Itomong Ámanzo 11 - Izere New Testament

aBitrus fe̱ ike̱ng i tá sak anong

¹ To̱, ámanzo be ribiraáfikuus aya a tá se kaye̱e̱r aYahudiya cice̱r tá fok ye áner aya sang a tá nye áner aYahuda baꞌ, n shan rife̱ Adakunom gip.

² Iyong nizen iya aBitrus tú ku bun na aUshalima, áko̱k kasho̱o̱n áner aYahuda aya a tá nye afikuus'e tú ku zhe̱e̱r.

³ Ne á fe̱ be wu ye, “Wan tseng nasa áshurukur, nong i ta se yas mak be ba wa?”

⁴ Ayong aBitrus san ku ka taas ba koakye ike̱ng nye̱k nye̱k, ye:

⁵ “Mi se be kunye aduwa na aZhopa, ne mi di ike̱ng ikak kyo̱ndi nabos. Mi di ike̱ng ikak kyo̱ndi kures be ikes inaas a ta neen'e naza a tan yir a sen tiik'e kaben'e ma a be̱e̱n'e bubarak be karo̱ kaya mi ta se.

⁶ Mi tá ye̱re̱k kures'e ne mi di íkewum kazatse na íya i ta be atak anaas, be ike̱re̱ katse ne íya i ta wo̱k be kafa ne nanon.

⁷ Ne mi fok kuto̱ kukak tá fe̱ be mi ye, ‘aBitrus dorok tá fe̱s ike̱re̱'ong nong ta ya.’

⁸ “Amma mi fe̱ ye, ‘Mi ta nye anong ko cie̱k baꞌ Agwo̱m Ágwo̱m. Ike̱ng ikak i ta won dar i se zhe̱l ka iya i ta be narik kun no̱ nanu mi baꞌ.’

⁹ “Iyong kuto̱'me ku ta ne naza bun ku fe̱ kutak kufe afa ye sang mi tu fe̱ ye ike̱ng ikak Adakunom ta nye won dar i se zhe̱l ka i be narik baꞌ.

¹⁰ A nye anong ma kutak kutaar ne a sok kures ame a tá bun a tú bun'e naza.

¹¹ “Dim nizen'e yong ne áner akak ba ataar á ta ne na aKaisariya áfe aKoneliyus tá ka tom ba nunaan be̱ nasa mi tú ku se.

¹² Kabik fe̱ be mi ye mi ru tseng mak be ba gbashak. Ároneng na ba igataar tseng be mi gip i ta se no̱ yir numa aKoneliyus.

¹³ aKoneliyus'e ti tak yir kuri iren iya wu tá di amaleka tá be̱ kari wu a tá fe̱ be wu ye, ‘Tom áner ákak nong á tá tseng nufe aSiman aya a tu ku yis aBitrus na aZhopa.

¹⁴ A ta be̱ a ta ka tak yin rife̱ riya wan be áfekari wan cice̱r tin se̱ yin kashesh.’

¹⁵ “Kum mi tá fa san kufe̱ kanu ne Kabik Kazhe̱l'e ni tiik natoon ba kyo̱ndi a tin tiik natoon yir ni ime̱se̱ng'e.

¹⁶ Iyong mi yiring ike̱ng iya Agwo̱m Ágwo̱m yir aYeso tá fe̱, ‘aYohana nye abatisma be ashi, amma a tà ka nye yin'e be Kabik Kazhe̱l'e.’

¹⁷ To̱, ke Adakunom tu no̱o̱k ba kunang kyo̱ndi kuya a tin no̱o̱k yir nizen iya yir tin no̱o̱k yir katsak na aYeso Kiristi, mi nye angan tana fe̱ ye mi ta roon Adakunom'me e̱?”

¹⁸ Ba tá fa fok anong ne á tigbik, á kyem á fe̱ ike̱ng ikak baꞌ. Á kerek Adakunom ne á fe̱ ye, “Aser, Adakunom n no̱o̱k áner aya sang a ta nye aner aYahuda baꞌ, iren gip nong a ta shishing kuse ba a ta se̱ kutser.”

Áfikuus na Antakiya afe aSuriya

¹⁹ To̱, áfikuus aya a tá te shaam kamok amaan kutabak a tá tabak áfikuus nama riku Itifanus tseng tsik ma ni iwo̱p aFoneshiya ne aSipurus be Antakiya. Á tsang a nye awazi amma a nye awan áner aYahuda tsek.

²⁰ Amma áfikuus'e akak a tá nye áner aSipurus be áfe aSirin gip a tseng na Antakiya. A san kutaas áner aya sang a tá nye áner aYahuda baꞌ, Rife̱ Ritek natoon Agwo̱m Ágwo̱m yir aYeso.

²¹ Kubo̱k Agwo̱m Agwo̱m se mak be ba, ánerawe whe̱re̱ shishing kuse ba nong á te áfikuus Agwo̱m Ágwo̱m.

²² Áfikuus aya a ta se na aUshalima fok itak'e yong á tom aBarnabas ye a ra tseng na Antakiya.

²³ Nizen iya a tá se no̱, a di ritek Adakunom ta se mak be ba ne riye̱ wu kare̱p. Ayong a fe̱ be ba ye á ra yiir iren Agwo̱m Ágwo̱m be katsak be riye̱ rizining.

²⁴ aBarnabas nye aner a ta be kuse kutek be Kabik Kazhe̱l'e ne kuno̱o̱k katsak. Ánerawe dide̱ng ti barang kube̱s nufe Agwo̱m Ágwo̱m.

²⁵ Ayong aBarnabas tseng ni itse̱r Ashawulu na aTarsus,

²⁶ izen iya a tú ku se̱ ne a be̱ be wu na Antakiya. aBarnabas be Ashawulu gang riye̱ rizining azong ne á nyiis be áfikuus azong ne á bo̱so̱p ánerawe whe̱re̱ rife̱ Adakunom. Na Antakiya ne a san ku yiis álimazhiri aYeso ye Áfikuus.

²⁷ Nizen iyong ne áner kuzarap ákak ne na aUshalima nong a tá be̱ na Antakiya.

²⁸ Kabik sak akak kaye̱e̱r ba riyerek wu tá nye Agabus dorok a nyeseng a tá nye kuzarap. A fe̱ ye izong ta no̱ dide̱ng nazatse na kusum (Iyu se nizen iya aKalaudiyus tá nye agwo̱m.)

²⁹ Ayong álimazhiri ame cice̱r ti sak ye ba tá tobok áfudang ba aya a tá se na aYahudiya. Koangan tà no̱o̱k tite̱re̱ be agap wu.

³⁰ Anong ne á nye ba ne tá tom Ashawulu be aBarnabas itso̱m'e nong á ta se no̱o̱k asho̱n ikilisiya aYahudiya.