aYohana 9 - Izere New Testament

aYeso sak aner akak a tú ku tes akpato̱o̱n'e te atser

¹ Nizen iya aYeso ta se be igor, ni a di aner akak a tú ku tes akpato̱o̱n'e.

² Ayong álimazhiri wu tú ku rip ye, “aRabbi, aner na a tú ku tes akpato̱o̱n'e na rine̱n angan ne ri sak anong e̱? Rine̱n wu ka rife̱ átek e̱?”

³ aYeso tú ku shim ba'me ye, “Sang akak kaye̱e̱r ba ne a nye rine̱n baꞌ, amma a tú ku nye anong, nong ase̱ a ta tonong kuyiik Adakunom natoon wu.

⁴ Yir ta ya yir kasho̱o̱n be kunye itomong aya a tin tom dim. Kamok izen saase karo̱ tana te whi, akak ta ba kyem a nye itomong baꞌ.

⁵ Kum mi ta rusek kaye̱e̱r kazatse, mi ne i nye akanang kazatse.”

⁶ Nama a tá fe̱ anong, a ta ace̱ kaben, nong a tin nye ame̱re̱sh ne a ni kon nanyisi aner ame.

⁷ Ne a fe̱ be aner'e ye “Tseng, se kusu anyisi wan nudung aSiluwam.” (Riyerek na sor ye “Kutom.”) Ayong aner ame tseng a ta se kusu anyisi wu ne a di karo̱ ne a kubun kari.

⁸ Áfe a bubarak be áya a tan me̱ ne á ku ye̱re̱k a tá nye izong nufe ánerawe, á fe̱ ye, “Aser, aner a tan me̱ ne a sosok ne a nye izong nufe ánerawe ayuna aꞌa?”

⁹ Ákak fe̱ ye “Ei, aner nye wu.” Ákak ye, “Wayo, wu baꞌ. Á naka tas tsek.” Amma wu be rice wu fe̱ ye, “Aner'e nye mi.”

¹⁰ Ayong á tú ku rip ye, “To̱, a nye ane̱ anyisi wan tá karak e̱?”

¹¹ Ne aner'e fe̱ be ba ye, “Aner a tu ku yis ye aYeso ne a nye ame̱re̱sh a tin kon nanyisi mi. A fe̱ be mi ye i ra tseng nudung aSaluwam nong ta se kusu'me. Iyong mi tseng i ta kusu ne mi se̱ kudi karo̱.”

¹² Ba tú ku rip ye, “Aner'e se ake̱ e̱?” Iyong a fe̱ be ba ye, “Mi ren baꞌ.”

Áner aFarisi shim á tá ren iren afe akpato̱o̱n'ong tá te atser

¹³ Ayong ánerawe tseng be aner aya a tá tsang a nye akpato̱o̱n ame nufe áner aFarisi.

¹⁴ Kunom kuya aYeso tá nye ame̱re̱sh a tin karak aner'e anyisi kunye kunom Asabar.

¹⁵ Ayong áner aFarisi'me tú ku rip ye, “Wan nye ane̱ i tá se̱ kudi karo̱ e̱?” Ayong a tú ku tak ba ye, “A ti kon ame̱re̱sh nanyisi mi, yong mi se kusu'me, ne mi se̱ kudi karo̱ kyo̱o̱rna.”

¹⁶ Áner aFarisi ame ákak fe̱ ye, “Aner na ne nufe Adakunom baꞌ, kamok wu won Asabar zhe̱l baꞌ.” Amma ákak fe̱ ye, “Aner rine̱n ta nye ane̱ a ta nye itomong azhing kuri iyu e̱?” Ito̱ ba te kufa.

¹⁷ Ayong á bun á rip akpato̱o̱n ame ye, “Wan be ike̱ng ikak tanin tak yir natoon aner na a? Wan ne a tá karak anyisi.” Ne aner ame fe̱ be ba'me ye, “A nye aner kuzarap.”

¹⁸ Gip be anong, áko̱k kasho̱o̱n áner aYahuda ti no̱o̱k katsak ye, aner'e kun nye akpato̱o̱n nizham a tá ra ku karak anyisi baꞌ. Kamok anong, á tom nufe átek aner'e.

¹⁹ Á tú ku rip ba ye, “Igon na nye kafe yin a? Yin fe̱ yin ye a tú ku tes akpato̱o̱n'e e̱? Anye ane̱ ne wu ta di karo̱ kyo̱o̱rna e̱?”

