Itomong Ámanzo 15 - Izere New Testament

Kusonong áko̱k kasho̱o̱n na aUshalima

¹ Yong áner akak ne na aYahudiya á ta be̱ na Antakiya nong á se bo̱so̱p áfikuus'e ye, “Sang ke a ta nye yin izhak kyo̱ndi aMusa tá fe̱ baꞌ, yin ta kyem i se̱ yin kashesh baꞌ.”

² Rife̱ na sak aBulus be aBarnabas ya nanaan be ba dide̱ng. Iyong a tom aBulus be aBarnabas ne áfikuus akak tá tseng na aUshalima nong á ta se rip ámanzo'me ne áko̱k kasho̱o̱n ikilisiya akak itak'e.

³ Áfikuus tú ku te ba niren, ne á gor na aFoneshiya be aSamariya ne á tsang a taas kuri iren iya áner aya sang a tá nye áner aYahuda baꞌ tin no̱o̱k katsak na aKiristi. Itak'e sak áfikuus cice̱r nye riye̱ rikan dide̱ng.

⁴ Nizen á ta se no̱ ba na aUshalima, áfikuus cice̱r ne ámanzo be áko̱k kasho̱o̱n tú ku shan ba niren. Iyong aBulus be aBarnabas tú ku taas ba cice̱r ike̱re̱ iya Adakunom ta nye be ba.

⁵ Áfikuus akak aya a tá nye áner aFarisi dorok á tá fe̱ ye, “Ma a nye áner aya sang a ta nye áner aYahuda baꞌ izhak ne a ku sak ba nong á tá kuus Itsi aMusa dim nizham.”

⁶ Iyong ámanzo ame ne áko̱k kasho̱o̱n ikilisiya ame nyim nong ase̱ á tin sak natoon itak'ong.

⁷ Nama á tá naka ko̱k dide̱ng ne aBitrus dorok a nyeseng nong a tá fe̱ be ba ye, “Ároneng, yin ren yin ye Adakunom ti kasa kaye̱e̱r yin gbugbang nong ta taas áner aya sang a ta nye áner aYahuda baꞌ awazi nong á tin no̱o̱k katsak.

⁸ Adakunom afe a ta ren kaye̱e̱r riye̱ koangan tonong ye wu tu ku shan ba, kum a tú ku no̱o̱k ba Kabik Kazhe̱l'e kyo̱ndi a tin no̱o̱k yir.

⁹ Sang Adakunom ti tonong ye yir áner aYahuda se yir ze̱e̱r be ba baꞌ, a sak aye̱ ba te zhe̱l kamok ba ti no̱o̱k katsak.

¹⁰ To̱, akye̱ sak yin shim yin ta bo̱mo̱ng yin Adakunom be kunyeseng álimazhiri acer aya yir ka átukop yir tan kyem á cer baꞌ e̱?

¹¹ Yir ti no̱o̱k yir katsak ye a min shesh yir kamok ritek Agwo̱m Ágwo̱m yir aYeso, anong ne ba gip.”

¹² Iyong ánerawe whe̱re̱ á tan nyim te gbik á tá foos aBarnabas be aBulus tá taas ike̱re̱ ife kukyem ne ife azhing iya Adakunom tan nye nubo̱k ba kaye̱e̱r áner sang a tá nye áner aYahuda baꞌ.

¹³ Nizen iya á tá gang kufe̱ kanu ne aYakub dorok a tá fe̱ ye, “Ároneng be ángasneng wesek yin kuto tin fok yin.

¹⁴ aSiman min taas yir kuri iren iya Adakunom tá tonong kushim wu ni ime̱se̱ng'e a tá kasa áfu kaye̱e̱r aner aya sang á tá nye aner aYahuda baꞌ.

¹⁵ Rife̱ áner kuzarap tá fe̱ nyim be riya a tá zibir ye,

¹⁶ “ ‘Nama anong, mi tà bun i be̱ nong ta bun ino̱k kasa aDauda ka tá tsang ka yirik. Mi tà no̱k abor'e ne i sak kasa'me tà dorok.

¹⁷ Be anong ne ribir ánerawe tin tse̱r mi Agwo̱m Ágwo̱m, aner aya sang á ta nye áner aYahuda baꞌ, cice̱r ne aya a ta ka yis ba be riyerek'i tà te anaan. Anong ne Agwo̱m Ágwo̱m fe̱, wu afe a tá nye ike̱re̱ na,’

¹⁸ wu afe a tu ku ren kum gbugbang.

¹⁹ “Kamok anong, mi ye i se gye̱r nong ta firik yir áya sang á nye áner aYahuda'me ba', aya a ta sen kuburung nufe Adakunom baꞌ.

²⁰ Gye̱r ke yir ban i ku zibir yir ba kufumung ingya nong tu ku tak yir ba ye, á ra won kuya naya na aya a tá kamok nye itsi, á ra won rikuna ne kuya ike̱ng iya be naso̱k'e.

