Itomong Ámanzo 19 - Izere New Testament

aBulus na Afisa

¹ Izen iya Apolos ta se na aKoranti, aBulus kuus iren i ta gor kaye̱e̱r kuwo̱p a ta be na Afisa. A se se̱ álimazhiri ákak azong

² ne a ka rip ba ye, “Yin se̱ yin Kabik Kazhe̱l'e nizen iya yin tin no̱o̱k yin katsak a?” Iyong á fe̱ ye, “Wayo, yir kun fok yir itak Kabik Kazhe̱l'e gum baꞌ.”

³ Iyong aBulus bun a tú ku rip ba ye, “To̱, akye̱ kuri abatisma ne a tá ka nye yin'e e̱?” Ne ba fe̱ ye, “aBatisma aYohana tá nye ánerawe'me.”

⁴ aBulus fe̱ ye, “aBatisma aYohana tá nye, a nye afe kushishing kuse. aYohana taas ánerawe ye á rin no̱o̱k katsak natoon aner a tana be̱ nama wu, aner'e nye aYeso.”

⁵ Ba tá fa fok anong ne a ka nye ba abatisma kaye̱e̱r riyerek Agwo̱m Ágwo̱m yir aYeso.

⁶ Nizen iya aBulus tin sak ibo̱k ritek natoon ace ba ne Kabik Kazhe̱l'e ni tiik natoon ba ne á fe̱ kanu ni írem iduk ne a nye kuzarap.

⁷ Á se áner kuso̱k be afa cice̱r ba.

⁸ aBulus te ife̱n itaar ne a tsees nutu aduwa a tá nye awazi Rife̱ Ritek dar inyim natoon rigwo̱m Adakunom niren iya i tana ko̱ro̱k aye̱ ánerawe.

⁹ Ákak ba shonong á ta gaar ku nino̱o̱k katsak ne á fe̱ kye̱re̱ natoon iren Adakunom nasho̱o̱n ánerawe. Kamok anong aBulus dorok a tú ku won ba azong a tá tseng mak be áfikuus, a se ánerawe'me kaye̱e̱r agbang kutu aTiranus.

¹⁰ A yiir kunye anong ma a te aye̱ afa. Iyong sak áner aYahuda ne áner aHeleni áya a ta sor niben Asiya cice̱r fok rife̱ Adakunom.

Inoon aSiba

¹¹ Adakunom nye ike̱re̱ azhing dide̱ng iya a tá kun di baꞌ be aBulus,

¹² Ko ke a sok ike̱ng ire̱ng kutsin wu ka kukpiin kuya ku ta ra kuro̱mwu, ke a se no̱o̱k áya a ta nye atser baꞌ, ne á te atser ne itseng kam be aner'e.

¹³ Iyong áner aYahuda akak áya a ta tseng á kar kaye̱e̱r kuwo̱p ne a turung ítseng kpaan ku ni nye itomong be riyerek Agwo̱m Ágwo̱m yir aYeso natoon aya a ta be itseng. Ne á fe̱ ye, “Kaye̱e̱r riyerek aYeso na aya aBulus ta nye awazi wu, mi fe̱ be yin, wuruk yin.”

¹⁴ Inoon agbang atsi áner aYahuda akak a tú ku yis ye aSiba, acam kanataar ne á nye anong.

¹⁵ Amma amaan kabik'e fe̱ be ba ye, “Mi ren aYeso, mi ren aBulus gip. Yin ne̱? Yin nye yin ángan e̱?”

¹⁶ Iyong aner a ta be amaan kabik'e tikpa niba, a nar agap ba cice̱r. A tú ku tsor ba ma a tú marang ba dide̱ng, ma a wuruk be itsi kaye̱e̱r kasa'me ikpang ikoor.

¹⁷ Nizen iya áner aYahuda be áner aHeleni áya a ta sor na Afisa tá fa fok itak'e, koangan ba fok inyim dide̱ng, yong á tiyiik ba riyerek Agwo̱m Ágwo̱m yir aYeso dide̱ng.

¹⁸ Áner áfe a tin no̱o̱k katsak nizen iyong wuruk whe̱re̱ á tá taas amaan kunye ba gbugbang nasho̱o̱n ánerawe.

¹⁹ Ákak kaye̱e̱r afe a tá nye kubok gbugbang be̱s be akpa kubok ba naro̱ kazining nong a tá shosh nasho̱o̱n ánerawe. Nizen á tá fa itso̱m akpa'me, i kyem itso̱m itomong alebura tana se̱ kaye̱e̱r inom izungu iso̱k itoon (50,000).

²⁰ Anong ne rife̱ Agwo̱m Ágwo̱m ti barang kuno̱ koake̱, ne ri kpa agap dide̱ng.

²¹ Nama ike̱re̱ na tá gor, aBulus ti sak kaye̱e̱r riye̱ wu ye wu ta gor kaben aMakidoniya ne Akaya nong a ta tseng na aUshalima. A tá bu a fe̱ ye, “Nama mi ta tseng azong, ma mi tseng na aRom gip.”

