone‑ya nanahabe tamine ai mita, Yeso ai nofawaha, makobote Mose ati ene Deoso tabaro‑ya ai kobonabone ai ati na‑mani, towe ai tohamatasa neni.

¹⁹ Mose ati‑nima onabone onamaro, Mose ati nafi okadabara, hini owa ene o·ababoneni. Hibati‑ya Deoso owa‑ya awe, o·aba‑nima onamaroni. Yeso abe, owa manakone‑ya nanahabe, Yeso ene okitamawahani. Deoso ati‑ya noko·onibisaboneni.

²⁰ Yeso abe, owa manakone‑ya nanahabemarine. Yeso abeya, Yeso eyehe o·aba‑nima onamaroni. Owa abano abara, hini owatibodi bote‑ta aba‑nima nineni. Yeso kitame, owatibodi yati‑ya winane. Owatibodi‑ya wine, Yeso ene‑nima owa ene nawahani. Deoso Bidi owa‑ya nofe, owa manakone‑ya nanahabe, ati onofe, ati‑nima owahani.

²¹ I‑di Mose ati nafi ai tokadabara, ai manakone tohani. Hini ai ene ai manakone ai nanahaba‑mani, Yeso abare nane. Ai manakone ai nanahabaterani. Yeso Kirisito abare‑mana, Deoso ai‑ya ati somawamare nane. Deoso tabaro‑ya ai winara neni.