Ike̱ng a ta tonong aYohana 17 - Izere New Testament

Abining akak be kukewum kuseng

¹ Ayong azining kaye̱e̱r ámaleka kanataar ame áya a tá be nakereng kanataar ame be̱ á ta fe̱ be mi ye, “Be̱, mi tà ka tonong kuri risam mi tana no̱o̱k agbang inyak agwo̱m na, aya a ta nye agbang kuwo̱p a tá no̱k bubarak be karo̱ ísho̱ng tú ku se whe̱re̱.

² Ágwo̱m kazatse na nye rikuna be wu. Ánerawe kazatse feng be ashi anap kamok rikuna wu.”

³ Ayong amaleka'me ti sok kaye̱e̱r Kabik a tá tseng be mi kaye̱e̱r katse. Mi di abining akak azong a tan sonong natoon kukewum kukak kuseng ku ta be ayerek ritok nuro̱m wu be ace kanataar ne átom kuso̱k.

⁴ Abining'e te ares akak aseng. Abining'e te ares a tá nye be izinariya ne iwe̱re̱ng i ta se yiik. A be kures kuso̱ ashi kukak a tá nye be izinariya nubo̱k wu. Kures'e shining be ike̱re̱ akye̱re̱ be ife i ta be narik rikuna wu.

⁵ A ti zibir riyerek rikak nati wu rife̱ sang akak ta ren ike̱ng i ta sor baꞌ ye, ababila ayiik'e, anyining inyak ágwo̱m cice̱r, anyining ike̱re̱ akye̱re̱ nazatse.

⁶ Mi di abining'e tan feng be naso̱k áfikuus ázhe̱l'e wu tan so̱, ne nafe áner á ta no̱o̱k asheda natoon aYeso. Nizen iya mi tú ku di mi fok azhing dide̱ng.

⁷ Ayong amaleka'me fe̱ be mi ye, “Kamok akye̱ ne wan fok azhing e̱? Mi tà ka te̱s ikpang abining na ne afe kukewum wu tin ngarak na, i ta be ace kanataar be atom kuso̱k.

⁸ Kukewum wan tá di, tuse gbugbang, amma kyo̱o̱rna ku kuse baꞌ. Ku tà wuruk kaye̱e̱r ribong ri ta be igak baꞌ, ku tà tseng naro̱ riku wu kafe izen izen. Ánerawe kazatse áfe a tan zibir ayerek ba nufumung kutser baꞌ, kum nizen iya a tá nye kazatse tà fok azhing nizen iya á tana di kukewum ame ku ta se gbugbang, amma kyo̱o̱rna ku kuse baꞌ ku tana bun ku be̱.

⁹ “Rife̱ na nye rife̱ aner aya a ta be kuto̱ro̱ng tsik. Ace kanataar'ong nye nawhanang kanataar naro̱ abining'e ta min sonong.

¹⁰ Ace kanataar'e nye ágwo̱m kanataar, atoon kaye̱e̱r ba n kus, azining kuse, akak rusek a ta ra be̱. Izen iya ayong'e tana be̱, a ta nye rigwo̱m nizen cie̱k tsek.

¹¹ Kukewum kuya ku ta tsang ku kuse gbugbang ame, ku tá ra ba kuse baꞌ, ne ku nye agwo̱m afe ikara'me. Wu ti se kaye̱e̱r ágwo̱m kanataar á tá wuruk ame, á tseng á be nuwei.

¹² “Atom kuso̱k wan ta di'ong nye ágwo̱m kuso̱k, áfe a tan se̱ rigwo̱m nizham baꞌ. Amma a tù ku te ba rigwo̱m rife̱ awa azining mak be kukewum kuseng ame.

¹³ Ba kuso̱k'ong, kuto̱ro̱ng ba se kuzining, á no̱o̱k kukewum kuseng'e kukyem ba be rigwo̱m ba.

¹⁴ A ta ko̱n itsom be Aturuk'e. Amma Aturuk'e tà ya ágwo̱m na be itsom kamok wu ne a ti nye rigwo̱m natoon ágwo̱m ne a nye agbang Agwo̱m Ágwo̱m. Áya wu tá yis, ne áya wu tá kasa, be áya a tú ku kuus be katsak ta se mak be wu.”

¹⁵ Ayong amaleka'me fe̱ be mi ye, “Isho̱ng na wan ta di aya inyak agwo̱m na ta min sonong, nye ánerawe rigwo̱m'e be iwo̱p ze̱r ze̱r ne ízere iriri'me.

¹⁶ Kukewum kuseng'e ne átom kuso̱k'ong tà naka sak be inyak agwo̱m'me baꞌ. A tà turung koakye a tá be nong a tù ku won ica'me. Á tà ya rinam wu ne a ku shosh be kuro̱ng.

¹⁷ Kamok Adakunom sak naye̱ ba nong á ta shining ike̱ng iya wu tá shim. Ba tá shim a tá no̱o̱k kukewum'me kukyem ba nong a tin nye rigwo̱m ma izen iya a tana shining ike̱ng iya Adakunom ta fe̱.

¹⁸ Abining aya wan ta di'me, nye agbang kuwo̱p ku tin nye rigwo̱m nagwo̱m kazatse.”