Ike̱ng a ta tonong aYohana 2 - Izere New Testament

Ikilisiya Afisa

¹ “Zibir amaleka ikilisiya Afisa'me ye: Rife̱ na ne nufe aner aya a ta yiir ádar kanataar nubo̱k riya wu, a ta tsang a tseng kaye̱e̱r ike̱re̱ kanataar a tin tes kuro̱ng ife a tá nye be izinariya ame.

² Mi ren kuse wan cei. Mi ren iso̱r wan ne itomong wan ne i ren kutsesek wan. Mi ren wan won akardak aner tá bo̱so̱p ánerawe'me baꞌ. Wan bo̱mo̱ng áya a tá sok ace ba ye ba nye ámanzo aYeso, amma sang á ra nye baꞌ, á nye ámanzo abo̱o̱s.

³ Mi ren wan n tsesek, wan tsesek kaye̱e̱r risam kamok riyerek'i, wan ro̱n baꞌ.

⁴ Amma gip be anong, kudaam kufe mi ta be be wan se ana; Wan n tiburum be kushim wan kufe ime̱se̱ng'e.

⁵ Yiring be karo̱ afe wan tú ku se nizham wan tá ra kpa. Shishing kuse wan ne i nye ike̱re̱ iya wan tà nye ime̱se̱ng'e. Ke wan shishing kuse wan baꞌ, to̱, mi saase tà be̱ sok ike̱ng iya a tin te kuro̱ng wan naro̱ a tu ku saas.

⁶ Amma ike̱ng ikak itek wan tá nye, nye wan tá rawan amaan kunye áner aNikolata kyo̱ndi mi tá ramin.

⁷ Aner aya a ta be ato kufok a ra fok ike̱ng iya Kabik ta fe̱ be ikilisiya. Aner aya a ta canang kazatse, mi tù ku no̱o̱k iren nong a tà ya kutes kakon kafe kutser kaya ka ta se riko̱ Adakunom.

Ikilisiya aSamirna

⁸ “Zibir amaleka ikilisiya aSamirna'me ye: Rife̱ na ne nufe aner aya a ta nye Ime̱se̱ng'e ne a nye Igang'e, wu ne a ku a tá bun a dorok be kutser.

⁹ Mi ren kuri risam wan tin se. Mi bun i ren rizor wan, amma wan nye arum'e kaye̱e̱r kabik. Mi ren kuri amaan rife̱ riya áfe a ta sok ace ba ye ba nye áner Adakunom, amma sang ba ra nye baꞌ, tin fe̱ natoon wan. Á nye áner Ishetan.

¹⁰ Sang tu fok inyim risam wan tana so̱ baꞌ. Won ta ka tak, Amaan Aner tà te ákak yin nitso̱m nong a ta ka bo̱mo̱ng yin ne a ka tabak yin ma kuko̱s kuso̱k. Amma nyeseng be agap nong ko a ta ka fe̱r kamok mi, mi tà ka no̱o̱k ishorong kutser kufe izen izen.

¹¹ Aner aya a ta be ato kufok a ra fok ike̱ng iya Kabik ta fe̱ be ikilisiya. Aner aya a ta canang kazatse, riku rife̱ afa tu ku se̱ baꞌ, ko cie̱k.

Ikilisiya aPagamum

¹² “Zibir amaleka ikilisiya aPagamum'e ye: Rife̱ na ne nufe aner aya a ta be awe̱n itsor iso̱p iya i ta ya abas afa dide̱ng.

¹³ Mi ren wan sor naro̱ Ishetan tu ku nye rigwo̱m. Gip be anong, wan ti kuus be katsak. Sang wan min kirik kama i ta won ku kuni no̱o̱k katsak natoon'i baꞌ, nizen a tá fe̱r Antipas a ta nye asam'i atek nuwo̱p wan, naro̱ kaya Ishetan tú ku se.

