Itomong Ámanzo 16 - Izere New Testament

aTimoti kuus aBulus be aSila

¹ Ayong aBulus tseng na aDarbe a ta se wesek na aListira. Alimazhiri akak tuse azong riyerek wu tá nye aTimoti. Anyining wu nye abafe aYahuda'me ne a nye afikuus'e, amma atek wu nye aner aHeleni.

² Áfikuus á ta se na aListira be Ikoniya fe̱ Rife̱ Ritek natoon aTimoti'me dide̱ng.

³ aBulus shim aTimoti tá su ku tsaa. Kamok anong, yong a tú ku sok nong a tá su ku nye izhak kamok áner aYahuda koakye ren ye sang atek wu nye aner aYahuda baꞌ.

⁴ Nizen iya aBulus be aSila tá tseng á tsees, á gosok ni iwo̱p ze̱r ze̱r ne á taas áfikuus ike̱ng iya ámanzo ne áko̱k kasho̱o̱n tin sak na aUshalima nong ase̱ á tin nye itomong.

⁵ Iyong áfikuus ti barang kukpa agap kaye̱e̱r kuno̱o̱k katsak ne á ni barang kute whe̱re̱re̱ koakye kunom.

aBulus di ike̱ng ikak kyo̱ndi nabos natoon aMakidoniya

⁶ Ayong aBulus be áfudang wu tsang a gorok iben aFirizhiya ne aGalati kamok Kabik Kazhe̱l'e tú ku won ba nikum á ta taas Rife̱ Ritek Agwo̱m Ágwo̱m na Asiya baꞌ.

⁷ Nizen iya á tá be̱ ba na nize̱r kaben aMisiya, á shim a tá no̱ na aBitiniya, amma Kabik aYeso tá ka won ba baꞌ.

⁸ Iyong á kpa kama kuwo̱p aMisiya ame nong á tá tseng na aToruwas.

⁹ Natuk katuk'ong, aBulus di ike̱ng ikak kyo̱ndi nabos ye, áner kuwo̱p aMakidoniya'me akak be̱ a ti nyeseng ni wu a tú ku nye akusuk ye, “Kusuk, be̱ na aMakidoniya nong tin se̱ mo yir.”

¹⁰ Nama aBulus tá di ike̱ng'ong ne yir wor i nye yir kanye̱k gbashak nong i tá be yir na aMakidoniya'me. Yir sok yir riye̱ yir ye Adakunom ne a ti yis yir nong ta su ku nye yir ba awazi Rife̱ Ritek.

aLidiya ti no̱o̱k katsak

¹¹ Iyong yir no̱ yir nukpara ashi i tá dorok yir na aToruwas i tá wesek yir tsik ma na aSamutaras kaya katson'e ne yir be yir na Niyapolis.

¹² Yir dorok yir azong i ta be yir na aFilipi aya aner aRom tin nye rigwo̱m, wu ne a bun a nye agbang kuwo̱p niben aMakidoniya. I te yir inom gaan azong.

¹³ Katuk Asabar, ne yir wuruk yir na agbang kanu kutu kuwo̱p'e nong yir tá be yir nukim isho̱ng nikum ta se̱ yir kutu aduwa azong. I sosok yir azong nong i tá taas yir ányining a tá nyim azong Rife̱ Ritek.

¹⁴ Abining akak kaye̱e̱r áya afe a tin foos yir nye aLidiya. A nye abafe aTiyatira'me, a re̱e̱s ares a ta be itso̱m, a be inyim Adakunom.

¹⁵ Nizen iya a tú ku nye abatisma be áfekari wu, yong a fe̱ be yir ye i ra tseng yir kari wu. A fe̱ ye, “Ke yin ti sok yin ye mi min no̱o̱k katsak na Agwo̱m Ágwo̱m, to̱ ne yin tseng yin ta se sor yin kari mi.” A sak ma yir shim yir.

A te aBulus be aSila nitso̱m

¹⁶ Katuk kakak, yir n dorok yir i be yir naro̱ aduwa yong yir nyim yir be kanamang kakak ka tá nye asam'me. Kanamang'e be kabik kakak kafe kubok. Aner áya kanamang'e ta se nubo̱k ba se̱s itso̱m dide̱ng be kubok kuya kanamang'e tá nye.

¹⁷ Kanamang'e ti kuus yir be aBulus ne ka tasak ye, “Áner na nye ásam Adakunom Agbang Agwo̱m Ágwo̱m, a sen ka taas yin iren kuse̱ kashesh.”

¹⁸ Kanamang'e te inom gaan ne ka yiir fe̱ anong ma ike̱ng'e daam aBulus dide̱ng. Iyong aBulus kirik a tá fe̱ be kabik'e ye, “Mi fe̱ be wan kaye̱e̱r riyerek aYeso Kiristi ye wuruk tu ku won.” Kum aBulus tá fa fe̱ anong ne kabik'e wor ka ku won.

