Itomong Ámanzo 5 - Izere New Testament

Ananiya be aSafiratu

¹ Amma aner akak tuse a tú ku yis ye Ananiya mak be abining wu aSafiratu, re̱p ike̱ng ikak wu tá be.

² Ayong a bo̱ itso̱m'e a tá sak nong a tá tseng be ribir'e nasho̱o̱n ámanzo. Abining wu ren koakye ike̱ng iya wu tá nye.

³ Ayong aBitrus fe̱ be wu ye, “Ananiya, akye̱ sak wan won Ishetan tá no̱ kaye̱e̱r riye̱ wan ma a tá ka sak wan bo̱ Kabik Kazhe̱l'e abo̱o̱s i tá sak ribir itso̱m karo̱ wan tá re̱p nukim e̱?

⁴ Riko̱'me tsang ri nye rifuan nizham wan tá ra re̱p aꞌa? Akye̱ sak wan tá nye ike̱ng kuri iyuna e̱? Wan bo̱ Adakunom abo̱o̱s sang anerawe ne wan tú bo̱ abo̱o̱s baꞌ.”

⁵ Kum Ananiya tá fa fok anong ne a kpa kaben a ta wor a ku. Ánerawe aya a tá fok ike̱ng'ong fok inyim dide̱ng.

⁶ Áyong acam be̱ á kunung kukom'e be kures á tá sok á se ne̱r'e.

⁷ Amma a tá fa sor cie̱k ne abining wu be̱ a no̱ dar kuren ike̱ng iya i tan se̱ amitek wu.

⁸ Ayong aBitrus tú ku rip ye, “Igak itso̱m iya yin ta se̱ yin natoon karo̱ kaya yin tá re̱p yin be amitek wan na a?” Iyong a fe̱ ye, “Ei, igak itso̱m'e yong.”

⁹ Ayong aBitrus fe̱ be wu ye, “Akye̱ sak wan ta nyim kanu be amitek wan nong i ta bo̱mo̱ng yin Kabik Agwo̱m Ágwo̱m e̱? Di, áner aya a tá ne̱r amitek wan'ong nanukutu, ba ta ka sok nong a ta wuruk'e gip.”

¹⁰ Nizen iyong a wor a kpa kaben natak aBitrus, a tá ku. Ácam aya a tá ne̱r amitek wu'me tá fa no̱ ne á di a tan ku, yong á tú ku sok á tá se ne̱r nukim kure̱k amitek wu.

¹¹ Áfikuus be ribir anerawe aya a tá fok itak'e wor á fok inyim makiyi.

Ámanzo sak ánerawe whe̱r tá te atser

¹² Ámanzo ame nye ike̱re̱ azhing be ife kukyem dide̱ng kaye̱e̱r ánerawe. Ne áfikuus cice̱r nyiis nubang kukak nutu aduwa á ta yis ye, Kubang aSolomon.

¹³ Ánerawe tá ka ye̱re̱k ba yiik gye̱rtatan, akak ra kyem a tsibik riye̱ nong a tin no̱ kaye̱e̱r ba baꞌ.

¹⁴ Gip be anong, ánerawe dide̱ng ti barang ku nino̱o̱k katsak na Agwo̱m Ágwo̱m ma áfikuus te whe̱r.

¹⁵ Itomong ámanzo tá nye sak ánerawe be̱s be áfe iro̱k ne á ku saas ba ni ike̱re̱ kameneng nong ase̱ nawu aBitrus tin kpa natoon ba nizen iya tana gor.

¹⁶ Ánerawe dide̱ng nes ni iwo̱p i ta se bubarak be aUshalima a tá be̱s be áfe iro̱k be áya a ta be amaan nabik, ayong a tá ka sak ba á te atser cice̱r ba.

Ámanzo so̱ risam kamok kuno̱o̱k katsak baꞌ

¹⁷ Iyong agbang atsi be áfudang aya a tá nye áner aSadusi kpaan rishishim itomong ámanzo ta nye dide̱ng.

¹⁸ Kamok anong, á nong a tá yising ámanzo'me, a tase ka te ba nitso̱m.

¹⁹ Amma natuk amaleka Agwo̱m Ágwo̱m be̱ a tá ka karak ba kanukutu itso̱m'e, a tá ka tun ba nufang,

²⁰ a tá fe̱ be ba ye, “Tseng yin kaye̱e̱r kubang agbang kutu kuya Adakunom iben nong tá taas yin ánerawe Rife̱ Kutser na.”

²¹ Kadiding tá fa karak ne ba se no̱ kaye̱e̱r kubang agbang kutu kuya Adakunom iben ne á kpaan kubo̱so̱p ánerawe'me. Agbang atsi tá fa be̱ be áfudang wu ne á yis kanyim áko̱k kasho̱o̱n ne ásho̱n áner Isarela cice̱r, a tá tom ye á ra tun ámanzo ni itso̱m nong a ta ka be̱e̱n ba'me.

²² Amma áner aya a tá ka tom ba ame tá fa tseng nutu itso̱m'e ko á se̱ ámanzo ame baꞌ. Ayong a tú ku bun á tá se tak kuto̱'me ye,

²³ “Yir se se̱ yir an tikpaf kutu itso̱m'e, áner aya a tá fek kutu itso̱m'e se be kufek nanukutu gip gye̱r. Nizen iya yir tá karak yir nanukutu'e, ko yir se̱ yir akak kaye̱e̱r'e baꞌ.”

