Firimo 1 - Deoso-ka Yama Hani

¹ Baoro ama·oni. Yeso Kirisito ati okamina, kadeya‑ya owa‑ya mai nawaani. Ai‑ka soho i‑di Timoti oda fama, yama hani oda kanahanoneni. Firimo, tika yama hani‑bone okanahanaboneni. Oka owa amatini. Deoso‑ka yama‑ya anititeni.

² Ai‑ka adi i‑di Afiya‑ka yama hani‑bone toha, i‑di Arakibo‑ka yama hani‑bone toha, tiwa tabaro‑ya mai yorotokana, Deoso‑ya mai hiyarabone, mai‑ka yama hani‑bone toha nineni.

³ Ai‑ka Abi i‑di Deoso, ai‑ka Ayo i‑di Yeso Kirisito ne dai‑ya mai kasoma, dai atibodi dai‑ya somateni.

⁴ Firimo, Deoso‑ya ohiyara, tiwa tamine okamina, tiwa ene ya‑yai·oneni.

⁵ Yeso Kirisito ati tinofi nafe, Deoso‑ka mai tinofamone, tiwa tamine omita ya‑yai·oneni.

⁶ “Ayo Kirisito, tiwati‑ya Firimo kaminayaho. Tikasomeya, tiwa‑ya wato ba‑basi nebonane. Tiwa ene‑ya mai one awiya, tiwa‑ya mai kahiyaraboneni.” Oteni.

⁷ Deoso‑ka mai tinofa, mai‑ya tikasomamone, mai atibodi ya‑yainawahamoneni. Soho, tiwa ene ya‑yai·onaharineni.

Onesimo tamine‑ya Baoro kanahanone

⁸ Yeso‑ka mai tikasomamone, owa tikasomahareba awineni. Yeso‑ka yo‑yose ama·oni. Tiwa oyose‑mani, sibara neni.

⁹ Tiwa oyose awiraboneni. Tiwa onofi nafe, hiniya tiwa haa·onaboneni. Bote ama·oni. Yeso ati okamine ene kadeya‑ya owa‑ya mai nawaamaroni.

¹⁰ I‑di Onesimo tikanikemona tamine timitiyahi. Oka dao owa‑nima Onesimo nawawahane. Kadeya‑ya owaa, Yeso Kirisito Ati Amosabote‑ya i‑di Onesimo‑ya okamina, Yeso ati‑ya Onesimo nofawahe, fare oka dao tohawahene.

¹¹ Hibati‑ya tiwa tabaro‑ya i‑di Onesimo wine ene amosaremona, hibayata Yeso ati‑ya Onesimo nofawahe ene amosawahene. Owa‑ya kasomi‑nima tiwa‑ya kasomaharibonane. Ene tiawawahebonane.

¹² I‑di Onesimo tiwa tabaro‑ya oyosemeya, owatibodi foyasa nineni.

¹³ Yeso ati okamine ene owa‑ya mai yaditona, owa‑ya i‑di Onesimo kasomane. Owa‑ya i‑di Onesimo ite‑mana, owa‑ya kasomatase nane. “Firimo, ahiyata‑ya tiwina‑mani, owa‑ya tikasoma neni.” Owatibodi ati nineni. Yama yaki‑ya tiwina ihi, owa‑ya tikasomarani. Tiwati omita‑mani, tiwati amosiya, i‑di Onesimo owa‑ya kasomamataseya, sibare nane.

¹⁴ Tiwati omitara, tiwa tabaro‑ya Onesimo oyosematasineni. Owa‑ya tiwati kasomamone owatibodi ati na, hiniya tiwati omitara, owa‑ya i‑di Onesimo iti awirebona, tiwa‑ya oyosematasane.

¹⁵ Tiwa tabaro‑ya Onesimo wine, kananemona, tiwa tabaro‑ya kobotonameya, wini ohariwaheba awane. Tika yama‑ya anini ohariba awane.

¹⁶ Hibati‑ya tikanike, hibayata tika soho tohawahane. Deoso bidi dai fama, fare tika soho tohawaha nane. Onesimo‑ya owatibodi foya, tinofaharibona owatibodi ati nineni. Onesimo‑ya tiyosemaya, tika soho‑nima tiyosenawahi.

¹⁷ Tika owa ama·oni. Tiwa tabaro‑ya kobo·ona‑mani, ya‑yaitina neni owatibodi ati nineni. Fara‑nima tiwa tabaro‑ya i‑di Onesimo koboneya, ya‑yaitinahi.

¹⁸ Tika yama i‑di Onesimo botinemata awane, hibotiya, manakone nafi tiwa‑ya onahababone, fara tikanahanohi, tiwa‑ya manakone daa·onabonehe.

¹⁹ Baoro ama·oni. Owa yehe‑ya yama okanahana, i‑di Onesimo‑ka yama manakone bote onahababoneni. Tiwa okasomamaro, tiwati kadamo awirini. Yeso tamine tiwa‑ya okaminamaroni. Yeso tamine tiwa‑ya okaminara‑mani, Yeso ati tinofara neni. Tiwa okasomamaro, yama manakone haa·oteraboneni.

²⁰ I‑di Onesimo tiwa tabaro‑ya koboneya, haa‑nima tiwa ene nabone owatibodi ati nofani. Deoso tiwa‑ya kasome‑nima i‑di Onesimo tikasoma, ya‑yai·onaboneni.

²¹ Onesimo‑ya tikasomabone owatibodi ati na, tika yama hani‑bone okanahanowahani. Owati‑ya fiyatikanabone owatibodi ati nineni.

²² Hehe, owa nimatimatahi. Tiwa tabaro‑ya owati tokani. Deoso‑ya owa tamine tihiyarahi. “Abi Deoso, Baoro‑ya mai seekanahi.” Tinahi. Owa‑ya mai seekanaba awineni.

²³ Yeso Kirisito ati‑ya Ebafarasi kamine ene kadeya‑ya foyahari, dai‑ya ati foyahari nane.

²⁴ I‑di Maroko, i‑di Aritako, i‑di Dema, i‑di Roka mai na, owa‑ya mai sa‑sawi, dai‑ya mai ati foyanamoneni.

²⁵ Yeso Kirisito ai‑ka Hidi ohiyariya, tiwa tamine ohiyarateni. “Yeso, Firimo mai tikasomahi.” Oteni.