Ike̱ng a ta tonong aYohana 8 - Izere New Testament

Kudun kufe kanataar

¹ Nizen Aturuk'e ta bisik kudun kufe kanataar ne kaza te win kyo̱ndi ribir awa azining.

² Iyong mi di ámaleka kanataar ame á ta nyeseng nasho̱o̱n Adakunom, a tá ka no̱o̱k ba agba kanataar.

³ Amaleka akak, a tá be kures a tá nye be izinariya be̱ nong a tá nyeseng'e nasho̱o̱n abagadi'me. A tú ku no̱o̱k ike̱re̱ iko̱o̱n itek dide̱ng kaye̱e̱r kures ame nong a tin nye asidaka nong a tin gung be aduwa ázhe̱l'e cice̱r natoon a abagadi izinariya ame ta se nasho̱o̱n itsik rigwo̱m.

⁴ Iyong itsing ike̱re̱ iko̱o̱n itek ame mak be aduwa ázhe̱l'e dorok nubo̱k amaleka'me nong i tá ngarak naza nufe Adakunom.

⁵ Ayong amaleka'me sok kures aturari ame, a tin shining be kuro̱ng natoon abagadi ame nong a tá misik nazatse. Ne akparam tar ne karo̱ nye berep be akanang kyo̱ndi iza ta tarang karo̱ ne kaben zuur gip.

Agba kanataar

⁶ Iyong ámaleka kanataar ame nye kanye̱k nong á ta fe̱se̱m agba'me.

⁷ Nizen amaleka afe ime̱se̱ng'e tá fe̱e̱p rigba rifu ne rikarang be kuro̱ng ku tin kare̱ be naso̱k kpas nazatse. Kuro̱ng'e ya kukyes kuzining kaye̱e̱r itaar ife kazatse, anong ne nakon be agam ashirim kuro̱ng'e ya cei.

⁸ Nizen amaleka afe afa tá fe̱e̱p rigba rifu, yong a barak ike̱ng ikak kyo̱ndi agbang rifan riya kuro̱ng tan yiir ku se kpa kaye̱e̱r ashi. Abas azining kaye̱e̱r ataar afe agbang kudung wor ku te naso̱k.

⁹ Anong ne abas azining kaye̱e̱r ataar afe koakye ike̱ng i ta be kutser kaye̱e̱r ashi ame kus. Ne abas azining kaye̱e̱r ataar afe akpara ashi ame beseng cei.

¹⁰ Amaleka afe ataar fe̱e̱p rigba rifu, yong agbang adar akak a ta se kanang kyo̱ndi kuro̱ng natoon kaza tikpa kaye̱e̱r abas azining kaye̱e̱r ataar afe agbang adung be itop ashi.

¹¹ Riyerek adar'e nye “Kurereng.” Abas azining kaye̱e̱r ataar afe ashi'me rereng. Ánerawe whe̱re̱ aya a ta so̱ ashi'me kus kamok kurereng'e.

¹² Amaleka afe anaas fe̱e̱p rigba rifu, ne abas azining kaye̱e̱r ataar afe kunom te whi, anong ne kufe̱n ne ádar te whi gip. Abas azining kaye̱e̱r ataar afe kuwoso se whi anong ne katuk te dar kufe̱n.

¹³ Mi tá fa ye̱re̱k ne mi fok akim akak a ta tseng natoon kaza ta tos be agap ye, “Wa tsek, wa tsek, wa be áner á ta sor nazatse, nizen iya ribir ámaleka ataar tana fe̱se̱m agba baꞌ.”