²⁴ Ako̱k kasho̱o̱n áfe a tá fek agbang kutu kuya Adakunom iben'e ne áner aSadusi tá fa fok anong, á daam dide̱ng ne á to̱ ye ka akye̱ ne n se̱ ámanzo'me e̱?

²⁵ Ayong áner ákak be̱ á fe̱ be ba ye, “Áner aya yin tá ka te yin ba nitso̱m ame sen bo̱so̱p ánerawe'me nubang agbang kutu kuya Adakunom iben.”

²⁶ Nizen iyong ako̱k kasho̱o̱n áfe a tá fek agbang kutu kuya Adakunom iben tseng be áfek'e akak nong á ta se be̱e̱n be ámanzo ame, amma sang á tú ku tonong ba agap baꞌ, kamok á fok inyim fan ánerawe ba ka barak ba be ata.

²⁷ Nizen iya á tá be̱e̱n ámanzo'me ne á tseng be ba nasho̱o̱n kusong áko̱k kasho̱o̱n ne ásho̱n áner Isarela. Ayong agbang atsi kpaan rife̱ be ba ye,

²⁸ “Yir fe̱ yir be yin ye, sang tu bo̱so̱p yin ánerawe'me kaye̱e̱r riyerek na baꞌ, gip be anong, yin n no̱ yin koake̱ kaye̱e̱r aUshalima ne i bo̱so̱p yin ánerawe'me. Yin shim tin tomong yir rine̱n aner na ye naso̱k wu se nubo̱k yir.”

²⁹ Ayong aBitrus be ribir ámanzo ame fe̱ ye, “Yir ta kuus yir ike̱ng iya Adakunom ta fe̱ dim, sang ife anerawe baꞌ.

³⁰ Adakunom átukop yir dorok aYeso nure̱k, aya yin tú ku fe̱r yin, i tú ku tigak yin nukon.

³¹ Adakunom tu no̱o̱k kuyiik a tu ku sak nubo̱k riya wu nong a ta sor áko̱k kasho̱o̱n ne a sor aner kashesh nong a ta sak áner Isarela ta shishing kuse ba ne a ka re̱ng ba rine̱n ba.

³² Yir ne i nye yir áfe ku taas ike̱ng iya Adakunom tá nye kamok yir di yir be anyisi yir, Kabik Kazhe̱l'e kaya Adakunom ta no̱o̱k áfe a ta kuus rife̱ wu fe̱ anong gip.”

³³ Áko̱k kasho̱o̱n ame tá fa fok anong ne aye̱ ba fuus ma á ti sak ye a ta ka fe̱s ba.

³⁴ Amma aner aFarisi'me akak aya a ta bo̱so̱p itsi a tú ku yis ye aGamaliya, aya ánerawe cice̱r tú ku di yiik, a dorok a tá nyeseng naro̱ kanyim'e a tá fe̱ ye, a ra tun ámanzo'me nufang cie̱k nizham.

³⁵ A fe̱ be ba ye, “Aroneng áner Isarela, nye yin tatan be ike̱ng iya yin ta shim ta nye yin be áner name.

³⁶ Kaye̱e̱r aye̱ afe a tá gor, aner akak aya a tú ku yis ye aTudas be̱ a tá tonong ye wu nye akak'e. Ánerawe kyo̱ndi kuso̱k inyak inaas kuus kama wu, amma nizen iya a tú ku fe̱r, ánerawe'me te shaam ne rifuba gang azong.

³⁷ Nama anong, aner aGalili akak aya a tú ku yis ye aYahuda bun a be̱ nizen iya a tana fa ánerawe. A sak ánerawe whe̱re̱ tá kuus kama amaan kunye wu. Wu gip a tú fe̱r, áner aya a tá kuus kama wu cice̱r te shaam.

³⁸ Kamok anong, natoon iyu name, mi tá ka no̱o̱k yin ibo̱ro̱ng. Ka won yin ba kyo̱o̱n. Ke ike̱ng iya ba ta nye na nye ife kuro̱m tsek, to̱, i tà gor.

³⁹ Amma ke ike̱ng iya ba ta nye na ne nufe Adakunom, yin tà kyem i ka roon yin ba'me baꞌ. Yin ta ko̱n yin be Adakunom kpe̱de̱ng tsek.”

⁴⁰ Ike̱ng iya aGamaliya tá fe̱'ong no̱ kaye̱e̱r aye̱ ba, ayong á shim rife̱ wu. Ayong a yis ámanzo'me kaye̱e̱r'e, a tá sak a tá ka whereng ba, nong á ta fe̱ be ba ye á tu ba fe̱ ike̱ng ikak kaye̱e̱r riyerek aYeso ko cie̱k baꞌ. Ne á ku won ba á tá tseng.

⁴¹ Ámanzo dorok azong be riye̱ rikan kamok a tá di ba kyem a ta ka no̱o̱k ba risam kamok riyerek aYeso.

⁴² Koakye katuk ámanzo yiir tsang á no̱o̱s ninasa ánerawe ne kaye̱e̱r kubang agbang kutu kuya Adakunom iben ne á taas Rife̱ Ritek ye aYeso ne a nye aKiristi'me.