²² Iyong a tom áner afa aya a tú ku se̱ mo ni itomong, aTimoti be Arastus nong á ta tseng na aMakidoniya. Wu sor niben Asiya cie̱k gak.

Kuren dorok na Afisa

²³ Kaye̱e̱r inom iyong amaan kuren dorok natoon Iren na.

²⁴ Atu akak tuse azong riyerek wu tá nye aDemetiriyus. A tu ike̱re̱ izinariya ife karo̱ kubok Atemis. Áner afe a tá tu ike̱re̱'me ti se̱s itso̱m dide̱ng.

²⁵ aDemetiriyus tú ku yis ba cice̱r be áner aya a tá nye itomong kuri iyong naro̱ kazining. A fe̱ be ba ye, “Aro̱, yin ren ye yir ti se̱s yir itso̱m dide̱ng ni itomong na.

²⁶ Yin di yin ne i foos yin ike̱re̱ iya agya na aBulus ta nye a tan ko̱ro̱k aye̱ ánerawe ne a sak áner Afisa whe̱re̱ ta shaam, katsak'e áner iben Asiya n shaam.

²⁷ Agbang kudaam kuse, rizhik yir ta kpa amaan riyerek. Ánerawe ta zhe̱e̱sh karo̱ kuya iben kunom yir Atemis ayiik'e. Kuyiik kunom yir be rice wu aya a tu ku ya iben koake̱ kaye̱e̱r iben Asiya ta kpa.”

²⁸ Á ta fa fok anong, ne aye̱ ba fuus ne á kpaan ku tasak ye, “Kuyiik nye kufe Atemis afe áner Afisa.”

²⁹ Azong ne ikun wor no̱ koake̱ kaye̱e̱r kuwo̱p'e. Iyong rigwo̱m ánerawe se yiir aGayus be Aristakus a tá nye áner aMakidoniya aya a tá tsang a tseng mak be aBulus. Á tseng be ba nazu zizirik kyo̱ndi aner azining.

³⁰ aBulus shim ke a fe̱ kanu be rigwo̱m ánerawe'me, áfikuus ra ku roon'e.

³¹ Áko̱k kasho̱o̱n kaben Asiya'me ákak gip aya a tá nye áfertseng aBulus tom nufu á tú ku nye akusuk ye sang a tú wher a ta tseng nazu'me baꞌ.

³² Ánerawe aya a tá nyim te titak. Ákak fe̱ ike̱ng ikak ne ákak fe̱ ikak ze̱e̱r. Kukap ánerawe'me ren ka akye̱ sak ánerawe tá nyim azong gum baꞌ.

³³ Áner aYahuda tomong Alekzanda nasho̱o̱n rigwo̱m ánerawe'me. Iyong a sok kubo̱k naza ye á ra te gbik nong ase̱ wu ta tak kuto̱ kufu nasho̱o̱n ba.

³⁴ Á tá fa ren ye a nye afu aYahuda, yong á tasak cice̱r ba nizen izining á tá fe̱ ye, “Kuyiik nye kufe Atemis afe áner Afisa.”

³⁵ Amma aner izibir kuwo̱p'e fe̱ be ánerawe'me ye á ra te gbik, yong á fe̱ ye “Karo̱ kunye itsi Atemis be kuyiik wu ku ta ne naza ku kpa kaben se kaye̱e̱r agbang kuwo̱p na.

³⁶ Kamok anong, kum akak tana kyem a ton'e baꞌ, i ta se gye̱r ke yin te yin gbik sang ke i wor i nye yin ike̱ng ikak kpe̱de̱ng tsek baꞌ.

³⁷ Yin be̱e̱n yin áner na aze sang á nye itsang ike̱re̱ naro̱ itsi ka á zhe̱e̱r Atemis aya a tú ku ya yir iben baꞌ.

³⁸ Amma ke aDemetiriyus be áfe itomong wu be rife̱ be akak, karo̱ amok kuse be áfe kuto̱ amok'e. Á ra se nye kukun'e.

³⁹ Amma ke ike̱ng ikak kuse ze̱e̱r iya yin ta tse̱r yin, to̱ ma katuk kaya áko̱k kasho̱o̱n yis kusonong áner kuwo̱p nizham.

⁴⁰ Kyo̱ndi ike̱ng'e ta se kyo̱o̱r ana, yir be yir agbang kudaam. A ta kyem a nye kukun yir kamok ike̱re̱ a ta nye katuur ye yir sak yir ánerawe kpaan kuren, ke a nye kukun yir, yir be yir rife̱ tana fe̱ yir natoon ike̱ng a tá nye katuur baꞌ. Akak ta kyem a tak ike̱ng iya i ta sak ánerawe ta korok ikun baꞌ.”

⁴¹ Nama a tá fe̱ anong ne a fe̱ be ánerawe ye á ra naka kaas.