Itomong Ámanzo 7 - Izere New Testament

Rife̱ Itifanus

¹ Ayong agbang atsi ame rip Itifanus ye, “Rife̱ riya ánerawe tá fe̱ natoon wan na nye katsak a?”

² Amma Itifanus fe̱ ye, “Ásho̱n be ároneng, wesek yin kuto tin fok yin. Adakunom a ta nye ayiik'e, ti wuruk na ada yir Ibrahim kum ne a rusek na aMasopotamiya nizham a tá ra se sor na aHaran.

³ Adakunom fe̱ be wu ye, ‘Dorok won kaben wan, be ánerawe wan, tá tseng kaye̱e̱r kaya mi tana ka no̱o̱k.’

⁴ “Iyong a dorok niben aCaldiya a tá se sor niben aHaran. Nama ada wu tá ku, Adakunom tú ku sak a ta be niben yin tin se yin kyo̱o̱rna.

⁵ Amma Adakunom no̱o̱k Ibrahim kutse rice wu aze ko cie̱k baꞌ. Adakunom ban a fe̱ ye wu tu ku no̱o̱k karo̱ be nabon wu. Nizen iyong Ibrahim be igon gum baꞌ.

⁶ Adakunom fe̱ be wu ye, ‘Inoon be nabon wan tà se sor átsen niben ikak. A tà se te ásam, a tà ka nyeen ba ma aye̱ iso̱k inyak inaas.’

⁷ Adakunom fe̱ ye, ‘Mi ta no̱o̱k áner kaben kaya á ta sak nabon wan tà te asam'ong risam. Nama anong, á tà bun á wuruk a tà bú á tin ya iben aze naro̱ na.’

⁸ Adakunom no̱o̱k Ibrahim kushu kunye izhak nong a tin yiring be ike̱ng iya ba tin sak. Kamok anong, nizen iya Ibrahim tá tes Ishaku a tú nye izhak nunom kufe ikara be kutes wu. A fa sor whe̱ ne Ishaku tes aYakub, aYakub ne a tes átukop yir ba áner kuso̱k be afa.

⁹ “Átukop yir kpaan rishishim be aYusufu yong a tú ku sok a tá re̱p a tá se te asam niben aMasar. Amma Adakunom se mak be wu.

¹⁰ A tú ku tun kaye̱e̱r koakye risam wu tin no̱. Adakunom no̱o̱k aYusufu kukyem kuya ku ta sak a tin se̱ ritek nufe aFiruna a ta nye agwo̱m aMasar, be kasa ne ike̱re̱ wu cice̱r.

¹¹ “Amaan izong no̱ niben aMasar ne niben aKenan, ánerawe no̱ kaye̱e̱r risam dide̱ng, átukop yir kyem á se̱ naya baba baꞌ.

¹² Nizen iya aYakub tá fok ye naya kuse na aMasar yong a tom inoon wu, kutseng ba tá tseng na aMasar kufe ime̱se̱ng'e yong.

¹³ Nutseng ba kufe afa, aYusufu wuruk kanang a tá tak áronyining kunik wu. Nizen iyong ne aFiruna ra ma ren kuri aYusufu gip.

¹⁴ Nama anong, ne aYusufu tom ye ada wu ra be̱ be inoon wu ne nabon wu niben aMasar cice̱r. Nizen iyong ne ba se áner iso̱k kanataar be atoon.

¹⁵ Ayong aYakub tseng na aMasar, azong ne a se ku, átukop yir kus azong gip.

¹⁶ A kok ikom ba a tú ku bun'e a se ne̱r'e na aShekem naro̱ are̱k Ibrahim tá no̱o̱k itso̱m ikak nong a tin shan karo̱'me nubo̱k inoon aHamor na aShekem.

¹⁷ “Izen tá fa be̱ bubarak Adakunom tana shining ike̱ng iya wu tá fe̱ ye wu tà nye Ibrahim'e, ne ánerawe yir, aner Isarela, tibarang kute whe̱re̱ dide̱ng ni iben aMasar.

¹⁸ A fa sor whe̱, ne aner akak ya rigwo̱m na aMasar.

¹⁹ A no̱o̱k áner yir áner Isarela risam dide̱ng ne a ka sak ba ye á ra barak izo̱k inoon ba nong ase̱ na tá kus.

²⁰ “Nizen iyong dim ne a tes aMusa, a nye igon afe a tá sas dide̱ng. A tú ku ne̱r nong a tin sak riye̱ ni wu kaye̱e̱r kasa atek wu ife̱n itaar.

²¹ Nizen a tú ku tun nufang, angas aFiruna tú sok a tú ku ta kyo̱ndi a nye igon wu.

²² A bo̱so̱p aMusa kukyem ne igo̱o̱n áner aMasar cei, ayong a te aner a tá be kuyiik kamok a ren kanu ne kunye ike̱ng.

