Ibrani 9 - Izere New Testament

Iren kuya Adakunom iben be katsak

¹ Kushu kufe ime̱se̱ng'e tonong iren a tana ya Adakunom iben, be karo̱ ku kuya iben anerawe ta nye.

² A tar kubur. A nye karo̱ kusaas apitila be atebur ne abiredi azhe̱l'e nutu kufe ime̱se̱ng'e. A yis karo̱ kayong ye Karo̱ Kazhe̱l'e.

³ Nama alaple afe afa'me, kutu kukak tuse a tá yis ye Karo̱ Ka tá nar Kuse Zhe̱l.

⁴ Karo̱ a ta shosh name iko̱o̱n itek a ta nye be izinariya tuse azong, be akpate kushu a tá kis be izinariya. Akpate'me be kures a tá nye be izinariya, a tin te naya a tá yis ye amanna kaye̱e̱r'e be ishe̱n aHaruna i tá funung, ne ape̱f ata afa a tin zibir Itsi Adakunom natoon'e.

⁵ Ike̱re̱ ikak ifa i tá tas amaleka a tá yis ye aCerubim se natoon akpate'me, a ti ta nawu naro̱ kure̱ng rine̱n'e. Amma kyo̱o̱rna, yir ta kyem i fe̱ yir ike̱ng ikak natoon ike̱re̱'me nye̱k nye̱k baꞌ.

⁶ Nizen iya a tá saas ike̱re̱ na cei anong, ne átsi ra ma no̱ nutu kufe kanu'me, á tá nye itomong ba.

⁷ Agbang atsi tsek ne a no̱ nutu kufe kaye̱e̱r'e, kutak kuzining koakye riye̱. Izen iya a ta no̱ ma a no̱ be naso̱k a tana no̱o̱k kamok rine̱n wu be riya ánerawe tá nye kaye̱e̱r kudun kuren.

⁸ Iyu ne i sak Kabik Kazhe̱l'e tá tonong ye, an karak karo̱ ka ta nar kuse zhe̱l nizham baꞌ, kum ke kubur'e ru kuse.

⁹ Iyu ti tonong yir ike̱ng ikak kyo̱o̱rna. Iyong ti tonong yir ye asidaka a ta nye ye̱r ye̱r tà sak aye̱ anerawe ta te zhe̱l nasho̱o̱n Adakunom baꞌ.

¹⁰ Ike̱re̱'ong a tá nye se natoon kuyas be kuso̱ ne ku naka kusu. Ike̱re̱'ong nye ife kuro̱m tsek iya a tin nye itomong ma nizen iya Adakunom ta shishing koakye.

Naso̱k aYeso

¹¹ Nizen iya aYeso tá be̱, wu ta nye agbang atsi afe ike̱re̱ itek iya i tan be̱ nakuruk, kubur kuya wu tin nye itomong kaye̱e̱r'e se yiik ne ku nar. Ku nar kubur kuya anerawe ta tar zhe̱l, kubur'ong nye kufe kazatse na baꞌ.

¹² A no̱ be naso̱k izha ka amung baꞌ. A no̱ naro̱ ka ta nar Kuse Zhe̱l be naso̱k wu kutak kuzining tsek nama a tin se̱ yir kashesh kafe izen izen.

¹³ Naso̱k izha be amung be itong inyak ife a ta man a mis áfe rine̱n'e ta sak á ta te zhe̱l nama kuro̱m tsek,

¹⁴ ke naso̱k ikewum kyo̱ndi iyong tà sak anerawe te zhe̱l shita naso̱k aYeso Kiristi a? Wu afe a tá be̱ kaye̱e̱r Kabik Kazhe̱l'e dar rizik nasho̱o̱n Adakunom, a no̱o̱k rice wu kamok rine̱n yir. A ti kam yir be ike̱re̱ iya i ta be̱e̱n riku nong i ta ya yir Adakunom afe kutser iben.

¹⁵ Kamok anong, aKiristi ne a se natite kushu kufas nong ase̱ áfe a ta ma ka yis ba tà shan kutser kufe izen izen kuya Adakunom ta fe̱ ye a tà no̱o̱k. Kyo̱o̱rna wu ku nong a tà ka shesh ba kaye̱e̱r rine̱n rife ba tá tsang á nye kaye̱e̱r kushu kufe ime̱se̱ng'e.

¹⁶ Ke akak ku a tá won kufumung natoon aner a tana ya kutse wu, ma a se̱ ike̱ng i ta tonong ye aner'e n ku katsak'e.

¹⁷ Kamok a ti nye itomong be kufumung natoon kuya kutse baꞌ, ma ke aner a ta zibir kufumung'e ku. Ke aner'e rusek be kutser, a sen kyem a ninye itomong baꞌ.

¹⁸ Iyong ne i sak a kyem a ninye itomong be kushu kufe ime̱se̱ng'e dar naso̱k baꞌ.

¹⁹ Nizen iya aMusa tá tak ánerawe Itsi, a sok naso̱k inoon inyak ne nafe izha a tin gung be ashi. Ne a sok iwhang kakon kakak a ta yis ye aHisop mak be nakuyo̱ng ítsamang naseng a ta shumung, a tin mis naso̱k'e natoon kufumung Itsi ne ánerawe cice̱r.

²⁰ A fe̱ ye, “Naso̱k kushu i tan shu yin be Adakunom name naya a tá fe̱ ye i ra yiir yir.”

²¹ aMusa ti mis naso̱k'e natoon kubur'e be ike̱re̱ iya a tin nye itomong cei gip.

²² Katsak'e, Itsi shim ye a ra kusu koakye ike̱ng be naso̱k, kamok ke a nyosong naso̱k baꞌ, a ta kyem a re̱ng rine̱n baꞌ.

²³ Nizen iyong, a nye anong be ike̱re̱ ife i tá tas ife kaza nong i tà te zhe̱l. Amma ike̱re̱ kaza'me ta te zhe̱l be asidaka aya a ta nar ayu.

²⁴ Kamok sang aKiristi no̱ naro̱ itomong atsi anerawe ta nye i tá tas ife kaza baꞌ. A no̱ kaye̱e̱r kaza, azong ne a se nasho̱o̱n Adakunom kamok yir.

²⁵ Sang a no̱ kaye̱e̱r kaza a tá no̱o̱k rice wu ne a toos'e kyo̱ndi agbang atsi ta no̱o̱s Naro̱ ka ta Nar Kuse Zhe̱l koakye riye̱ be naso̱k naya sang na ta nye nafu baꞌ.

²⁶ A fa fe̱ ye aKiristi nye anong, ke an so̱ risam ne a toos'e kum nizen iya a tá nye kazatse. A be̱ kutak kuzining tsek nigang'e na, a tá no̱o̱k rice wu asidaka kamok rine̱n yir.

²⁷ Kyo̱ndi a tan sak,

²⁸ anong ne a no̱o̱k aKiristi kutak kuzining gip nong a tá sor asidaka kusok rine̱n ánerawe whe̱re̱. A tà bun a be̱ ife afa nong a tà shesh áya a ta sen ku tor, sang kamok nong a tà sok rine̱n baba baꞌ.