aZhud 1 - Izere New Testament

Ashou

¹ Mi, aZhud, asam aYeso Kiristi, aronyining aYakub, yin áya Adakunom aya a ta nye Ada ta ka shim yin, ne a ka yis yin, áya aYeso Kiristi ta ka fek yin.

² Kuro̱ riye̱ ne kameneng riye̱ be kushim nye kufe yin.

Amok aner aya a ta bo̱so̱p ánerawe ike̱ng iya i ta nye katsak baꞌ

³ Ároneng, yin áya mi ta shim, mi tsang i shim ku ka zibir yin kufumung na natoon kashesh yir ta be yir na cice̱r gye̱rtatan, amma mi di i se gye̱r ta ka zibir yin'e nong ta ka nye yin akusuk ye i ra naka tsesek yin natoon kuno̱o̱k katsak yir kuya Adakunom tá won ázhe̱l'e amana'me nubo̱k.

⁴ Mi fe̱ anong, kamok áner kuri ákak n no̱ kaye̱e̱r yin kyo̱o̱n. Á fok inyim Adakunom baꞌ. Á sok ritek Adakunom nong ri ta te iren kunye kpe̱de̱ng. Á ton'e aYeso Kiristi ye sang wu ne a nye Atekasa ne a nye Agwo̱m Ágwo̱m yir baꞌ. Kum gbugbang a tsang a zibir ye a tú ku to̱ ba amok.

⁵ Mi ren yin ren yin ike̱re̱ na cei gye̱rtatan amma mi shim ta ka yiring yin'e ye Agwo̱m Ágwo̱m shesh áner Isarela niben aMasar nizen iya a tá ka tun ba azong amma nama anong, a fe̱s áya sang á tá no̱o̱k katsak baꞌ.

⁶ Bun i yiring yin be ámaleka áya sang á tá kuus itsik rigwo̱m baꞌ, amma á won itsik ba ife ime̱se̱ng'e. Kuri ayong Adakunom ma ka te̱ne̱ng ba kaye̱e̱r awhi nong a tú ku rosom ba be idun atso̱m ife ma izen izen nong a tú ku to̱ ba amok katuk Agbang Kunom'e.

⁷ Anong ne i se be aSodom ne aGomora ne iwo̱p iya i ta se bubarak be ba, iya i tá te rice ba ninye rikuna ma á kuus ike̱re̱ kuro̱m ife kurisik'e kyo̱ndi ámaleka'me tá nye. Ike̱ng iyong tonong kuri risam riya á tana so̱ kaye̱e̱r kuro̱ng kufe izen izen.

⁸ Anong ne á tà nye be áfe nabos abo̱o̱s na gip, ma á beseng iro̱m ba be ike̱re̱ iyong, á raba kukuus rigwo̱m ne a kas ámaleka Adakunom.

⁹ Amma aMakel, a tá nye ako̱k kasho̱o̱n ámaleka, nizen iya a tin ko̱n natoon kukom aMusa be Ishetan gip, a fe̱ ike̱ng ikak imaan'e natoon wu baꞌ. Amma a fe̱ be wu, ye, “Agwo̱m Ágwo̱m ta ka tigba!”

¹⁰ Amma áner na fe̱ imaan'e natoon ike̱ng iya ba ta ren igak'e baꞌ. Ba ren ike̱re̱ na kamok ba ta kuus ike̱re̱ iya aye̱ ba tá ka no̱o̱k ba tsek, kyo̱ndi ikewum dar kuto̱ro̱ng. Kuse kuri kuyong tú ku fe̱s ba.

¹¹ Awo̱ be ba! Á sok kuse aKayinu. Kamok ba tá tse̱r ishorong zizirik á wor á kuus kuri rine̱n riya aBalam tá nye kamok kushim itso̱m. A ta ka fe̱s ba kyo̱ndi a tá fe̱r aKora kamok kushonong.

