Ebereo 11 - Deoso-ka Yama Hani

Deoso ati‑ya mai no‑nofa mai‑nima ai nahi

¹ Deoso ati ai nofa, haa‑nima ai atibodi ati na, “Deoso ati‑nima yama nabone, hibayata yama oawara, sibarini. Ati‑nima yama naboneni.” Ai atibodi ati teni.

² Fara haa‑nima hibati‑ka mai atibodi ati na, Deoso mai‑ya kahiyarematane.

³ Hibati‑ya yama nafi‑ya Deoso wamanemata oda awara, Deoso ati oda mite, ati oda nofe, oda atibodi yama‑ya watowaha, “Deoso yama nafi‑ya wamane, yama ai awi awiriya, yama nafi‑ya wamanematane.” Ai atibodi ati teni.

⁴ Hibati‑ya Deoso ati‑ya i‑di Abeo nofe, Deoso ati‑nima bani‑ya daane, i‑di Abeo ene‑ya Deoso nofe, “I‑di Abeo ene amosane.” Deoso ati nematane. I‑di Kaina Deoso ati‑nima yama‑ya daani awire, ene‑ya Deoso nofarematane. I‑di Abeo abemata ene tamine ai hiyaranasa nineni.

⁵ Deoso ati‑ya i‑di Enoki nofe, atibodi ati, “Deoso ati okadabi ohareboneni.” Atibodi ati nemata, hini atibodi ati‑nima ne. Abare, hiniya Deoso hiwakamematane, neme‑ya. Mai sibahine, mai hiwasire, neme‑ya Enoki toki awisareya, tamine mai hiyare, “Enoki ene Deoso ya‑yainane.” Mai ati nameteni.

⁶ Deoso ati‑ya mai nofara Deoso‑ya mai ya‑yaini terani. Deoso‑ya ai hiyarabone ai atibodi ai‑ya hiyara, “Deoso tohe ati onofe, owa‑ya kasomebonane.” Ai atibodi ati teni.

⁷ Hibati‑ya faha kaki awiriya, Nowe‑ya Deoso hiyare, “Nowe, faha kakeboneni. Kanawa wamatinahi.” Deoso ati ne, Deoso ati‑ya Nowe nofe, “Deoso ati okadababoneni. Kanawa wama·onaboneni, oka mai hasinabonehe.” Nowe atibodi ati ne. Nowe ene hika mai one hasi, mai one nafi aba na, “Nowe owati‑ya nofe, ene amose, atibodi onamosebonane.” Deoso ati nematane.

⁸ Abaraho‑ya Deoso hiyare, ati‑ya i‑di Abaraho nofe, “Abaraho, tabora bara‑ya tikahi. Tabora tiwa‑ya daa·onabone, yofi·okanaboneni.” Deoso ati nematane. Deoso ati‑ya Abaraho atibodi nofe, toke, “Deoso ati okadababoneni. Tabora iti oawara‑ya Deoso owa‑ya yofikanebona, owa‑ya daahinaboneni.” Abaraho atibodi ati nematane.

⁹ Tabora‑ya kobone, tabora‑ya kayafi awisare, hiniya yobe bani ataro wamani tohe‑ya wine, fare‑nima bidi i‑di Isaki hika nodi i‑di Yako mai na bani ataro wamani‑ya mai wina, Bara mai tabori tohasa na‑ya mai winameteni.

¹⁰ “Deoso tabaro‑ya kobo·oniya, oka yobe‑bona‑ya Deoso wamaneya, owa‑ya yobe‑ya daanebonane.” Abaraho atibodi ati nematane.

¹¹ Deoso ati‑ya Sara nofa, “Bote oha, sibarini. Oka dao tohebona Deoso ati ne, ati‑nima nebonane.” Sara atibodi ati na, bote tohiya, Deoso hikasoma, naba toha, bidi wadawahematane.

¹² Abaraho bote tohe, abi yanatoneya, bidi tohawahe, hibayata hika nodi mai damawaha, amowa mai dama‑nima hika nodi mai nihi, siki faha webote‑ka boni dama‑nima hika nodi mai nihi na, mai damawahani.

¹³ Mai tamine okanahana, mai abiya, Deoso ati‑nima yama nabone, nafi‑ya mai awi awisara, mai aba, Deoso ati‑ya mai atibodi nofasa na, “Deoso ati‑nima yama naboneni. A‑ahi‑ya oda tabaro yokana awirani. Neme‑ya oda tabaro yokana‑bone tohabisani.” Mai atibodi ati nameteni.

¹⁴ Mai atibodi ati‑mete‑nima mai one atibodi ati toha, mai tabori yokanabone‑ya mai sibanasa nineni.

