Itomong Ámanzo 22 - Izere New Testament

¹ “Áda be ároneng, wesek yin kuto nong ta fok yin kuto̱ kunaan.”

² Á tá fa fok a tá fe̱ nirem áner aRaniya yong a ti barang ku te gbik. Iyong aBulus fe̱ ye,

³ “Mi nye aner aYahuda, a ti tes na aTarsus niben aKilikiya, amma mi ta aze nuwo̱p na. Mi fa afumung nubo̱k aGamaliya, aya a tin bo̱so̱p itsi átukop yir. Mi ti be ifeng dide̱ng ninye itomong Adakunom kyo̱ndi yin ta be yin katuur.

⁴ Mi tabak áfe a ta kuus Iren na dide̱ng ma i tu fe̱s ba. Mi yising atek be ányining ne i ku tes ba nitso̱m.

⁵ Agbang atsi be áko̱k kasho̱o̱n yir cice̱r ta kyem a tonong ye mi nye anong. Mi se̱s afumung nubo̱k ba i tin tseng nufe ároneng yir áner aYahuda na aDamaskus. Mi tseng nong ta se̱ yising áfe a ta kuus Iren na azong nong ta be̱ be ba na aUshalima nong á tu ku to̱ ba amok.

aBulus tak iren iya wu tá te afikuus

⁶ “Nizen iya mi ta se be kutseng, mi tá be̱ barak tá no̱ na aDamaskus, nabas katite kunom, akanang ne naza a ti samang ni mi.

⁷ Mi kpa kaben, ne i fok kuto̱ kukak ku ta fe̱ be mi ye, ‘Ashawulu, Ashawulu, akye̱ sak wan ti tabak e̱?’

⁸ “Iyong mi tú ku rip ye, ‘Wan nye angan Agwo̱m, Agwo̱m e̱?’ “A fe̱ ye, ‘Mi ne i nye aYeso afu aNazaret aya wan ta sen ku tabak.’ ”

⁹ áfe a ta se mak be mi di akanang'e, amma á ren ike̱ng aner'e a ta fe̱ be mi baꞌ.

¹⁰ Iyong mi tú ku rip ye, “ ‘Akye̱ ne wan shim mi ta ka nye'me Agwo̱m Ágwo̱m e̱?’ Iyong a fe̱ be mi ye, ‘Dorok ta no̱ na aDamaskus. Azong ne a tà ka tak koakye ike̱ng iya wan tanin nye'me.’

¹¹ Áner aya a ta se mak be mi ne á ti ko̱k kubo̱k i tá no̱ yir na aDamaskus kamok akanang'e sak mi te akpato̱o̱n'e.

¹² “Ayong aner akak a tu ku yis ye Ananiya be̱ nong a tin di. A nye aner a ta kuus Itsi dide̱ng aya áner Isarela cice̱r a ta se na aDamaskus tu ku di yiik.

¹³ A be̱ a nyeseng bubarak be mi a tá fe̱ ye, ‘Aroneng Ashawulu, se̱ ku di karo̱.’ Nizen iyong dim ne anyisi mi karak ma mi tú di.

¹⁴ “Iyong Ananiya'me fe̱ be mi ye, ‘Adakunom átukop yir ma ka kasa nong ta ren ike̱ng iya wu ta shim. Wan ta di Aner Azhe̱l'e na, ne i fok rife̱ wu.

¹⁵ Kamok wan tà sor asheda wu nufe ánerawe cice̱r natoon ike̱ng iya wan tá di ne i fok.

¹⁶ To̱, kyo̱o̱rna akye̱ ne wan ru tor e̱? Dorok nong a ta ka nye abatisma ku kusu rine̱n wan, kaye̱e̱r riyerek Agwo̱m Ágwo̱m.’

¹⁷ “Nizen iya mi tú ku bun na aUshalima, mi ta se be kunye aduwa kaye̱e̱r agbang kutu kuya Adakunom iben, ne mi di ike̱ng ikak kyo̱ndi nabos.

¹⁸ Mi di Agwo̱m Ágwo̱m tá fe̱ be mi ye, ‘Nye gbashak ta wor dorok na aUshalima zizirik kamok á tà shan ike̱ng iya wan tana taas natoon'i baꞌ.’

¹⁹ “Iyong mi fe̱ ye, ‘Agwo̱m Ágwo̱m, áner na ren ye mi tsang i tsees natu aduwa iben ze̱r ze̱r ne i whe̱se̱ng áner á ta min no̱o̱k katsak ni wan nitso̱m ne i ka tsosok ba.

²⁰ Nizen iya a tá nyosong naso̱k asam wan Itifanus, mi ti se azong nunyeseng i ta kuus kama ike̱ng iya a ta nye. Mi ti sak riye̱ na ares áner aya a tú ku fe̱r.’

²¹ “Iyong Agwo̱m Ágwo̱m'me fe̱ be mi ye, ‘Mi ta ka tom tsik nufe áner aya sang a ta nye áner aYahuda baꞌ.’ ”

A te aBulus ni itso̱m

²² Ánerawe foos ike̱re̱ aBulus tá fe̱ cei. Nizen iya a tá fe̱ itak kutseng nufe áner aya a ta nye aner aYahuda baꞌ, ne á ta kuto̱ naza á tá korok ikun ye, “A ku fe̱r. A tas aner a tana ku won be kutser baꞌ.”

²³ Ayong á korok ikun ne a turung akpiin ba á tá wum ne á mis iben naza.

²⁴ Aritek asozha ame sak a tá no̱ be aBulus naro̱ itomong ba. A sak a tú ku whereng ne a ku risim ike̱ng iya i tá sak ánerawe tin korok ikun natoon wu anong.

²⁵ Amma nizen iya á tú ku rosom nong á tú ku whereng, yong aBulus fe̱ be agbang aritek asozha'me akak a tá se azong ye, “I se gye̱r yin tana whereng yin aner aRom dar ku kuto̱ amok a?”

²⁶ Nizen iya aritek asozha'me tá fa fok anong ne a tseng nufe aritek ba a tá se fe̱ be wu ye, “Tatan be ike̱ng iya wan ta tse̱r ta nye. Aner na nye aner aRom.”

²⁷ Iyong aritek asozha'me tseng nufe aBulus a ta se fe̱ be wu ye, “Ni tak katsak'e, wan nye aner aRom a?” Ne aBulus fe̱ ye, “Ei.”

²⁸ Aritek asozha'me fe̱ ye, “Mi karang itso̱m whe̱r nizham i ta ra te aner aRom.” Iyong aBulus fe̱ ye, “Amma mi nye kutes aner aRom dim.”

²⁹ Áner aya a tá shim á ta kpaan ku kurisim ike̱re̱ wor á tú won. Aritek asozha'me be rice wu gip a fok inyim kamok wu rosom aBulus a ta nye aner aRom.

aBulus nasho̱o̱n kusonong áko̱k kasho̱o̱n

³⁰ Kaya katson'e, aritek asozha'me bisik aBulus kamok wu tá shim a ta ren ka akye̱ dim ne i sak áner aYahuda tin korok ikun na aBulus'e, ayong a sak ágbang atsi ne kusonong ba cice̱r ye á ra nyim. Ne a be̱ be aBulus nasho̱o̱n ba.