¹⁹ Nizen iya áner aya kanamang'e tá ka nye ba itomong tá fa di iren kuse̱s itso̱m ba n gang, yong a yising aBulus be aSila nong a tá tseng be ba naro̱ rizhik a tú ku won ba nubo̱k rigwo̱m nong ase̱ a tá ka to̱ ba amok.

²⁰ A tá fa ka be̱e̱n ba nasho̱o̱n áner kuto̱ amok'e ne á fe̱ ye, “Áner na nye áner aYahuda á n be̱e̱n kudaam kaye̱e̱r kuwo̱p yir.

²¹ Kamok á bo̱so̱p igo̱o̱n iduk iya i ta se gye̱r ke yir áner aRom tin nye yir itomong baꞌ.”

²² Ánerawe ti ne na aBulus be aSila'me. Áner kuto̱ amok'e sak ánerawe tá ka turung ba ares nong a tú ku whereng ba.

²³ Nama a tú ku whereng ba dide̱ng, ne á ku te ba nitso̱m a tá fe̱ be áner a tá fek kutu itso̱m'e ye á rin sak riye̱ ni itor'e fan á bu wuruk.

²⁴ Aner aya tá fek kutu itso̱m'e tá fa fok anong ne á ku te ba nutu itso̱m kufe kaye̱e̱r'e nong a tá ka te ba kukumung na atak.

²⁵ Nabas katite katuk, aBulus be aSila se be aduwa ne á bom abom ku kerek Adakunom ne ribir áner aya a ta se nitso̱m'e ku foos ba.

²⁶ Nizen izining ne karo̱ wor ka zuur ma ribor kutu itso̱m'e zuur gip. Nanukutu kutu itso̱m'e wor karak ne kukumung ame wor te̱se̱ng.

²⁷ Aner aya tá fek kutu itso̱m'e tá fa shiming ne á di nanukutu kutu itso̱m'e kuye̱. Iyong a whiir itsor nong a tana ka fe̱r mo kamok wu di kyo̱ndi áner aya a tá ka whe̱se̱ng ba ame ba n wher.

²⁸ Amma aBulus tá kuto̱ naza a tá fe̱ be wu ye, “Sang tu naka man baꞌ, yir na aze cice̱r yir.”

²⁹ Iyong aner'e fe̱ ye, a ru ku no̱o̱k kuro̱ng a tin di karo̱. Iyong a wor a dorok gbashak a se kpa nasho̱o̱n aBulus be aSila be ikap kutiim.

³⁰ A tú ku tun ba nufang nong a tá fe̱ ba ye, “Atekasa, akye̱ dim ne mi tà nye nong ta se kashesh e̱?”

³¹ Ayong aBulus be aSila ame fe̱ be wu ye, “Ni no̱o̱k katsak na Agwo̱m Ágwo̱m yir aYeso, wan ta se̱ kashesh wan be áfekari wan peer.”

³² Ne á ku taas Rife̱ Ritek Agwo̱m Ágwo̱m mak be áya a tase kari wu cice̱r.

³³ Kum natuk'e yong, aner kufer kutu itso̱m'e se ka kusu ba ifor. A wor a tú ku nye abatisma mak be áfekari wu peer.

³⁴ Afek kutu itso̱m ame tseng be aBulus ne aSila kari wu a ta se ku no̱o̱k ba naya. A nye riye̱ rikan dide̱ng mak be áfekari wu kamok ba cice̱r ti no̱o̱k katsak na Adakunom.

³⁵ Kadiding tá fa karak, ne aner kuto̱ amok ame tom áfe itomong wu nufe aner a ta fek kutu itso̱m'e ye, “Won yin áner ame nong a ta tseng.”

³⁶ Iyong afek kutu itso̱m ame se tak aBulus ye, “Aner kuto̱ amok n tom ye a ra ka te yin niren be aSila. Kamok anong, tseng yin makong. Tseng yin caang.”

³⁷ Amma aBulus fe̱ be átom ye, “A ti tsosok yir áner aRom dar ku ni to̱ yir amok ne a ni te yir nitso̱m. Kyo̱o̱rna ne a ra ma shim a tin ro yir kyo̱o̱n makong a? I ta te anong baꞌ, a ra be̱ a tin te yir niren be rice baꞌ.”

³⁸ Ayong átom ame ma se tak aner amok'e ike̱ng iya aBulus'e tá fe̱. Nizen iya a tá fok ye aBulus be aSila nye áner aRom inyim tú ku ro̱ ba.

³⁹ Iyong á be̱ nufe aBulus be aSila ni itse̱r igaas ne á ka te ba niren a tá fe̱ be ba ye á ra dorok nuwo̱p'e.

⁴⁰ Nama aBulus be aSila tá wuruk nitso̱m'e ne á tseng numa aLidiya ame ne anyim be áfikuus azong, yong á tú ku tsesek ba. Ne á ma dorok a tá tseng.