aYohana 20 - Izere New Testament

Kudorok aYeso nure̱k

¹ Nadiding bop katuk ime̱se̱ng'e na asate, ne karo̱ ruresek whi, aMarya abafe aMagadaliya tseng nure̱k'e. A di a n sees be kuta ku tá se nanu kure̱k'e.

² Ayong a tú bun be itsi nong a ta be nufe aSiman Bitrus ne alimazhiri aya aYeso tá shim, nong a tá fe̱ be ba ye, “A n sok kukom aYeso Agwo̱m Ágwo̱m yir kaye̱e̱r kure̱k, yir ren yir karo̱ a tú ku sak baꞌ.”

³ Ayong aBitrus be alimazhiri'me wuruk á tá be nure̱k'e.

⁴ Cice̱r ba tsang á teng, amma alimazhiri'me teng ne a nar aBitrus, a tú ku tsang naro̱ kure̱k'e.

⁵ A be̱ a tá tiguum nanu kure̱k'e a tá ye̱re̱k ne a di kures a tin kunung kukom'e, amma a no̱ kaye̱e̱r'e baꞌ.

⁶ Ayong aSiman Bitrus aya a tá rusek nama be̱ ne a wor a no̱ kaye̱e̱r kure̱k'e, ne a di kures a tin kunung kukom'e kaben azong

⁷ ne ike̱ng iya a tin kunung rice'me nukunung ze̱e̱r ne iya a tin kunung kuro̱m'me.

⁸ Alimazhiri aya a tá be̱ naro̱ kure̱k'e ni ime̱se̱ng'e no̱ kaye̱e̱r kure̱k'e gip. A di ike̱re̱'me yong a ti no̱o̱k katsak.

⁹ (Gip be anong, ko ba ren ike̱ng iya Kufumung rife̱ Adakunom tá fe̱ ye, aYeso tá bun a dorok nure̱k dim, tá sor baꞌ.)

aYeso tonong rice wu nufe aMarya abafe aMagadaliya

¹⁰ Ayong álimazhiri'me tú ku bun kari,

¹¹ amma aMarya nyeseng nufang nanu kure̱k'e a tá tos. A ta se be kanak ne a tiguum a tá di kaye̱e̱r kure̱k'e.

¹² Ne a di ámaleka afa nusonong be ares akan naro̱ kaya kukom aYeso'me tú ku se, akak nabas rice'me ne akak nabas atak'e.

¹³ Ne ámaleka ame tú ku rip ye, “Anyiningkasa, akye̱ sak wan tos e̱?” Ne wu fe̱ be ba ye, “An sok kukom aYeso Agwo̱m Ágwo̱m mi, mi ren karo̱ kaya a tú ku sak baꞌ.”

¹⁴ A tá fe̱ anong ne a kirik ne a di aYeso nunyeseng, amma a ren ye aner nye wu baꞌ.

¹⁵ Ayong aYeso tú ku rip ye, “Anyiningkasa, akye̱ sak wan sen tos e̱? Wan tse̱r angan e̱?” Wu sor ye a nye aner a tin sak riye̱ riko̱'me, ayong ne isak a fe̱ ye, “Atekasa, ke wan ne i tú ku sok ne ni tak karo̱ kaya wan tú ku sak nong mi tá su ku sok.”

¹⁶ aYeso tú ku yis a ta fe̱ ye “aMarya!” Ayong a kirik nabas afe aYeso'me nong a tá fe̱ be wu ni irem áner aYahuda ye, “aRabbi.” (I ta sor Aner Kubo̱so̱p).