¹² Áner ayong ta ka beseng yin na nyim yin nafe riye̱ rikan yin, á yas mak be yin dar isum dar inyim. A se kyo̱ndi áfe kufek áya a tin sak riye̱ natoon rice ba tsek. Á se kyo̱ndi ane̱n á ta nyim amma ke kuwun be̱ ne kushik. Ne á se kyo̱ndi nakon naya na ta tes baꞌ, ka kyo̱ndi nakon naya a tá turung ne na kus cei.

¹³ Á se kyo̱ndi ashi ta tang agung kaye̱e̱r agbang kudung be kuren ne a turung afufuk. A se kyo̱ndi ádar áya a ta tsang á kar kpe̱de̱ng. An sak amaan awhi kamok ba ma izen izen.

¹⁴ aEnok gip, a ta se kaye̱e̱r izam ife kanataar nama Adamu, wu gip a nye kuzarap natoon áner ayong ye, “Di yin, Agwo̱m Ágwo̱m ta saase be áfu ázhe̱l'e izungu natoon izungu izungu,

¹⁵ nong a ta to̱ koangan amok. A ta tes itomong áya a tá gaar ku kuus Adakunom. A tà te̱s cice̱r amaan rife̱ riya áfe rine̱n ne áya a tá kuus Adakunom baꞌ, tá fe̱ natoon wu.”

¹⁶ Áner ayong be anyinye̱m ne á yiir rife̱ natoon ánerawe. Á kuus amaan kuto̱ro̱ng aye̱ ba tse̱k ne á ko̱k rice naza. Á ta wo̱ro̱k ánerawe be rife̱ re̱m re̱m nong á ta se̱ ike̱ng iya ba ta shim nufuba.

Itabak

¹⁷ Amma yin, ároneng áya mi ta shim, yiring yin be ike̱re̱ iya ife ámanzo Agwo̱m Ágwo̱m yir aYeso Kiristi tá tsang á fe̱ gbugbang.

¹⁸ Á tá ka tak yin ye, “Kaye̱e̱r inom igang'e, áner ákak tu ku se áya a tana ka kok yin'e ne á kuus ike̱re̱ riye̱ ba sang ife Adakunom baꞌ.”

¹⁹ Áner na ne á be̱s be kaas ánerawe, á kuus ike̱re̱ kuro̱m tsek. Á be Kabik Adakunom baꞌ.

²⁰ Amma yin, ároneng áya mi ta shim, naka no̱k yin natoon kuno̱o̱k katsak yin kuzhe̱l'e ne i nye yin aduwa kaye̱e̱r Kabik Kazhe̱l'e.

²¹ Sor yin kaye̱e̱r kushim Adakunom ne i tor yin Agwo̱m Ágwo̱m yir aYeso Kiristi aya kamok kuro̱ riye̱ a ta tseng be yir kaye̱e̱r kutser kufe izen izen.

²² Fok yin kuro̱ riye̱ áya a ta be agak riye̱.

²³ Shesh yin ákak kyo̱ndi a ta shesh anerawe kaye̱e̱r kuro̱ng. Ro̱ yin riye̱ ákak ba, amma nye yin tatan. Fok yin akye̱re̱ ares ba ne amaan kunye ba kuri rife̱ rinerawe.

Aduwa nakerek

²⁴ To̱, nakerek nye nafu, wu aya a ta be kukyem ku ka tor mo yin fan i bu kpas yin, a ta tseng be yin nasho̱o̱n agbang kuyiik wu dar rine̱n be riye̱ rikan dide̱ng.

²⁵ Kuyiik nye kufu wu ze̱r, wu aya a ta nye Adakunom Aner Kashesh yir kaye̱e̱r aYeso Kiristi Agwo̱m Ágwo̱m yir. Kuyiik be kukyem ne rigwo̱m be agap nye kufu kum ni ime̱se̱ng'e, be kyo̱o̱rna, be ma izen izen! Anong.