Ike̱ng a ta tonong aYohana 13 - Izere New Testament

Ikewum ikak wuruk kaye̱e̱r agbang kudung

¹ Ne mi di kukewum kukak ku ta sen wuruk kaye̱e̱r agbang kudung. Kukewum'me be átom kuso̱k be ace kanataar ne abong rigwo̱m kuso̱k natoon átom wu'me. A ti zibir riyerek kuzhe̱e̱sh Adakunom natoon koakye rice'me.

² Ikewum mi tá di'me tas ici kase̱m. Amma agbang atas atak'e tas afe aBeyar, kanu'me se kyo̱ndi kafe azaki. Kuwhen ame no̱o̱k ikewum'e agap wu be itsik rigwo̱m wu ne agbang kukyem wu.

³ Rice ikewum'e rikak be agbang kufor kyo̱ndi a tin ku mo, amma kufor'e n te kutser. Anerawe te zhing kamok kufor'e tá te kutser ne á ku kuus.

⁴ Ánerawe ya Kuwhen ame iben kamok wu ne a no̱o̱k kukewum'me kukyem wu. Ánerawe ya kukewum'me iben gip ne á fe̱ ye, “Angan se kyo̱ndi kukewum na e̱? Angan ta kyem a ko̱n itsom be wu e̱?”

⁵ A no̱o̱k kukewum'me kanu a tanin tiyiik rice wu ne a fe̱ ike̱re̱ kuzhe̱e̱sh Adakunom ne a ku no̱o̱k kukyem a tanin nye rigwo̱m ma ife̱n iso̱k inaas be afa.

⁶ Iyong kukewum'me karak kanu wu nong ku tá kas Adakunom, ne ku kas riyerek wu ne karo̱ kusor wu be áya a ta sor kaye̱e̱r kaza.

⁷ A tu ku no̱o̱k kukyem a tanin ko̱n itsom be ázhe̱l'e ne a ka canang ba. A tu ku no̱o̱k kukyem natoon koangan irem be koakye kuri anerawe be koakye kuri izere ne koakye kuri karo̱.

⁸ Ánerawe á ta se nazatse cice̱r tù ku ya iben, cice̱r áner aya a ta zibir ayerek ba kaye̱e̱r kufumung kutser kuya ku ta nye kufe Aturuk'e baꞌ, aya a ta tse̱e̱r kum nizen a tá nye kazatse.

⁹ Aner aya a ta be ato kufok a ra fok!

¹⁰ Koangan á ta tsang a se ye, a tu ku yiir a ta te asam ta te asam'me. Aya a ta se ye a tú ku fe̱r be itsor, be itsor ne a tù ku fe̱r'e. Iyong tonong ye ázhe̱l'e ra naka tsesek ne á no̱o̱k katsak na Adakunom.

Kukewum kukak wuruk kaye̱e̱r iben

¹¹ Iyong mi bun i di kukewum kukak, ku ta sen wuruk kaye̱e̱r iben. Ku be átom afa kyo̱ndi afe aturuk amma kufe̱ kanu kyo̱ndi Kuwhen ame.

¹² Ku ti nye itomong be kukyem kukewum kufe ime̱se̱ng'e ame. Ku bun sak kazatse ne áner á ta se kaye̱e̱r kazatse ta ya kukewum kufe ime̱se̱ng'e ame iben, ku ya kufor rice'me tá te kutser.

¹³ Kukewum kufe afa na nye ike̱re̱ azhing dide̱ng ma ku sak kuro̱ng tá wuruk naza nong ku ta kpa kaben ne ánerawe ye̱re̱k.

¹⁴ A no̱o̱k kukewum kufe afa'ong kukyem a tin nye ike̱re̱ azhing ne a ni wo̱ro̱k ánerawe kazatse dide̱ng nong a ta kare̱p kukewum kufe ime̱se̱ng'e riye̱. A ta sak ba á ta no̱k ike̱ng ikak i ta tas kukewum kufe ime̱se̱ng ame nong a tin tiyiik kukewum'me a tu ku man be kutsor gip be anong ku bun ku nye kutser.

¹⁵ Á tu no̱o̱k kukyem nong a tin fe̱e̱p isong nike̱ng'e nong ase̱ ku ta kyem ku fe̱ kanu ne ku sak a ta fe̱r koangan a ta gaar ku kuya iben.

¹⁶ Kukewum'e sak koangan anerawe ahiir'e be agbang'e, arum'e be afe rizor'e, asam'me be afe a ta se washak, a sak koangan tá tse̱k izizo̱ nubo̱k riya wu ka nati wu ayi.

¹⁷ Sang akak kyem a shan ka a re̱e̱s ike̱ng ikak baꞌ ma ke aner'e be izizo̱'ong nizham. Izizo̱'me nye riyerek kukewum'me ka izibir wu.

¹⁸ Rife̱ na shim aner ra be kukyem. Aner aya a ta be kuto̱ro̱ng dide̱ng ra fa a ta di izibir kukewum'me kamok izibir'e nye ife anerawe. Izizo̱ kukewum'me nye igataar, igataar, igataar (666).