Ike̱ng a ta tonong aYohana 6 - Izere New Testament

Aturuk'e bisik Idun ame

¹ Mi di Aturuk'e ta sen bisik kudun'e kufe ime̱se̱ng'e kaye̱e̱r idun kanataar ame. Ne mi fok ikewum ikak izining kaye̱e̱r inaas ife kutser ame tá yis be agbang kuto̱ kyo̱ndi akparam ye, “Be̱.”

² Mi ye̱re̱k ne mi di itsaap ikan. Aner aya a tin ngarak natoon itsaap'e be ka ta nubo̱k wu, a mu ku te ribong rigwo̱m. Ayong a kpaan itsi ni itsaap'e kyo̱ndi aner aya a ta tseng a be ni iya ákak ni itsom.

³ Nizen aturuk'e ta fa bisik kudun kufe afa ne mi fok ike̱ng ife afa tá fe̱ ye, “Be̱.”

⁴ Iyong itsaap ikak bun i wuruk iseng zhau. A no̱o̱k aner aya a tá min ngarak ni itsaap'e kukyem nong a tá sok kusor caang kazatse ne a sak ánerawe ta naka fe̱s. A bun a tú no̱o̱k awe̱n itsor.

⁵ Nizen iya Aturuk'e ta bisik kudun'e kufe ataar ne mi fok ike̱ng'e ife ataar ta fe̱ ye, “Be̱.” Ne mi di itsaap iwe nasho̱o̱n mi. Aner aya a tin ngarak ni itsaap'e be ike̱ng ifa a tin maas kugaar ike̱re̱ nubo̱k wu.

⁶ Ne mi fok ike̱ng ikak kyo̱ndi kuto̱ kukak natite ike̱re̱ ame ku tá fe̱ ye, “Amudu ikpe naya a ta yis ye alikama se kyo̱ndi ishorong kuwoso alebura, amudu ataar afe ikpe naya a ta yis ye abale se kyo̱ndi ishorong kuwoso alebura. Amma tu beseng name nafar'e ka ashi anap'e baꞌ.”

⁷ Nizen Aturuk'e tá bisik kudun kufe anaas'e ne mi fok kuto̱ ikewum ife anaas'e tá fe̱ be mi ye, “Be̱!”

⁸ Mi tá fa ye̱re̱k ne mi di itsaap ikak i ta se kyo̱ndi ashi aruron nasho̱o̱n mi. Riyerek aner aya a tin ngarak natoon itsaap'e nye Riku, karo̱ nabik áya a tan kus tu ku sor tsang ka ku kuus nama. Á tú no̱o̱k ba kukyem a tanin fe̱s ikes azining kaye̱e̱r ikes anaas ife kazatse be itsor ne izong be iro̱k ne ámaan kukewum.

⁹ Nizen iya Aturuk'e ta bisik kudun'e kufe atoon ne mi di nabik ánerawe áfe a tá ka fe̱s ba kamok a tá kuus rife̱ Adakunom be kuno̱o̱k katsak ba, nabik'e se kaben naro̱ a tú ku nye asidaka.

¹⁰ Ne a tang kuto̱ be agap ye, “Agwo̱m Ágwo̱m, Atek kaza be kaben, azhe̱l'e, afe katsak, ma nizen inyaka ne wan ta to̱ kazatse amok ne i ku karang ike̱ng iya a tin nye yir e̱?”

¹¹ Ayong a no̱o̱k koangan ba awe̱n kukpiin kukan, ne a fe̱ be ba ye á ra tor cie̱k gak ma izen iya a tana fe̱s ásam Adakunom áfudang ba be áronyining ba kyo̱ndi a tá ka fe̱s ba a gang.

¹² Aturuk'e ta fa bisik kudun'e kufe igataar ne kazatse wor ka zuur be agap. Kunom wor ku te whi kyo̱ndi kukpiin kuwe kuya a ta nye be nakuyo̱ng izha iwe. Kufe̱n cice̱r ku te kuseng zhau kyo̱ndi naso̱k.

¹³ Adar kpas kaben kyo̱ndi kutes atafo kuya kuwun ta suruk kaben.

¹⁴ Ne kaza kunung kyo̱ndi á ta kunung kukpa izibir ne nawhanang be á gang dorok a ta wosong naro̱ kusor ba.

¹⁵ Iyong ágwo̱m kazatse ne áritek be agbang ásozha, be árum ne áfe agap be ásam ne áya sang á ta nye ásam baꞌ cei, ta ne̱re̱ng kaye̱e̱r atas be nawhanang.

¹⁶ Á tá tasak á tá fe̱ be nawhanang be ata ame ye, “Ni kpas yin natoon yir nong tin te̱ne̱ng yir nanyisi aner a tan sonong natoon itsik rigwo̱m ne kubeseng riye̱ Aturuk'e.

¹⁷ Kamok agbang kunom riye̱ kubeseng ba m be̱, angan ne a ta kyem'me e̱?”