Itomong Ámanzo 25 - Izere New Testament

A bun a te kukun aBulus nufe aKaisar

¹ To̱, nama aFestus ta be̱ naro̱ kaya wu tana kunye rigwo̱m be kuko̱s kutaar, yong a dorok na aKaisariya a tá be na aUshalima.

² Iyong ágbang átsi be áko̱k kasho̱o̱n áner aYahuda tseng be kukun aBulus nufu.

³ Á nye aFestus akusuk ye a ra ro̱ riye̱ ba nong a tu ku bun be aBulus na aUshalima kamok ba n ne̱re̱ng niren nong á ta fe̱r aBulus'e.

⁴ aFestus fe̱ be ba ye, “A n te̱ne̱ng aBulus na aKaisariya. Mi be azong be rice mi kaye̱e̱r inom na gip.

⁵ Won áko̱k kasho̱o̱n yin ákak tin kuus ta tseng yir mak nong tá se te yir kukun wu azong ke an nye ike̱ng ikak imaan'e.”

⁶ Nama a ta te kyo̱ndi inom ikara ka kuso̱k be ba, ne a wesek na aKaisariya. Kaya katson'e a sonong ni itsik amok a ta sak a tú ku be̱e̱n aBulus.

⁷ Nizen iya aBulus tá be̱ áner aYahuda aya a tá ne na aUshalima be̱ á tú ku gorok. Á fe̱ iriri ike̱re̱ imaan'e natoon aBulus iya ba ta kyem a tonong ye aBulus nye ike̱re̱ iyong katsak'e baꞌ.

⁸ Amma aBulus tor rice wu, a tá fe̱ ye, “Mi bur Itsi áner aYahuda nabas akak baꞌ, ka i nye ike̱ng ikak imaan'e natoon agbang kutu kuya Adakunom iben ka i nye aKaisar rine̱n baꞌ.”

⁹ Amma aFelis wu tá shim a ta kare̱p áner aYahuda riye̱ a fe̱ be aBulus ye, “Wan ta shim a ta tseng be wan na aUshalima nong a ta se fe̱ rife̱ na nasho̱o̱n'i a?”

¹⁰ Iyong aBulus fe̱ ye, “Mi se nasho̱o̱n karo̱ kuto̱ amok aKaisar, i se gye̱r a tin to̱ amok aze. Sang mi n nye áner aYahuda rine̱n baꞌ, kyo̱ndi wan be rice wan ta ren.

¹¹ Ke mi n nye rine̱n rikak riya ri ta kyem a tanin fe̱r, sang mi gaar riku baꞌ. Amma ke ike̱re̱ áner aYahuda tin te kukun'i nye abo̱o̱s, akak kyem a tin sok a tu ku no̱o̱k ba baꞌ. Mi nye kukun nufe aKaisar.”

¹² Nama aFestus tá nye ibo̱ro̱ng be áko̱k kasho̱o̱n wu ákak, ne a fe̱ ye, “Wan ta fe̱ ye a ra tseng be wan nufe aKaisar, to̱, tseng nufe aKaisar'e.”

aBulus nasho̱o̱n Agaribus ne aBanis

¹³ Á tá fa te inom cie̱k ne Agwo̱m Agaribus ne aBanis tseng na aKaisariya á tá se nye aFestus adazha be kube̱.

¹⁴ Kum i ta se ye ba tá te inom gaan azong, yong aFestus tú ku tak ba itak natoon aBulus. A fe̱ be ba ye, “Aner akak kuse aze aFelis tu ku won nitso̱m.

¹⁵ Nizen iya mi tá tseng na aUshalima, ágbang átsi be áko̱k kasho̱o̱n áner aYahuda te kukun wu nunaan ne á fe̱ ye a ru ku fe̱r.

¹⁶ “Iyong mi tú ku tak ba ye i nye igo̱o̱n yir áner aRom nong ta te̱n yir anerawe amok ana tsek, dar ku kuno̱o̱k yir izen nong a ta fe̱ kuto̱ kufu ba'.

¹⁷ Nizen iya áner aYahuda'me tá be̱ nunaan, mi beseng izen baꞌ. Mi no̱ naro̱ kuto̱ amok'e naya katson'e, i tá fe̱ ye á ra be̱e̱n be wu.

¹⁸ Nizen iya áner á ta te kukun wu'me tá dorok á tá fe̱ kanu, sang á fe̱ ye an nye ike̱ng ikak imaan'e iya mi tá sor ye mi tá fok nufuba baꞌ.

¹⁹ Á ban á fe̱ ike̱re̱ ikak natoon iren ba ta kuus be itak aner akak a tan ku a tú ku yis ye aYeso aya aBulus tá fe̱ ye a nye atser.

²⁰ Mi ren ka ane̱ ne mi ta to̱ rife̱ kuri riyu baꞌ. Kamok anong, mi tú ku rip ye ka wu ta shim a ta tseng na aUshalima nong a ta su ku to̱ amok'e azong e̱?

²¹ Amma nizen aBulus'e ta nye izong ye a ra tseng be wu nasho̱o̱n aKaisar yong mi fe̱ ye a ru ku won nuwhe̱e̱n ma nizen iya mi tana kyem i tseng be wu nufe aKaisar'e.”

²² Iyong Agaribus fe̱ be aFestus'e ye, “Mi shim ta fok rife̱ aner na be rice mi.” Iyong aFestus fe̱ be wu ye, “Wan tu ku fok natson.”

A tseng be aBulus nasho̱o̱n Agaribus

²³ Kaya katson'e Agaribus be aBanis ne áritek ákak be kusonong kuwo̱p'e be̱ á tá no̱ na agbang kutu ánerawe tu ku nyiis. Nizen iya á tá no̱ ánerawe tú ku tiyiik ba dide̱ng. Iyong aFestus sak a ta be̱e̱n aBulus.

²⁴ aFestus fe̱ ye, “Adagwo̱m Agaribus be ribir ánerawe aya á ta se aze mak be yir, yin di yin aner na wa? Áner aYahuda nye kukun wu nunaan na aUshalima be aze na aKaisariya. A korok ikun ne á fe̱ ye, aner na tas aner ya a tana ku won be kutser baꞌ.

²⁵ Amma mi ra di a nye ike̱ng i ta taas a tana ku fe̱r baꞌ, mi min sak ye a ta tseng be wu na aRom kamok wu ta te kukun nufe aKaisar.

²⁶ Mi ra be ike̱ng ikak dim iya mi tana zibir adagwo̱m'me natoon wu baꞌ. Kamok anong ne mi n be̱ be wu nasho̱o̱n yin cice̱r abanang wan Adagwo̱m Agaribus baꞌ, nong ase̱ mi ta se̱ ike̱ng iya mi tana zibir natoon wu nama i tan ye̱re̱k yir rife̱'me.

²⁷ Mi di ye i se gye̱r mi tana tom aner aya a tan whe̱e̱n dar kutonong rine̱n aner'e baꞌ.”