²³ “Nizen iya aMusa tá te aye̱ iso̱k inaas be kutes, yong a sok kaye̱e̱r riye̱ wu ye wu ta se di áronyining wu áner Isarela

²⁴ A tá fa di aner aMasar akak ta sen nyeen be áronyining wu aner Isarela akak, yong a tseng a tá su ku shan ne a fe̱r aner aMasar ame a tú karang.

²⁵ aMusa sor ye áronyining wu áner Isarela ta ren ye Adakunom sen ninye itomong be wu a tá ka shesh ba nubo̱k áner aMasar. Amma áner Isarela ame ra ren anong baꞌ.

²⁶ Kaya katson'e aMusa ame se̱ áner Isarela afa se be kuren, ayong a tseng a ti te kanu kaye̱e̱r rife̱'me nong ase̱ a tá ka kaas ba. aMusa ame fe̱ be ba ye, ‘Ároneng, yin nye yin áner be aronyining so̱, akye̱ sak yin shim yin ta naka marang yin e̱?’

²⁷ “Aner aya a tá sen tsor afudang wu kaye̱e̱r ba tomong aMusa nukim'e nong a tá fe̱ be wu ye, ‘Angan tá sak wan ta te agwo̱m yir nong wan tanin sen ni to̱ yir amok e̱?

²⁸ Aser, wan shim tin fe̱r kyo̱ndi wan tá fe̱r aner aMasar ame nure e̱?’

²⁹ aMusa tá fa fok anong ne a wor a teng a tá be nuwo̱p aMidiyan a ta se sor ritsen azong ne a ku tes inoon atek nafa.

³⁰ “Nama aye̱ iso̱k inaas tá gor, amaleka ti wuruk na aMusa kaye̱e̱r rigyem kuro̱ng kaye̱e̱r kabuci kakak kaye̱e̱r katse bubarak be rifan aSinai.

³¹ aMusa tá fa di anong ne a te zhing. A tá fa serek bubarak nong a tá di gye̱r, yong a fok kuto̱ Agwo̱m Ágwo̱m tá fe̱ ye,

³² ‘Mi ne I nye Adakunom afe átukop wan, mi ne i nye Adakunom afe Ibrahim ne afe Ishaku be afe aYakub.’ aMusa wor a kpa kaben a tá kpaan kutiim, a ba kyem a sok rice naza nong a tá ye̱re̱k baꞌ.

³³ “Iyong Adakunom fe̱ be wu ye, ‘Tun akpatak wan, kamok karo̱ kaya wan ta min nyeseng nye Kazhe̱l'e.

³⁴ Mi n di amaan risam riya a tá nyesek ánerawe mi Isarela na aMasar, mi n fok kurus ba be risam. Kyo̱o̱rna mi tà ka tom ni iben aMasar.’

³⁵ “To̱, wu aMusa'me yong, ba tú ku rawu ne á fe̱ be wu ye, ‘Angan ne a ta sak wan ta te agwo̱m yir nong tin to̱ yir amok e̱?’ Adakunom be rice wu ne a tom aMusa nizen iya amaleka ti wuruk ni wu kaye̱e̱r rigyem kuro̱ng, nong a ta se shesh aner Isarela ne a te ako̱k kasho̱o̱n ba.

³⁶ aMusa'me ne a tá tun ba kaye̱e̱r kaben aMasar. A nye ike̱re̱ azhing be ife kukyem niben aMasar'e be na agbang kudung kuseng ze̱e̱r be iya a tá nye ife aye̱ iso̱k inaas kaye̱e̱r katse.

³⁷ “Wu aMusa'me yong ne a fe̱ be áner Isarela ye, ‘Adakunom tà ka tom yin aner kuzarap akak kaye̱e̱r yin aner Isarela kyo̱ndi a tin tom.’

³⁸ Wu ne a se mak be rigwo̱m inoon Isarela kaye̱e̱r katse ne a se mak be áda yir ne a se mak be amaleka aya a tá fe̱ kanu be wu natoon rifan aSinai. Wu ne a shan rife̱ Adakunom rife kutser a tá be̱ a tin no̱o̱k yir.

³⁹ “Amma áda yir ra gaar ku kufok kuto, a tú ku shonong ne a shim a tú ku bun ba na aMasar ingya.

⁴⁰ Á fe̱ be aHaruna ye, ‘Ni nye yir ike̱ng ikak iya yir tana ku ya yir iben nong i tin ko̱k yir kuse̱ kamok yir ren yir ka akye̱ ne i se̱ aMusa ne aya a tin tun yir na aMasar baꞌ.’

⁴¹ Nizen iyong ne ba no̱k ike̱ng ikak kyo̱ndi igon inyak nong a tú ku nye asidaka ne a to nato riye̱ rikan nasho̱o̱n ike̱ng iya ba tá nye be ibo̱k ba ame.