¹⁵ Mai tabori bote‑ya mai nokotoni awirameteni. Mai tabori bote‑ya mai nokotonihe‑mani, mai tabori bote‑ya mai tokomatasa nemeteni.

¹⁶ Neme‑ka tabora‑ya mai nokotonihe. “Neme‑ya oda tabaro amosabisaboneni.” Mai atibodi ati na. Fara mai tabori‑bone‑ya Deoso neme‑ya wamane. “Oka mai amani.” Ati tene.

¹⁷ I‑di Isaki yetene toheya, Abaraho‑ya Deoso haane, “Abaraho, tika dao yokana ohari owa‑ya daatiyaho.” Deoso ati ne, Deoso ati‑ya Abaraho atibodi nofi nafi, fare Deoso‑ya Isaki‑ya daani yanatonane.

¹⁸ Hibati‑ya Deoso ati‑ya Abaraho mite, “Abaraho, Isaki‑ka nodi mai dama, fara tika nodi mai toha, mai damateboneni.” Deoso ati nematane.

¹⁹ Abaraho atibodi ati, “I‑di Isaki‑ka nodi mai damabone Deoso ati ne, fare hika nodi mai damaboneni. Isaki abeya, Deoso hinakitamebonane.” Abaraho atibodi ati ne, I‑di Abaraho atibodi‑ya i‑di Isaki abi hawa tohe‑nima ne. “Deoso ati ene Isaki abe, kitame‑nima nawahene.” Abaraho atibodi ati nawahematane.

²⁰ Deoso ati‑ya Isaki atibodi nofe ene bidi i‑di Yako i‑di Esa mai fama mai‑ya hiyare, “Deoso dai‑ya kasomebona ati ne, dai‑ya kasomebonane.” Isaki ati nematane.

²¹ Deoso ati‑ya i‑di Yako nofemari, bote tohe, abi yanatoneya, bidi i‑di Yose bidi mai fama mai‑ya hiyare, “Deoso dai‑ya kasomebona ati ne, dai‑ya kasomebonane.” I‑di Yako ati ne. I‑di Yako hika awa‑ya damane wai, moinise‑ya Deoso‑ya kahiyarematane.

²² Deoso ati‑ya i‑di Yose nofe, abebona, hini tamine‑ya hika mai‑ya hiyare, “Owa tabaro bote‑ya dai tokomiya, owa tone dai towakamiyahi. Ai tabaro bote‑ya owa tone dai kamiyahi.” I‑di Yose ati nematane.

²³ Makobote Yose abe nowati‑ya Eyito mai‑ka hidi Isara·eo‑ke mai‑ya nofamare, hika mai‑ya hiyare, “Isara·eo‑ka madehe makidi wadiya, faha‑ya mai dai korotofihi mai ababonehe.” Ati ne. Mose badi, madi, mai na Deoso ati‑ya mai nofi nafe, mai‑ka ewe wade amose‑ya mai awa, mai‑ka ewe‑ya mai kema, mai ati yanana, “Oka dao‑ya Deoso kasomeya, Eyito mai‑ka hidi ati‑nima oda ni awiraboneni.” Mai ati na, i‑di Mose‑ya mai kemobisa, hidi ati ene mai habi siitora, abariko 3 tohe‑ya mai‑ka yobe‑ya Mose‑ya mai kemomi awira, faha widi‑ya Mose‑ya mai kana·itafemeteni.

²⁴ Mose hawa tohe, Deoso ati‑ya nofe, atibodi ati, “Fara·o‑ka nodi ohara, Deoso‑ka ama·oni.

²⁵ Fara·o‑ka nodi ama·oni oniya, owa‑ya mai kasomi ba‑basi niya, owa ya‑yaini bide toha, makobote Deoso ene owa ya‑yaini fawanaboneni. Deoso‑ka ama·oni oniya, hibayata owa‑ya mai kakoya, makobote Deoso ene owa ya‑yaini fawaraboneni.

²⁶ Kirisito ati okadaba, owa manakone ba‑basi, Fara·o ati okadabiya, owa manakone bi‑bidi nibisaboneni. Kirisito ati okadababoneni.” Mose atibodi ati nematane.

²⁷ Deoso ati‑ya i‑di Mose nofe, Eyito‑ya winemata, tabora bara‑ya tokawahe. Atibodi ati, “Eyito mai‑ka hidi owa‑ya kako, yama sibaraboneni. Owa habo siitoraboneni. Hibayata Kirisito oawara makobote oawebona, owa manakone amosa‑ya daanebonane.” Atibodi ati nematane.

²⁸ Makobote Deoso mai‑ya kakariwahebona, Deoso ati‑ya i‑di Mose tokadabe, “Nokobi‑kaya bani emene dai nawaanahi. Dai‑ka madehe daidi abarabonehe.” Deoso ati nematane. Deoso‑ka yo‑yose i‑di Mose‑ka mai‑ya fiyakane, Eyito‑ka mai‑ka madehe daidi‑ya nanahabematane.

