Itomong Ámanzo 9 - Izere New Testament

Ku shishing Ashawulu

¹ Ashawulu ya kasho̱o̱n be kutabak áfikuus'e dide̱ng, ma a fe̱ ye wu ta ka fe̱s ba. Ayong a tseng nufe agbang atsi.

² A tá fe̱ be wu ye a ru ku kufumung nong ase̱ a ta tseng ninaro̱ natu aduwa aDamaskus, nong ke wu se se̱ ákak azong áfe a ta Kuus Iren Agwo̱m Ágwo̱m ne wu ka yising ba atek be ányining'e nong a ta se kates ba nitso̱m na aUshalima.

³ Nizen iya a tase be kutseng a be̱ barak be aDamaskus'e ne akanang wor a wuruk naza a ti samang natoon wu.

⁴ Ayong Ashawulu'me kpa kaben ne a fok kuto̱ tá fe̱ be wu ye, “Ashawulu, Ashawulu, akye̱ sak wan sen ni tabak e̱?”

⁵ Ashawulu ame fe̱ ye, “Wan nye angan Agwo̱m Ágwo̱m mi e̱?” Iyong kuto̱'me fe̱ ye, “Mi ne i nye aYeso aya wan ta sen ku tabak.”

⁶ “Dorok nong ta no̱ kaye̱e̱r kuwo̱p nong a tà ka tak ike̱ng iya wan tana nye.”

⁷ Áner aya a tá se niren mak be Ashawulu'me ma nyeseng gbik dar kufe̱ kanu. Á fok kuto̱ tá fe̱ gye̱rtatan, ba ra di akak baꞌ.

⁸ Ayong Ashawulu'me dorok kaben, a nye a tá karak anyisi amma ko a kyem a di karo̱ baꞌ. Iyong a tú ku ko̱k kubo̱k á tá no̱ be wu kaye̱e̱r aDamaskus ame.

⁹ A te akpato̱o̱n'e ife inom itaar, a yas ka a so̱ baꞌ.

¹⁰ Afikuus akak tuse azong na aDamaskus'e a tú ku yis ye Ananiya. Agwo̱m Ágwo̱m tseng a ku yis kaye̱e̱r nabos nong a tá fe̱ be wu ye “Ananiya.” Ne wu fe̱ ye “Mi na'me Agwo̱m Ágwo̱m.”

¹¹ Ayong Agwo̱m Ágwo̱m fe̱ be wu ye, “Dorok ta tseng nasa aYahuda nukim iren iya a tá yis ye Acop Iren, azong ne wan rip aner akak a tá ne na aTarsus, a tú ku yis ye Ashawulu. Ayong a se be aduwa azong.

¹² Kaye̱e̱r nabos wu Ashawulu'me di aner akak a tú ku yis ye Ananiya a be̱ a ti sak kubo̱k natoon wu nong a tá bun a se̱ kudi karo̱.”

¹³ Amma Ananiya fe̱ ye, “Agwo̱m Ágwo̱m, ánerawe whe̱re̱ min taas itak aner na be kuri kunyeen a tá nyeen ázhe̱l'e na aUshalima.

¹⁴ A n be̱ aze be kufumung kuya ágbang atsi tú ku no̱o̱k nong a tin yising koangan afe a ta yis kaye̱e̱r riyerek wan.”

¹⁵ Amma Agwo̱m Ágwo̱m fe̱ be Ananiya'me ye, “Tseng, aner na nye ares itomong'i aya mi tá kasa nong a tà tseng be riyerek'i nufe áya sang a ta nye áner aYahuda baꞌ be ágwo̱m ba ne áner Isarela ren.

¹⁶ Mi be rice mi, mi tù ku tonong kuri risam riya a tana so̱ kamok riyerek'i.”

¹⁷ Iyong Ananiya tseng a tá se no̱ kaye̱e̱r kasa'me. A ti sak kubo̱k na Ashawulu ne a fe̱ ye, “Aroneng Ashawulu, Agwo̱m Ágwo̱m yir aYeso aya wan tú ku di niren nizen iya wan ta sen tseng i saase aze, min tom nong wan ta bun kpaan kudi karo̱ ne a ka shining be Kabik Kazhe̱l'e.”

¹⁸ Nizen iyong ike̱ng ikak kyo̱ndi kuku ike̱ng'e wor i wuruk nanyisi Ashawulu i ta kpas kaben, yong a bun a kpaan kudi karo̱. A dorok ne a ku nye abatisma.

¹⁹ Nama a ta ya naya ne kuro̱m wu bun ku kpa agap. Ashawulu te inom gaan be ámanzo na aDamaskus.

Ashawulu taas rife̱ Adakunom na aDamaskus ne na aUshalima

²⁰ Ashawulu wor a kpaan kunye awazi aYeso kaye̱e̱r atu aduwa áner aYahuda ye aYeso nye Igon Adakunom.

²¹ Áner aya a tá fok ike̱ng iya a tá fe̱ te zhing ne á naka risim ye, “Aner na ne a fe̱s ánerawe aya a tá yis kaye̱e̱r riyerek na na aUshalima aꞌa? Wu ne a be̱ azena nong ase̱ a ta ka yising ba a ta se no̱o̱k agbang atsi aꞌa?”