⁴² Amma Adakunom tú kirik ba kama a tú ku won ba a tá ya ike̱re̱ iya i tá se natoon kaza iben, kyo̱ndi a tá zibir nufumung aner kuzarap ye, “ ‘Yin áner Isarela, sang mi ne yin ti nye yin asidaka kaye̱e̱r katse afe aye̱ iso̱k inaas baꞌ.

⁴³ Wayo, yin tiyiik yin karo̱ itsi aMolek ne adar adakunom yin aRamfan be ike̱re̱ iya yin tá nye yin nong tú ku ya yin ba iben. Kamok anong mi tà sak yin ta se te yin ásam’ kasho̱o̱n be aBabila.

⁴⁴ “Átukop yir be kubur kuya ku tá tonong ye Adakunom se mak be ba kaye̱e̱r katse. Á nye kubur'e kyo̱ndi Adakunom tá fe̱ be aMusa, tite̱re̱ be kuri ike̱ng iya a tá tonong aMusa.

⁴⁵ Áda yir shan karo̱ kuya Adakunom iben'e nizen iya aZhoshuwa tá nye ako̱k kasho̱o̱n ba á ta tseng'e naro̱ kaya Adakunom tá ro áner akak nong a tá ka no̱o̱k ba karo̱'me. Kubur'e fan azong ma nizen iya aDauda tà te agwo̱m.

⁴⁶ Dauda se̱ ritek Adakunom dide̱ng aDauda yong a fe̱ be wu ye a ru ku won nong a tá no̱k Adakunom afe aYakub kutu a tana ku ya mo iben.

⁴⁷ Amma aSolomon ne a ra no̱k kutu kuya Adakunom iben'e.

⁴⁸ “Gip be anong, sang Adakunom a ta nye ayiik'e, sor kaye̱e̱r nasa naya ánerawe ne tá no̱k baꞌ, kyo̱ndi aner kuzarap tá fe̱ ye,

⁴⁹ “Agwo̱m Ágwo̱m fe̱ ye, ‘Kaza ne ka nye itsik rigwo̱m mi, kaben nye ike̱ng kusak atak'i. Akye̱ kuri kasa ne wan tse̱r tin no̱k'e e̱? Ka ake̱ ne karo̱ kufan'i se e̱?

⁵⁰ Sang mi ne i nye ike̱re̱ na peer kaye̱e̱r kukyem'i aꞌa?’

⁵¹ “Yin áfe i ta shonong yin, be aye kyo̱ndi kuta, aya ato yin ta se nikpa! Yin tas yin átukop yin. Yin gaar ku kuus yin rife̱ Kabik Kazhe̱l'e koakye izen.

⁵² Aner Kuzarap anyaka ne átukop yin won dar a ku nyeen e̱? Átukop yin fe̱s aner aya a tá zarap kube̱ Azhe̱l'e. Kyo̱o̱rna yin mu ku fe̱r yin.

⁵³ Yin ne i shan yin Itsi Adakunom iya a tá no̱o̱k nubo̱k ámaleka, gip be anong yin kuus yin ike̱ng iya Itsi'me tá fe̱ baꞌ.”

Á barak Itifanus be ata

⁵⁴ Ayong ba tá fa fok anong ne aye̱ ba fuus ma á ro̱s ibo̱k.

⁵⁵ Amma Itifanus a tan shining be Kabik Kazhe̱l'e sok anyisi wu naza a tá ye̱re̱k kaza. Ne a di kuyiik Adakunom, ne a di aYeso tan nyeseng nubo̱k riya Adakunom.

⁵⁶ Ayong Itifanus'e fe̱ ye, “Di yin, mi di kaza nukarak ne mi di Igon Anerawe tan nyeseng nubo̱k riya Adakunom.”

⁵⁷ Amma ba tá fa fok anong, ayong á fam ato ba be ibo̱k ne a korok ikun, á ta sen kpa natoon Itifanus nizen izining cice̱r ba.

⁵⁸ Á tú ku ko̱k a tá tun nama kuwo̱p'e, nong á tá kpaan ku kubarak be ata. Ánerawe aya a tá kuus kama kufe̱r Itifanus'e be̱ korok ares ba natak acam akak a tú ku yis ye Ashawulu.

⁵⁹ Nizen iya á tá san ku barak be ata ne Itifanus nye aduwa a tá fe̱ ye, “aYeso Agwo̱m Ágwo̱m, shan kutser'i.”

⁶⁰ Ayong a tigbok akuur a tá ta kuto̱ naza ye, “Agwo̱m Ágwo̱m, tu fa rine̱n na natoon ba baꞌ.” A tá fa fe̱ anong ne a kpa kaben a tá ku.