Ike̱ng a ta tonong aYohana 19 - Izere New Testament

Adide̱nde̱ng!

¹ Nama anong ne mi fok kuto̱ kukak kyo̱ndi riwo̱ng ánerawe whe̱re̱ kaye̱e̱r kaza ta tasak ne á fe̱ ye, “Adide̱nge̱ng Adakunom, kashesh be kuyiik ne kukyem nye kufe Adakunom yir.

² Kamok amok wu se gye̱r ne a nye katsak. A to̱ agbang inyak agwo̱m iya i tá beseng kazatse be rikuna wu amok. Adakunom mu ku karang kamok a fe̱s ásam wu.”

³ Iyong á bun á tang kuto̱ ye, “Adide̱nge̱ng Adakunom, itsing kuro̱ng kuya ku tu ku ya ngarak naza ma izen izen.”

⁴ Iyong áko̱k kasho̱o̱n iso̱k ifa be anaas ame ne ikewum inaas ame kpas kaben nong á tá ya Adakunom iben, wu afe a ta sonong natoon itsik rigwo̱m. Ne á tang kuto̱ ne á fe̱ ye, “Anong! Adide̱nge̱ng Adakunom!”

⁵ Ne kuto̱ kukak wuruk natoon itsik rigwo̱m ame, ye, “Kerek yin Adakunom yir, Yin ásam wu cice̱r, yin áya i ta fok yin inyim wu, áko̱k kasho̱o̱n be inoon!”

⁶ Iyong mi bun i fok kuto̱ kukak kyo̱ndi riwo̱ng rigwo̱m ánerawe, kyo̱ndi ashi ta wo̱k, kyo̱ndi iza ta tasak. Mi fok á ta fe̱ ye, “Adide̱nge̱ng Adakunom! Kamok Ada Adakunom yir ayiik'e ne a se be rigwo̱m.

⁷ Won i tu nye yir riye̱ rikan ne i fok yir kusas'e ne i ku tiyiik yir! Kamok izen kuwe̱ne̱ng Aturuk'e n nye. Abining wu afas n naka zem.

⁸ A tú ku no̱o̱k ares akan afe itso̱m a ta forop ma a gye̱se̱m nong a ta te.” (Ares akan'e sor kyo̱ndi kunye kutek kuya ázhe̱l'e ta nye.)

⁹ Ayong amaleka'me fe̱ be mi ye, “Zibir ike̱re̱ na, ‘Áner riye̱ rikan nye áner aya a tú ku tak ba riye̱ rikan kuwe̱ne̱ng Aturuk na.’ ” Ne a bun a fe̱ ye, “Rife̱ na nye rife̱ Adakunom rife̱ katsak.”

¹⁰ A tá fa fe̱ anong ne mi kpa kaben nong i tú ku ya iben. Ayong a fe̱ be mi ye, “Sang tu nye anong baꞌ, mi gip mi nye asam afudang wan, wan be ribir áfudang wan, áya a tá yiir rife̱ aYeso. Adakunom ne wan tu ku ya iben tsek, kamok Rife̱ Ritek aYeso tá taas ne ri no̱o̱k kukyem kunye kuzarap.”

Aner akak natoon itsaap ikan

¹¹ Mi di kaza nukarak ne i di itsaap ikan nunyeseng. A yis aner aya a tin ngarak natoon itsaap'e ye Aner Katsak be Katsak. A to̱ amok natoon katsak ne a nye itsom kamok katsak.

¹² Anyisi wu se kyo̱ndi rigyem kuro̱ng, abong rigwo̱m whe̱re̱ se natoon rice wu. A be riyerek rikak ni izibir, riya sang akak ta kyem a ren baꞌ, ma wu ze̱r tsek.

¹³ Kukpiin a tá te, a shumung kaye̱e̱r naso̱k. Riyerek wu nye, Rife̱ Adakunom.

¹⁴ Rigwo̱m áSozha á ta se kaye̱e̱r kaza, ne á tsang á ku kuus natoon ítsaap ba. Á tes ares akan pes áfe itso̱m dide̱ng.

¹⁵ Itsor ikak iwe̱n'e iya i ta ya dide̱ng wuruk nanu wu, a ti te̱m aner kazatse be itsor'e. “A tin nye rigwo̱m niba be ishe̱n kutso̱m.” A tà fi kutes anap ba kaye̱e̱r ribong a tin fi ashi anap, aya a ta nye afe agbang riye̱ kubeseng Adakunom afe Kuyiik.

¹⁶ Natoon kukpiin wu be natoon ishurtak'e, a ti zibir riyerek rikak ye, agwo̱m ágwo̱m afe a tin nye rigwo̱m natoon ágwo̱m.

¹⁷ Ne mi di amaleka akak tan nyeseng natite kunom. A tá ta kuto̱ be agap a tá yis nanon cice̱r na tá sen kar natoon kaza ye, “Be̱ yin cice̱r naro̱ kazining nong tà ya yin naya agbang riye̱ rikan Adakunom na.

¹⁸ Be̱ tà ya yin rinam ágwo̱m na, ne rife̱ ágbang asozha na, ne rife̱ áfe agap, ne ítsaap na be rife̱ áner aya a tin ngarak ne rife̱ ánerawe cice̱r, ásam be áya a ta sor ne̱k, be áko̱k kasho̱o̱n ne inoon.”

¹⁹ Iyong mi di kukewum ame be ágwo̱m kazatse ne ásozha ba tá nyim nong á tá ko̱n be aner aya a ta se natoon itsaap ikan ame be ásozha afu.

²⁰ Ayong a yiir kukewum ame mak be aner kuzarap abo̱o̱s aya a ta nye ike̱re̱ azhing be riyerek kukewum ame. Kamok ike̱re̱ azhing'e iyong ne i wo̱ro̱k áfe a tá be izizo̱ kukewum ame ne á ya ike̱ng kukewum'me ta nye iben. Cice̱r ba a tá barak ba be kutser kaye̱e̱r icen kuro̱ng kuya ku ta cishek dide̱ng ne itong ikak kyo̱ndi ife abindiga.

²¹ A fe̱s ribir ásozha ame ákak be itsor i tá wuruk nanu aner aya ta se natoon itsaap ikan ame. Iyong nanon ti kumung rice ba ni iya ikom'e.