Ibrani 4 - Izere New Testament

Asabar – kunom kufan kamok ánerawe Adakunom

¹ Kamok anong, kum kuno̱o̱k kuto̱ a tá tsang a fe̱ be yir ye, yir tà no̱ yir kaye̱e̱r karo̱ kufan wu tu ku se, to̱, i sak yir riye̱ fan ákak yir bu won dar á kyem á no̱.

² Kamok a min taas yir Rife̱ Ritek kyo̱ndi a tá ka taas ba. Amma rife̱ ba tá fok sor ike̱ng ikak nufu ba baꞌ, kamok áfe á tá fok ti no̱o̱k katsak baꞌ.

³ Yir áfe i ta min no̱o̱k yir katsak i no̱ yir kaye̱e̱r karo̱ kufan kyo̱ndi Adakunom ta fe̱ ye, “Riye̱ mi beseng, kamok anong mi shu ye ba tà no̱ kaye̱e̱r karo̱ kufan'i baꞌ ko cie̱k.” Adakunom fe̱ anong, nama a tá tsang a gang itomong kunye kazatse wu.

⁴ Kamok naro̱ kakak a fe̱ itak kunom kufe kanataar kaye̱e̱r kufumung rife̱ Adakunom ye, “Katuk afe kanataar Adakunom fan be kunye itomong wu cice̱r.”

⁵ amma ayong a bun a fe̱ ye, “Ba tà no̱ kaye̱e̱r kufan'i baꞌ ko cie̱k.”

⁶ I rusek anong, ákak tà no̱ kaye̱e̱r kufan'e, amma áya a tá san kufok Rife̱ Ritek se̱ kuno̱ kaye̱er'e baꞌ, kamok kushonong ba.

⁷ Kamok anong, Adakunom sak kunom kukak a ta yis ye, “Katuur.” A fa baan dide̱ng ne a fe̱ nanu aDauda kyo̱ndi a ta tsang a zibir ye, “Katuur ke yin fok yin kuto̱ wu, tu shonong yin baꞌ.”

⁸ Kamok ke a fa fe̱ ye aZhoshuwa ta ka no̱o̱k ba naro̱ kufan'e ke Adakunom ra ba fe̱ ike̱ng ikak natoon kunom kukak nasho̱o̱n baꞌ.

⁹ Iyong tonong ye, kufan nama inom kanataar rusek gbak kamok áner Adakunom.

¹⁰ Kamok aner aya a ta no̱ kaye̱e̱r kufan Adakunom, a ta fan ni itomong'e ifu gip kyo̱ndi Adakunom tá nye.

¹¹ Won i tu nye yir koakye ike̱ng i tana kyem i nye yir nong ta no̱ yir kaye̱e̱r kufan'ong, fan akak bu kuus kuse ba, a tà kpa, á ta won dar á fok kuto.

¹² Katsak'e rife̱ Adakunom be kutser ne ri be agap itomong. Agap wu nar afe awe̱n iya i i ta ya abas afa. a te̱m ma kaye̱e̱r kuro̱m ánerawe nong a ta kam kutser be kabik ne ikap be ise̱re̱, ma i ren kuto̱ro̱ng riye̱ anerawe be kunye wu.

¹³ Ike̱ng ikak kuse nune̱re̱ng nazatse nasho̱o̱n Adakunom baꞌ. Koakye ike̱ng se de̱s, i se kanang nasho̱o̱n wu. Nasho̱o̱n wu ne i ta nyeseng yir nong tà taas yir koakye ike̱ng i tá nye yir.

aYeso ne a nye Agbang Atsi Ayiik'e

¹⁴ Kamok anong, kum yir ta be yir agbang atsi ayiik'e, aYeso Igon Adakunom, aya a ta tseng naza, won i tu yiir yir kuno̱o̱k katsak yir be agap dide̱ng.

¹⁵ Agbang atsi aya yir ta be yir nye aya a ta ro̱ riye̱ yir kaye̱e̱r kuraar yir. A tú bo̱mo̱ng kaye̱e̱r koakye iren kyo̱ndi yir, gip be anong a nye rine̱n baꞌ.

¹⁶ Won yir tu be̱ yir nasho̱o̱n itsik ritek Adakunom'me be riye̱ rizining, nong ase̱ ta se̱ yir kuro̱ riye̱ be ritek nizen iya i ta se yir kaye̱e̱r kutse̱r.