¹⁷ aYeso fe̱ be wu ye, “Sang tin yiir baꞌ, kamok mi n ngarak nufe Ada nizham baꞌ. Amma tseng nufe ároneng, tà su ku tak ba ye, ‘Mi tù ku bun nufe Ada mi ne a nye Ada yin. Adakunom mi ne a nye Adakunom yin gip.’ ”

¹⁸ Ayong aMarya abafe aMagadaliya tseng a tá se fe̱ be álimazhiri'me ye, “Mi n di Agwo̱m Ágwo̱m.” Ne a ku tak ba ike̱ng iya aYeso tú ku tak.

aYeso tonong rice wu nufe álimazhiri wu

¹⁹ Kawheshirim tá fa nye katuk ime̱se̱ng'e na asate, nizen iya álimazhiri aYeso tá se naro̱ kazining. A n whe̱se̱ng nanu kutu kamok inyim áko̱k kasho̱o̱n áner aYahuda. Ayong Yeso wuruk a tá nyeseng natite ba, ne a fe̱ be ba ye, “Kameneng riye̱ ra se mak be yin.”

²⁰ Nama a tá fe̱ anong ne a ku tonong ba ibo̱k be kukafam wu. Ayong álimazhiri wu'me nye riye̱ rikan dide̱ng á tá di Agwo̱m Ágwo̱m.

²¹ Ne aYeso bun a fe̱ be ba ye, “Kameneng riye̱ se mak be yin! Kyo̱ndi Ada'me tin tom, anong ne mi ma sen ka tom yin.”

²² A tá fa fe̱ anong ne a nife̱e̱p isong wu niba, a tá fe̱ ye, “Inga yin Kabik Kazhe̱l'e.

²³ Koangan ne yin tù ku re̱ng yin rine̱n wu, i nye ye a tù ku re̱ng'e. Koangan ne yin tu ku re̱ng yin'e baꞌ, to̱, i nye ye a mu ku re̱ng'e baꞌ.”

aYeso tonong rice wu nufe aToma

²⁴ aToma, azining kaye̱e̱r álimazhiri kuso̱k be afa'me a tú ku yis ye Kafe̱e̱s tuse mak be álimazhiri'me nizen iya aYeso tá be̱ tonong rice wu baꞌ.

²⁵ Amma álimazhiri'me tú ku tak ye ba n di Agwo̱m Ágwo̱m. Ne aToma fe̱ ye, “Ma ke mi di ínya ákpe̱k ni ibo̱k wu ne ni te kaban kubo̱k'i naro̱ akpe̱k'e ne i ne te kubo̱k'i naro̱ a tú ku tubuk, ke anong baꞌ mi tin no̱o̱k katsak baꞌ.”

²⁶ Nama inom ikara, álimazhiri wu se kaye̱e̱r kasa ame gbak, aToma se mak be ba makong. Nanukutu se nuwhe̱se̱ng, amma aYeso be̱ a tá nyeseng natite ba, a tá fe̱ ye, “Kameneng riye̱ ra se mak be yin.”

²⁷ Ne a fe̱ be aToma ye, “Te kaban kubo̱k wan aze na atas kubo̱k'i, ye̱re̱k ibo̱k'i, te kubo̱k wan aze naro̱ a tin tubuk. Ni no̱o̱k katsak, tá won agak riye̱.”

²⁸ Ayong aToma fe̱ be wu ye, “Kak, Agwo̱m Ágwo̱m mi be Adakunom mi!”

²⁹ Ne aYeso fe̱ be wu ye, “Kamok wan tin di ne wan ti no̱o̱k katsak. Aner riye̱ rikan ne a nye aner aya a tin di baꞌ, amma ne a ni no̱o̱k katsak.”

³⁰ aYeso nye ike̱re̱ azhing ikak dide̱ng nanyisi álimazhiri wu, iya sang a tá zibir kaye̱e̱r kufumung na baꞌ.

³¹ Amma a zibir ike̱re̱ na, nong ase̱ tin no̱o̱k yin katsak ye aYeso ne a nye aKiristi, Igon Adakunom. Nong ase̱ ke yin ti no̱o̱k yin katsak, yin tà se̱ yin kutser kaye̱e̱r riyerek wu.