²⁹ Deoso ati‑ya Isara·eo‑ka mai nofa, faha webote bai‑ya mai berenawaha, faha bai‑ya hawi tokoma, hokore‑ya mai yakana, mai nowati‑ya Eyito‑ka mai kamake, mai berenawahamakebone mai abameteni, faha ihi.

³⁰ Deoso ati‑ya mai no‑nofa Yeriko‑ya mai kobona, Yeriko‑ka yati wamani awayara‑nima na, nemehe barikana, mahi 7 kane‑ya bari‑kaya mai daya, Deoso ati‑ya mai tokadaba, Deoso ene awayara yati wamani toha, nemehe bakatonameteni.

³¹ I‑di Habi hibati‑ya mai makidi dami‑ya dakoramete, makobote Deoso ati‑ya nofawaha, Isara·eo‑ka mai kobona, Yeriko‑ka mai kiti‑ya mai awabone, Deoso ati‑ya Habi nofa ihi mai‑ya kema, mai‑ya kasoma, Habi‑ya Deoso kasomamakitase, Yeriko‑ya mai wi‑wina mai aba, Habi hika mai eyehe‑ta hasinameteni, Deoso mai hikasomaro.

³² Hini yamata‑nima obati? Deoso ati‑ya mai no‑nofa mai dama mai nafi tamine okanahano awiraboneni. I‑di Kideyaho, i‑di Baraki, i‑di Sanisaho, i‑di Yefete, i‑di Dafi, i‑di Samo·eo, mai na, Deoso ati‑ya mai mi‑mita‑mete mai dama, mai tamine okanahanoraboneni.

³³ Deoso ati‑ya mai no‑nofa Deoso mai‑ya kasome ene bara mai‑ka tabora‑ya mai kayafawaha, mai ihi amosa, mai‑ya mai kasoma, mai ihi amosara, mai‑ya mai bisi na, Deoso mai‑ya kasomebona ati ne, mai‑ya kasome, Deoso ati ene iriyaho mai hamarameteni.

³⁴ Deoso ati‑ya mai no‑nofa mai one‑ya mai yaditona, yama hirini‑ya mai‑ya mai korotowitineni, mai ababonehe. Mai abara mai‑ka mado‑ta hatibisameteni. Yima‑ya mai one mai mai hinahaba hinabone, Deoso ene mai hinahabarameteni. Hibati‑ya mai kitara, mai‑ya bara mai bisinabone mai ati na, Deoso ene mai kitawaha, mai ihi bara mai‑ta mai kananawahameteni.

³⁵ Mai fanawi one Deoso ati‑ya nofa, mai‑ka madehe aba, kitamameteni. Ai owa‑ya mai hiyara, “Deoso ati tinofa tiwa bisi, tiwa onahaba onaboneni. Deoso ati tinofarabone tiniya, tiwa bisi·orihi, tiwa onahabarihi onaboneni.” Ai owa‑ya mai hiyara mai ati nameteni. “Sibaraboneni. Deoso ati onofa, owa‑ya tiwati bisiniya, owa bisi, owa‑ya tiwati nanahabiya, owa tinahaba tinahi. O·abiya, Deoso owa‑ya nakitamebona, o·abamaraboneni. Deoso ati onofe, ati nofi fawa·oraboneni.” Ai owa ati nematane.

³⁶ Ai one Deoso ati‑ya mai nofa mai‑ya mai kaka, mai‑ya mai wee, mai‑ya mai bisi, koheti‑ya mai‑ya mai soki, kadeya‑ya mai‑ya mai nafoya nameteni.

³⁷ Mai one Deoso ati‑ya mai nofa, yati‑ya mai baana, mai aba, mai one‑ya sehoti‑ya mai mai wisina, mai aba, mai one yima‑ya mai tiihina, mai aba nameteni. Mai one yakana bora amosa‑ya kihara, bani ataro‑ya mai sakonibisa, yama‑ya mai one kihara, mai‑ya mai bisina, mai abamakebone, mai‑ya mai siba nameteni.

³⁸ Mai yowi‑ya mai yakana, mai amosi‑ya mai amosi fiyakana, mai‑ya mai nanahababone, tabora awiri‑kaya mai yakana, adami‑kaya mai one wina, wami hodi‑ya mai one wina nameteni.

³⁹ Mai atibodi ati‑ya Deoso wato, mai‑ya kahiyare, Deoso ati nafi‑nima yama na‑ya mai kayafi awisarameteni.

⁴⁰ Deoso yama nafi‑ya wato, mai‑ya kasome, ai‑ya kasomahari, neme‑ya ai koboniya, mai eyehe ai winiya, yama amosa hinama tohaboneni.