Ike̱ng a ta tonong aYohana 4 - Izere New Testament

Kuya Adakunom Iben kaye̱e̱r kaza

¹ Nama anong, nasho̱o̱n mi, mi bun i di kanukutu kakak nukarak kaye̱e̱r kaza. Ne mi bun i fok kuto̱ kuya mi ta tsang i fok ni ime̱se̱ng'e kyo̱ndi rigba ame ye, “Ngarak aze, mi tà ka tonong ike̱re̱ a tana nye dim nama iyu.”

² Nizen izining, Kabik ti tiik natoon mi ne mi di itsik rigwo̱m nasho̱o̱n mi be aner akak a ta min sonong natoon'e.

³ Aner'e gye̱se̱m kyo̱ndi iwe̱re̱ng ikak a ta yis ye aZhaspa ne aKaneliya. Itsereng i ta gorok karo̱ kusonong'e gye̱se̱m kyo̱ndi kuta kukak a ta yis ye aEmeral.

⁴ Ítsik rigwo̱m íkak iso̱k ifa be anaas gorok itsik rigwo̱m'e, be áko̱k kasho̱o̱n iso̱k ifa be anaas á tan sosok natoon ítsik rigwo̱m'e. áko̱k kasho̱o̱n'e n tes ares akan be abong izinariya.

⁵ Itsik rigwo̱m i ta se natite'me yiir berep kyo̱ndi akanang iza tá tarang karo̱ be kutasak. Iro̱ng apitila kanataar tuse azong i ta gye̱se̱m nasho̱o̱n itsik rigwo̱m'e, Iro̱ng iyong nye nabik Adakunom kanataar.

⁶ Nasho̱o̱n itsik rigwo̱m'e ike̱ng ikak tuse kyo̱ndi agbang kudung a tá nye be agilas, i ta gye̱se̱m kyo̱ndi amadobi. Ike̱re̱ ikak inaas i ta be kutser tuse i ta gorok itsik rigwo̱m'e. Ike̱re̱'me be anyisi whe̱re̱ nasho̱o̱n be kama.

⁷ Ike̱ng ife ime̱se̱ng'e tas azaki, ife afa se kyo̱ndi amung, ife ataar be kanyisi kyo̱ndi anerawe, ife anaas'e tas akim.

⁸ Ike̱re̱ inaas'ong cice̱r be atse̱n igataar be anyisi nuro̱m koake̱ ba ma na afabak ba gip. Katuk be kunom a yiir bom abom ye, “Azhe̱l'e, Azhe̱l'e, Azhe̱l'e nye Agwo̱m Ágwo̱m yir Adakunom a ta be kukyem, a tú se gbugbang, a kuse se kyo̱o̱rna, a ta bun a be̱.”

⁹ Ike̱re̱ inaas itser'ong bom abom riye̱ rikan, be nakerek ne a kuyiik, aner aya a ta sonong natoon itsik rigwo̱m'e, wu aya a tana sor ma izen izen'e. Koakye izen iya ba nye anong,

¹⁰ ne áko̱k kasho̱o̱n iso̱k ifa be anaas ame kpas kaben nasho̱o̱n wu aya a tá sonong ni itsik rigwo̱m ame, ne á ku ya iben, wu aya a tana sor ma izen izen ame. A turung abong rigwo̱m ba nasho̱o̱n itsik rigwo̱m'e ne á fe̱ ye,

¹¹ “Agwo̱m Ágwo̱m yir Adakunom, wan kyem ta shan kuyiik be rigwo̱m ne kukyem, kamok wan ne i nye ike̱re̱ cice̱r, Nu shim wan ne ike̱re̱'me kuse kamok anong i be kutser.”