Ike̱ng a ta tonong aYohana 7 - Izere New Testament

Ánerawe a ta ka tse̱k ba izizo̱ Adakunom

¹ Nama ike̱re̱ iyong, ne mi di ámaleka anaas á tan nyeseng nikes kazatse inaas, á ta te̱ne̱ng kuwun iri naas fan i bu fe̱e̱p kaben ka ashi ka koakye kuri kakon.

² Ne mi di amaleka akak tá wuruk nabas kuwuruk kunom be izizo̱ kukyem Adakunom afe kutser nubo̱k wu. Ayong a ta kuto̱ be agap a tá ka no̱o̱k ba kukyem nong a ta beseng kaben be agbang isho̱ng.

³ A fe̱ be ba ye, “Sang tu beseng yin iben ka ashi ka nakon baꞌ, ma yir ti tse̱k yir izizo̱ nati ásam Adakunom nizham.”

⁴ Ne mi fok ye áner aya a tú ku tse̱k ba izizo̱'me, se áner izungu kuso̱k inyak be iso̱k inaas be anaas kaye̱e̱r nazu áner Isarela kuso̱k be afa.

⁵ Áner izo̱ro̱k aYahuda se 12,000. Ne áfe izo̱ro̱k aRuben se 12,000. Áfe izo̱ro̱k aGad se 12,000.

⁶ Áner Asher se 12,000 ne áfe aNaptali se 12,000. Aner aManasa se 12,000.

⁷ Áner aSimiyon se 12,000 ne áner aLawi se 12,000. Aner Isaka se 12,000.

⁸ Áner aZebulun se 12,000 ne áner aYusufu 12,000. Aner izo̱ro̱k aBanyami se 12,000.

Agbang kanyim ázhe̱l'e kaye̱e̱r kaza

⁹ Nama anong, mi tá fa ye̱re̱k ne mi di rigwo̱m ánerawe whe̱re̱ riya sang akak tana kyem a fa baꞌ. Ánerawe'me nes kaye̱e̱r koakye kaben, ne kaye̱e̱r koakye irem be koakye kuri áner ne koakye izere, an nyeseng nasho̱o̱n itsik rigwo̱m ame nasho̱o̱n Aturuk'e. Á tes akpiin akan be afumung atarkai nibo̱k ba.

¹⁰ Á tasak be agap ne á fe̱ ye, “Kashesh nye kafe Adakunom yir, wu aya a ta sonong natoon itsik rigwo̱m. Kashesh nye kafe Aturuk'e.”

¹¹ Ámaleka cice̱r nyeseng a ta gorok itsik rigwo̱m'e be áko̱k kasho̱o̱n ame ne ikewum inaas ame nong á ta kpas kaben nasho̱o̱n itsik rigwo̱m'e á ta ya Adakunom iben,

¹² ne á fe̱ ye, “Anong, kuyiik be nakerek be kukyem be riye̱ rikan be rigwo̱m be agap ne ritek nye rife Adakunom yir ma izen izen, Anong.”

¹³ Ayong asho̱n'e akak kaye̱e̱r ba ti rip ye, “Ángan na be ares akan na e̱? Á wuruk ake̱ e̱?”

¹⁴ Iyong mi fe̱ be wu ye, “Atekasa, wan ren.” Ayong a fe̱ ye, “Áner na ne á nye áner aya a tá wuruk na amaan risam án kusu ares ba be naso̱k Aturuk'e á ta te akan pes.”

¹⁵ Kamok anong, “ba sor nasho̱o̱n itsik rigwo̱m Adakunom ne á ku ya iben katuk be kunom nagbang karo̱ ku kuya iben. Aner a ta sonong ni itsik rigwo̱m'e ta tarak ikpaar wu natoon ba koakye izen.

¹⁶ Á tà ba fok izong baꞌ, á tà fok kuto̱ kukoor baꞌ, á tà fok kuzhoosh kunom ka kuzhoosh ike̱ng ikak baꞌ.

¹⁷ Kamok Aturuk a ta se natoon itsik rigwo̱m'e tà te afek ba. A tà tseng be ba naro̱ itop ashi kutser tù ku wuruk. Adakunom tà ka re̱ng ba nanyisi nanyisi ba cei.”