Ike̱ng a ta tonong aYohana 14 - Izere New Testament

Abom áya a tá se̱ kashesh

¹ Mi ta fa ye̱re̱k ne mi di Aturuk ame nasho̱o̱n'i nunyeseng natoon kawhanang aSihiyona be áner izungu kuso̱k inyak be iso̱k inaas be anaas 144,000 mak be wu, áya a tá zibir riyerek Aturuk'e ne riyerek Ada wu ninati ba.

² Iyong mi fok kuto̱ kukak tá wuruk kaye̱e̱r kaza kyo̱ndi ashi ta wo̱k, kyo̱ndi iza ta tasak. Kuto̱ kuya mi ta fok'e se kyo̱ndi áner ákak ta sen rom ízom.

³ Á se be abom afas nasho̱o̱n itsik rigwo̱m ame be nasho̱o̱n ike̱re̱ inaas ame ne áko̱k kasho̱o̱n. Aner akak kyem a bom abom'e baꞌ, igak awan áner izungu kuso̱k inyak be iso̱k inaas be anaas 144,000 á tu ku shesh ba kaye̱e̱r kazatse ame tsek.

⁴ Áner na ne a nye áner aya á ta won rice ba zhe̱l, á kon tseng gbugbarak be aner abining baꞌ. Ba ne á tsang a kuus Aturuk'e koake̱ ne a tseng. A tu ku sheshek ba kaye̱e̱r ribir ánerawe ne ba se kyo̱ndi ku tes kakon kufe ime̱se̱ng'e kuya a ta no̱o̱k Adakunom be nasho̱o̱n Aturuk'e.

⁵ A kun fok akak ba be abo̱o̱s nanu wu baꞌ, kamok ba be rine̱n baꞌ.

Ámaleka ataar

⁶ Ne mi bun i di amaleka akak ta kar natoon kaza, a be Rife̱ Ritek Adakunom rife̱ izen izen nong a ta tak ánerawe kaye̱e̱r kazatse cice̱r, koakye kuri anerawe be koakye kuri izere be koangan irem.

⁷ Iyong amaleka'me ta kuto̱ be agap a ta fe̱ ye, “Tiyiik yin Adakunom, ne i kerek yin kuyiik wu! Kamok kyo̱o̱rna izen n nye a tana to̱ kazatse cice̱r amok. Ku ya yin iben, wu ne a nye kaza be kaben, be agbang adung ne itop ashi.”

⁸ Amaleka afe afa bun a gor a ta fe̱ ye, “Kun kpa, Agbang kuwo̱p aBabila n kpa, kun kpa. Wu ne a sak ánerawe ni iwo̱p cei tá feng be ashi anap kamok amaan rikuna wu.”

⁹ Ayong amaleka afe ataar bun a gor nama afe afa ame. Amaleka'me fe̱ be agbang kuto̱ ye, “Aner aya a ta ya kukewum na iben ka ike̱ng iya i ta tas kukewum'me ne a shim a tu ku tse̱k izizo̱ wu nubo̱k ka nati ayi,

¹⁰ wu gip a tà so̱ ashi riye̱ kubeseng Adakunom, aya a tá nye be agap wu kaye̱e̱r kures riye̱ kubeseng wu. A tù ku no̱o̱k risam dide̱ng be kuro̱ng ne ike̱ng ikak kyo̱ndi itong abindiga itong ikak nasho̱o̱n ámaleka ázhe̱l'e ne nasho̱o̱n Aturuk'e.

¹¹ Itsing kuro̱ng kuya a tana ku no̱o̱k mo ba risam'me ngarak naza ma izen izen. Koangan áner aya a tà ya kukewum ame iben ka ike̱ng iya i tù ku tas iben ne a tú ku tse̱k ba izizo̱ riyerek ikewum'e, á ta so̱ risam katuk be kunom dar gang.”

¹² Kamok anong, ázhe̱l'e áya a tá kuus itsi Adakunom ra naka tsesek ne a yir rife̱ aYeso be agap.

¹³ Iyong mi fok kuto̱ kukak tá wuruk kaye̱e̱r kaza ku ta fe̱ ye, “Zibir rife̱ na, Áner riye̱ rikan ne á nye afe a tá kus kaye̱e̱r aYeso kyo̱o̱r be nasho̱o̱n.” Kabik fe̱ ye, “Ei á tà fan kaye̱e̱r risam, itomong ba tà ka kuus ba.”

Ishamang kazatse

¹⁴ Mi tá fa sok anyisi naza ne mi di kune̱n kukan nasho̱o̱n'i. Mi di aner akak kyo̱ndi Igon Anerawe ta min sonong natoon kune̱n'e. Aner'e be ribong rigwo̱m a tá nye be izinariya natoon rice wu. aLauzhe akak a tá ya dide̱ng se nubo̱k wu.

¹⁵ Ayong amaleka akak wuruk nutu kuya Adakunom iben nong a tá yis aner aya a ta se natoon kune̱n ame be agap ye “Nabak alauzhe wan nong tin tsek naya, izen ishamang n nye, naya nbeen kaye̱e̱r kazatse.”

¹⁶ Ayong aner a ta se nusonong natoon kune̱n'e ziming alauzhe wu natoon kazatse nong a ti tse̱k ike̱ng i tan been kaye̱e̱r kazatse'me.

¹⁷ Iyong amaleka akak bun a wuruk kaye̱e̱r agbang kutu kuya Adakunom iben kaye̱e̱r kaza, amaleka ayong be alauzhe aya a tá ya nubo̱k wu gip.

¹⁸ Ne amaleka akak a tin sak riye̱ nuro̱ng bun a wuruk gbak, a wuruk na abagadi nong a tá yis amaleka aya a ta be alauzhe nubo̱k wu ame be agap, ye “Nabak alauzhe wan nong tin tse̱k kutes anap kaye̱e̱r kazatse kamok an te afe kutse̱k.”

¹⁹ Ayong amaleka'me ziming alauzhe wu ame kaye̱e̱r kazatse nong a ta kpe̱e̱r kutes anap ame ne a tusung naro̱ Adakunom tana fi ashi'me be riye̱ kubeseng wu.

²⁰ A fi ashi anap'e nama kuwo̱p, naso̱k yiir wuruk naro̱'me ma na teng kyo̱ndi kudun a ta rosom nanu itsaap. Kugugo̱k naso̱k'e ta teng se kyo̱ndi akilomita iso̱k inyak itaar, ne kutsik'e se kyo̱ndi amita azining be ribir.