Ike̱ng a ta tonong aYohana 11 - Izere New Testament

Áner asheda Adakunom afa

¹ Ayong a ti no̱o̱k ike̱ng iya a tin maas karo̱ kyo̱ndi ishe̱n. Ne a fe̱ be mi ye, “Tseng ta se maas agbang kutu kuya Adakunom iben be karo̱ a tu ku nye asidaka ne i fa ánerawe áya a ta sen ya Adakunom iben kaye̱e̱r'e.

² Amma tu maas kubang'e kufe ime̱se̱ng'e baꞌ. Sang tu maas baꞌ, kamok an no̱o̱k áfurin, ba ne a ta be̱ shesh kuwo̱p kuzhe̱l'e na ma ife̱n iso̱k inaas be afa.

³ Mi tà ka no̱o̱k asheda mi afa kukyem nong a tin zarap ma kuko̱s izungu izining be iso̱k inyak ifa be iso̱k igataar.” (1,260) A ta te agye̱e̱r ares nong á ta tonong riye̱ riwe ba.

⁴ Ike̱re̱ afa'ong nye atin nafar afa ame ne íro̱ng ifa ame i ta se nunyeseng nasho̱o̱n Agwo̱m Ágwo̱m kazatse cice̱r.

⁵ Ke aner akak nye kyo̱ndi a ta ka man ba, ne kuro̱ng wuruk kaye̱e̱r kanu ba nong ku ta ya ámudo̱n ba'me. Anong ne koangan afe a ta shim a ta ka man ba a tù ku fe̱r.

⁶ Áner afa'ong, a tu ku no̱o̱k ba kukyem nong á tin whe̱e̱n kaza fan iza bu kpa nizen ba ta sen nye kuzarap'e. Á be kukyem á tana shishing itop ashi nong a ta te naso̱k, á bun á tù ku no̱o̱k ba kukyem a tana kyem á tin no̱o̱k kazatse koakye kuri risam nizen iya ba tà shim.

⁷ Nama á tá gang i taas kutom'e, ikewum ikak iya i ta wuruk kaye̱e̱r ribong riya ri ta be igak baꞌ ame, tikpa ni ba ma i nar agap ba, iyong i tá ka fe̱s ba.

⁸ Ikom ba tà sor niren kaye̱e̱r agbang kuwo̱p a tin maas be aSodom ka aMasar ayi, naro̱ a tú ku tigak Agwo̱m Ágwo̱m ba.

⁹ Kaye̱e̱r inom itaar be ribir, ánerawe koakye be irem ze̱r ze̱r ne izere ze̱r ze̱r ne iwo̱p ze̱r ze̱r tà be̱s á tà ye̱re̱k ikom'e ma a ta roon'e ye sang á tu ku ne̱se̱k ba baꞌ.

¹⁰ Ánerawe kazatse tà nye riye̱ rikan dide̱ng, kamok rikus átom'ong. Á ta nye riye̱ rikan ne á naka toos be ike̱re̱ kamok riku áner kuzarap afa'ong ne risam á tá no̱o̱k kazatse.

¹¹ Amma nama inom itaar be ribir'e, isong iya i ta nyeseng kutser tà ne nufe Adakunom i titiik niba. Iyong á wor á dorok be kutser. Koangan afe a tú ku di ba be kutser fok inyim makiyi.

¹² Ayong áner kuzarap afa ame ta fa fok kuto̱ kukak be agap ku ta wuruk kaye̱e̱r kaza ku ta fe̱ be ba ye, “Ngarak yin aze.” Ayong á ngarak naza kaye̱e̱r ane̱n ne ámudo̱n ba ka ye̱re̱k ba.

¹³ Dim nizen iyong kaben wor ka zuur, abas azining kaye̱e̱r kuwo̱p'e wor kuyirik. Ánerawe izungu kanataar kus kamok kuzuur kaben'e. Áfe á tá gaar be kutser fok inyim dide̱ng yong á tiyiik Adakunom a ta se kaye̱e̱r kaza.

¹⁴ Risam rife̱ afa gor'ong, risam rife̱ ataar saase kyo̱o̱rna.

Rigba rife̱ kanataar

¹⁵ Ayong amaleka afe kanataar ame tá fa fe̱e̱p rigba rifu, ne a fok íto̱ íkak kanang kaye̱e̱r kaza i ta fe̱ ye, “Rigwo̱m kazatse n te rife Agwo̱m Ágwo̱m yir ne aKiristi wu, wu ne a ta nye rigwo̱m ma izen izen.”

¹⁶ Ayong áko̱k kasho̱o̱n iso̱k ifa be anaas á tá se nusosok natoon ítsik rigwo̱m ba kpas kaben nong á tá ya Adakunom iben,

¹⁷ ne á fe̱ ye, “Yir shim ta ka tonong yir riye̱ rikan Agwo̱m Ágwo̱m yir Adakunom afe kukyem cice̱r, aya a tu ku se gbugbang ne a kuse kyo̱o̱rna. Kamok wan sok agbang kukyem wan i tin nye rigwo̱m kyo̱o̱rna.

¹⁸ Riye̱ áfurin kubeseng, izen riye̱ kubeseng wan n be̱. Izen n nye a tana to̱ ikom amok ne a ku karang ásam wan áner kuzarap ishorong ba, ne ásam wan ázhe̱l'e ne koangan áfe a ta tiyiik riyerek wan, inoon be áko̱k kasho̱o̱n. Izen n nye wan tana fe̱s áfe a tá beseng kazatse.”

¹⁹ Iyong agbang kutu kuya Adakunom iben ku ta se kaye̱e̱r kaza karak ne mi di akpate kushu Adakunom kaye̱e̱r'e. Ne akanang akak wuruk be riwo̱ng ne kutasak iza be kuzuur kaben ne agbang rikarang.