²¹ Kamok an taas ánerawe rife̱ natoon Itsi aMusa ta zibir kum gbugbang kaye̱e̱r koakye kuwo̱p ne a fa kaye̱e̱r atu aduwa koakye Asabar.”

Kufumung áko̱k kasho̱o̱n ikilisiya tá zibir áfikuus

²² Iyong ámanzo ne áko̱k kasho̱o̱n ikilisiya ne ribir afikuus cice̱r di ye i se gye̱r nong a tá kasa áner afa kaye̱e̱r ba nong a tu ku tom ba na Antakiya mak be aBulus ne aBarnabas. Ayong á kasa aYahuda, aya a tú ku yis ye aBarsaba ne aSila, aya a tá tsang á nye áko̱k kasho̱o̱n kaye̱e̱r áfikuus'e.

²³ Kufumung a tú ku no̱o̱k ba ame se ye: Áronyining yin, ámanzo ne áko̱k kasho̱o̱n be ribir áfikuus ne a ta ka zibir yin kufumung na. Yin áfikuus áya sang yin tá nye yin kunik áner aYahuda baꞌ. Yin áya yin ta se yin na Antakiya be aSuriya ne aKilikiya. Yir tá nye yin ashou dide̱ng.

²⁴ Yir fok yir ye áner akak ne aze nufe yir á tá be̱ ka daam yin ne á ka sak yin nudaam dide̱ng be kuri ike̱re̱ iya ba tá fe̱. Sang yir ne i tá sak yir ba ye á ra nye anong baꞌ.

²⁵ Iyong ne yir ti sak yir i tá kasa yir áner akak nong yir tú ku tom yir ba nufe yin mak be ároneng yir aBulus be aBarnabas,

²⁶ a ta nye áner á tan no̱o̱k rice ba kamok itomong Agwo̱m Ágwo̱m yir aYeso Kiristi.

²⁷ Kamok anong ne yir tom yir aYahuda ne aSila nufe yin, ba be ace ba tà ka tas yin ike̱re̱ na be kanu ba.

²⁸ Yir di yir kyo̱ndi Kabik Kazhe̱l'e ta di gip ye, i se gye̱r nong yir ta ka daam yin be ike̱ng ikak i ta nar ike̱re̱ iyiik'e na baꞌ.

²⁹ Won yin kuya rinam a ta min nye itsi, sang tu so̱ yin naso̱k baꞌ, sang tu ya yin ike̱ng ikak dar kutse̱e̱r'e baꞌ, sang tu nye yin rikuna baꞌ. I se gye̱r yin ta won yin kunye ike̱re̱ yir ta fe̱ yir na. Tato̱ yin.

³⁰ Ayong á tú ku te ba niren nong a tá tseng na Antakiya'me. A tá fa se tusung áfikuus cice̱r karo̱ kazining ne á ku no̱o̱k ba kufumung'e.

³¹ Nizen iya a tá fa kufumung'e, aye̱ ba kare̱p be itabak a tú ku zibir ba'me.

³² aYahuda be aSila á tá nye áner kuzarap be ace ba gip á fe̱ rife̱ dide̱ng riya ri ta sak áfikuus Antakiya ti barang kuse̱ agap.

³³ Nama á ta te inom azong, áfikuus afe azong tú ku te ba niren be kuce̱ kutek ne ashou nufe kamok áya a tú ku tom ba.

³⁴ (aSila tu fan azong.)

³⁵ Amma aBulus be aBarnabas tú ku fan na Antakiya nong á ta bo̱so̱p ánerawe'me ne a taas Rife̱ Ritek Agwo̱m Ágwo̱m mak be ákak azong.

aBulus be aBarnabas naka kaas

³⁶ A fa sor cie̱k ne aBulus fe̱ be aBarnabas ye, “I ku bun yir ta se di yir áfikuus ni iwo̱p iya yir tá taas yir Rife̱ Ritek Agwo̱m Ágwo̱m nong tú ku di yir ka ane̱ ne á se e̱?”

³⁷ aBarnabas shim ke á tseng mak be aYohana aya a tú ku yis ye aMarkus.

³⁸ aBulus di ye i ta se gye̱r nong a ta tseng mak be wu baꞌ, kamok aMarkus'e tú ku won ba na aPamfiliya, sang a ya kasho̱o̱n be itomong mak be ba baꞌ.

³⁹ Ayong nanan ti no̱ natite ba dide̱ng ma á naka kaas.

⁴⁰ Amma aBulus sok aSila á tá tseng mak nama áfikuus tú ku nye ba aduwa nong ase̱ ritek Agwo̱m Ágwo̱m ta se mak be ba.

⁴¹ Á gor aSuriya ne aKilikiya nong á tá tsang á tsesek áfikuus.