²⁰ Ayong átek igon ame fe̱ ye, “Yir ren yir a nye igon yir, ne yir bun i ren yir ye a tú ku tes yir akpato̱o̱n'e.

²¹ Yir ren yir iren ife wu tá se̱ ku di karo̱ kyo̱o̱rna baꞌ. Yir ren yir ka angan ne a tú ku karak anyisi baꞌ. Ku rip yin, a nye igon baꞌ. A tà fe̱ be kanu wu.”

²² Átek'e fe̱ anong kamok á fok inyim áner aYahuda'me, kamok áner aYahuda tsang á sak ye aner aya ne a fe̱ ye aYeso nye aKiristi, á tú ku tun kaye̱e̱r atu aduwa ba.

²³ Iyong ne i sak atek wu tá fe̱ ye, “A nye igon baꞌ Yin ku rip yin.”

²⁴ Á bun á yis aner a tá tsang a nye akpato̱o̱n ame ife afa gbak nong á tá fe̱ be wu ye, “Fok inyim Adakunom wan, nong ta fe̱ katsak. Amma yir, yir ren yir aner nye aner rine̱n.”

²⁵ A fe̱ be ba ye, “Mi ren ka wu nye aner rine̱n ka angan e̱ baꞌ. Ike̱ng mi ta ren wu ne a ti karak anyisi, kyo̱o̱rna mi di karo̱!”

²⁶ Ayong á tú ku rip ye, “Akye̱ ne a tá nye'me e̱? Ane̱ ne a tá karak anyisi'me e̱?”

²⁷ Aner ame fe̱ be ba ye, “Mi tsang i ka tak yin amma yin wesek yin kuto baꞌ. Akye̱ sak yin ta shim ta bun i fok yin gbak e̱? Ka yin shim yin ta te yin álimazhiri wu gip e̱?”

²⁸ Áyong a kas aner ame ne á fe̱ be wu ye, “Wan ne i nye alimazhiri wu. Yir nye yir álimazhiri aMusa.

²⁹ Yir ren yir ye Adakunom fe̱ kanu be aMusa, amma yir ren yir ka ake̱ ne aner na ne baꞌ.”

³⁰ Ayong aner ame fe̱ be ba ye, “Akye̱ kuri ike̱ng na e̱? Yin ren yin ka ake̱ ne a ne baꞌ, amma a ti karak anyisi.

³¹ Yir ren yir ye, Adakunom fok áfe rine̱n baꞌ, amma a fok áya a tú ku tiyiik ne á nye ike̱ng iya wu ta shim.

³² Akak kun fok a tan karak anyisi aner aya a tú ku tes akpato̱o̱n'e baꞌ.

³³ Ke a fa nye ye aner na ne nufe Adakunom baꞌ, ke a kyem a nye ike̱ng ikak baꞌ.”

³⁴ Ba fe̱ be wu ye, “Wan afe a tá ka tes kaye̱e̱r rine̱n, ne wan bun i di ye wan tin bo̱so̱p yir a?” Ayong á tú ku tun.

Rikpato̱o̱n kuri rife kabik

³⁵ aYeso tá fa fok ye an tun aner ame. Nizen iya a tú ku se̱, ne a fe̱ be wu ye, “Wan ti no̱o̱k katsak ni Igon Anerawe a?”

³⁶ Aner ame fe̱ ye, “Atekasa, aner'e nye angan e̱? Ni tak nong mi tin no̱o̱k katsak ni wu.”

³⁷ aYeso fe̱ be wu ye, “Wan mu ku di kyo̱o̱rna, wu ne a fe̱ be wan na.”

³⁸ Ayong aner ame fe̱ ye, “Atekasa, mi ti no̱o̱k katsak.” Ne a ya aYeso iben.

³⁹ aYeso fe̱ ye, “Mi be̱ nazatse na nong ta to̱ amok, nong aya a ta di karo̱ baꞌ tà se̱ kudi karo̱, ne áfe a ta di tà te ákpato̱o̱n.”

⁴⁰ Áner aFarisi akak aya a tá se be wu tú fok a tá fe̱ anong, yong á tu ku rip ye, “Akye̱ e̱? Yir nye yir ákpato̱o̱n'e gip e̱?”

⁴¹ Ayong aYeso fe̱ be ba ye, “Yin fa nye yin ákpato̱o̱n'e ke yin be yin rine̱n baꞌ. Amma yin ta fe̱ yin ye yin di karo̱, to̱, rine̱n yin se natoon rice yin.