¹⁴ Amma gip be anong, ike̱re̱ ikak kuse cie̱k mi ta be be wan; Áner akak kuse kaye̱e̱r yin a tá kuus kubo̱so̱p aBalam, kuya a ta bo̱so̱p aBalak'e ta sak áner Isarela tá nye rine̱n, a tá ya naya naya itsi ne á nye rikuna.

¹⁵ Anong ne wan se be áner aya a ta kuus kubo̱so̱p áner aNikolata.

¹⁶ Kamok anong shishing kuse wan. Ke anong baꞌ, mi tà be̱ nufuan zizirik nong tà ba ka te̱se̱ng ba be itsor iso̱p i tan wuruk nanu mi.

¹⁷ Aner aya a ta be ato kufok a ra fok ike̱ng iya Kabik ta fe̱ be ikilisiya. Aner aya a ta canang kazatse, mi tù ku no̱o̱k naya a ta ne̱r a ta yis ye, amanna. Mi tù ku no̱o̱k kuta kukan a ta min zibir riyerek rifas natoon'e. Akak kuse a ta ren riyerek'e baꞌ, ma ke aner aya afe a ta shan kuta'me.

Ikilisiya aTiyatira

¹⁸ “Zibir amaleka ikilisiya aTiyatira ye: Rife̱ na ne nufe Igon Adakunom, aya anyisi wu ta se kyo̱ndi icen kuro̱ng ne atak wu gye̱se̱m kyo̱ndi kutso̱m.

¹⁹ Mi ren kunye wan, kushim wan be kuno̱o̱k katsak wan. Mi ren itomong wan be ku naka tsesek wan. Mi ren itomong wan ife akyo̱o̱rna nar ife ime̱se̱ng'e.

²⁰ Amma gip be anong, ike̱ng ikak kuse mi ta be be wan: Wan won abining'ong a tú ku yis ye aZhezebel, aya a tá sok rice wu ye wu nye aner kuzarap. Kubo̱so̱p wu sak ásam'i shaam á ta no̱ ninye rikuna ne á ya naya a ta nye kamok asidaka itsi.

²¹ Mi tú no̱o̱k izen nong a tá shishing kuse wu a tá won ku kuus átek, a rawu.

²² To̱, mi tú ku sak a tà nye amaan kuro̱k, ne i sak áya a tá mereng be wu tà so̱ risam dide̱ng sang ke á shishing kuse ba baꞌ.

²³ Mi tà fe̱s inoon wu cei nong ase̱ áfikuus cice̱r tà ren ye, mi ne i nye afe kuye̱re̱k aye̱ ánerawe be kuto̱ro̱ng ba cei. Mi tù ku karang koangan yin tite̱re̱ be itomong wu.

²⁴ Amma yin ribir'e, i ta se yin na aTiyatira, i ta kuus yin kubo̱so̱p wu baꞌ, yin bo̱so̱p yin ike̱re̱ iya á ta yis ye, Ike̱re̱ Ishetan i ta se tsik, baꞌ. Mi shim tà ka tak yin ye, mi ta ka no̱o̱k yin acer akak baꞌ.

²⁵ Yin yiir yin kuno̱o̱k katsak yin tsek ma mi bun i be̱.

^26-28 Aner aya a ta canang kazatse ne a nye ike̱ng iya mi ta shim ma nigang'e, mi tù ku no̱o̱k kukyem a tà nye rigwo̱m natoon kazatse cei kyo̱ndi mi ta shan kukyem'i nufe Ada mi. Kyo̱ndi a ta fe̱ ye, ‘A tin nye rigwo̱m natoon ba be ishe̱n kutso̱m, a tà ka fo ba kyo̱ndi a ta fo kadonong iben.’ Mi tu ku no̱o̱k adar kusetson.

²⁹ Aner aya a ta be ato kufok a ra fok ike̱ng iya Kabik ta fe̱ be ikilisiya.