²² Amma Ashawulu ti barang kurasak ne akpa agap ne a sak áner aYahuda aya a tase na aDamaskus tá te titak kamok wu tá ya kasho̱o̱n kufe̱ ye aYeso ne a nye aKiristi.

²³ Nama inom cie̱k, áner aYahuda nye ibo̱ro̱ng ku fe̱r Ashawulu,

²⁴ amma Ashawulu fok ike̱ng iya a ta tse̱r a tú ku nye'me. Á yiir ku kufarang nanu kuwo̱p'e koakye katuk be kunom nong ase̱ a tu ku fe̱r.

²⁵ Amma áfe a tú ku kuus tú ku te kaye̱e̱r iderse natuk nong a tú ku tun ribong rikak nubar kuwo̱p'e nong a tá tiik'e whiwhe̱.

²⁶ Nizen iya Ashawulu tá no̱ na aUshalima, a shim ke a gun rice be áfikuus, amma áfikuus'e ra fok inyim wu kamok ba di kyo̱ndi an te afikuus be katsak'e baꞌ.

²⁷ Amma aBarnabas ne a ra be̱ a tseng be wu nufe ámanzo. A tú ku tak ba iren iya Ashawulu'me tá di Agwo̱m Ágwo̱m niren, nizen a tá se be kutseng wu, be iren iya Agwo̱m Ágwo̱m'me tá fe̱ kanu be wu, be kuri awazi aya Ashawulu'me tá nye kaye̱e̱r riyerek aYeso na aDamaskus dar inyim.

²⁸ Kum be izen iyong Ashawulu ma kpaan kutsang tseng mak be ba kaye̱e̱r aUshalima be riye̱ wu ne̱k.

²⁹ A fe̱ kanu ne a ya nanan be áner aYahuda aya a tá fok irem aHeleni, amma ba shim á tú ku fe̱r.

³⁰ Nizen iya áfikuus cice̱r tá fa fok anong ne á tseng be wu na aKaisariya ne á kute niren a tá tseng na aTarsus.

³¹ Be anong áfikuus aya a tá se niben aYahuda ne aGalili be aSamariya tá ra ma fok kusas kusor. Afikuus ti barang kukpa agap, ne Kabik Kazhe̱l'e ka no̱o̱k ba ifeng ma a nye ne á ni barang kute whe̱re̱, nizen iya á sor kaye̱e̱r inyim Agwo̱m Ágwo̱m.

aBitrus sak Iniyas ta te atser

³² Nizen iya aBitrus tá tsang a tseng ninaro̱ ze̱r ze̱r kaye̱e̱r kaben'e, yong a tseng nong a ta se di ázhe̱l'e aya a tá sor na aLidda.

³³ A se se̱ aner akak azong aya a tú ku yis ye Iniyas. A te aye̱ ikara nameneng kamok a tá we̱ nabas azining.

³⁴ Ayong aBitrus fe̱ be wu ye, “Iniyas aYeso Kiristi sak wan te atser. Dorok nong ta sok ike̱ng kameneng.” Ne Iniyas'me wor a dorok gbashak.

³⁵ Ánerawe aya a ta se na aLidda ne aSharon áya a tú ku di a tá te atser, kirik nong á tá te afikuus.

³⁶ Abining akak tuse na aZhopa a tá nye abafe ifikuus'e, riyerek wu nye aTabita (ke a kirik'e ne a te aDokas). A tonong kuse kutek koakye izen ne a tobok áfe rizor.

³⁷ Kuro̱k tú yiir nizen iyong ma a ku, yong a sok kukom wu nong a tá se sak'e nutu kukak natoon'e.

³⁸ aLidda'me se bubarak be aZhopa. Áfikuus tá fa fok ye aBitrus se na aLidda'me, ayong á tom áner afa nufu nong a tá su ku nye akusuk ye a ra be̱ zizirik.

³⁹ Ayong aBitrus dorok a tá ka kuus ba. A tá fa no̱ ne a tseng be wu nutu ku ta se natoon'e ame. Ákumung akak whe̱re̱ mu ku gorok be nanak. Á tos ne a ku tosong ares kute áya aTabita tú ku tos ba'me ne a ru nye atser.

⁴⁰ aBitrus fe̱ be ba ye á ra wuruk nufang cice̱r ba, yong a tigbok akuur kaben á ta nye aduwa. A kirik a tá ye̱re̱k kukom'e ne a fe̱ ye, “aTabita, dorok.” Iyong aTabita karak anyisi wu. A tá fa di aBitrus yong a dorok a tá sonong

⁴¹ aBitrus nabak kubo̱k nong a tú ku se̱ mo a tá nyeseng. Iyong a yis áfikuus ne ákumung ame a tú ku no̱o̱k ba aTabita be kutser.

⁴² Itak'e no̱ koake̱ kaye̱e̱r aZhopa ma ánerawe whe̱re̱ te áfikuus.

⁴³ aBitrus te inom gaan na aZhopa be aSiman aya a tá nye itomong kuruk akpa.