aYohana 2 - Izere New Testament

aYeso shishing ashi na aKana niben aGalili

¹ Katuk afe ataar a nye riye̱ rikan kuwe̱ne̱ng nuwo̱p aKana niben aGalili. Anyining aYeso tuse azong

² A tak aYeso be álimazhiri wu kuwe̱ne̱ng'e gip.

³ Ashi anap tá fa gang, yong anyining aYeso fe̱ be wu ye, “Ashi anap ba n gang cei.”

⁴ Iyong aYeso fe̱ be wu ye, “Ango̱, akye̱ sak wan fe̱ be mi e̱? Izen'i n nye baꞌ.”

⁵ Iyong anyining aYeso fe̱ be ásam'me ye, “Nye yin koakye ike̱ng a tana fe̱ ye i ru nye yin.”

⁶ Nafeneng igataar nafe a tá nye be ata tuse bubarak azong, kuri naya áner aYahuda tin nye itomong ni igo̱o̱n ku naka kusu ba nong á ta te zhe̱l. Koakye kafeneng'e ta sok ágalon iso̱k ifa ka itaar ayi.

⁷ Iyong aYeso fe̱ be ásam'me ye, “Shishing yin nafeneng'e be ashi.” Iyong ba shishing nafeneng'e be ashi cip cip.

⁸ Ne a fe̱ be ba ye, “To̱, kyo̱o̱rna bo̱ yin ashi'me nong ta se no̱o̱k yin aner a tin sak riye̱ nuwe̱ne̱ng'e.” Ne ba nye anong.

⁹ Ne aner a tin sak riye̱ nuwe̱ne̱ng'e fok ashi'me tá kirik a tan te afe anap. A ren karo̱ afe a tú ku ne baꞌ, amma ásam áfe a ta be̱e̱n ashi'me ren. Iyong a yis aner a ta sok abining afas'e nukim.

¹⁰ A fe̱ be wu ye, “Koangan san ku be̱e̱n ashi anap aya a tá ta ni ime̱se̱ng'e, nong izen iya ne átsen so̱ dide̱ng, ne a be̱e̱n be aya a ta mak a ta baꞌ nama. Amma wan won aya a tá ta dide̱ng ma kyo̱o̱rna!”

¹¹ Iyu ne i nye ike̱ng azhing ife ime̱se̱ng aYeso tá nye, a nye nuwo̱p aKana niben aGalili. A tonong kuyiik wu azong, yong álimazhiri wu ti no̱o̱k katsak ni wu.

aYeso ro ánerawe kaye̱e̱r agbang kutu kuya Adakunom iben

¹² Nama anong, aYeso tseng na aKapanum be anyining ne áronyining be álimazhiri wu. Á sor azong inom cie̱k.

¹³ Izen kunye riye̱ rikan aPasova ta fa be̱ barak, yong aYeso be na aUshalima.

¹⁴ Kaye̱e̱r kubang agbang kutu kuya Adakunom iben'e, a se se̱ ákak á tá se be kure̱e̱s ínyak, be izha ne ábo̱p ne áfe kushishing itso̱m a tan sosok.

¹⁵ Iyong aYeso nye awhereng kudun nong a tin ro áfe a tá se kaye̱e̱r kubang agbang kutu kuya Adakunom iben'e cei be izha be ínyak'e. A bun a tosom atebur afe kushishing itso̱m be itso̱m'e cei.

¹⁶ Ne a fe̱ be áfe kure̱e̱s ábo̱p'e ye, “Turung yin ike̱re̱ na aze! Sang tu te yin be kasa Ada mi ta te karo̱ rizhik baꞌ.”

¹⁷ Álimazhiri wu yiring ye i se ni izibir ye, “Kushim afe mi ta shim kasa wan ti ya riye̱ dide̱ng.”

¹⁸ Ne áko̱k kasho̱o̱n áner aYahuda be̱ nufu ne á ku rip ye, “Akye̱ kuri itomong azhing ne wan ta kyem i ni tonong yir nong yir ta ren yir ye wan ta kyem i nye anong cei e̱?”

¹⁹ aYeso tú shim ba'me ye, “Yirik yin kutu kuya Adakunom iben na, mi tà bun i no̱k kaye̱e̱r inom itaar.”

²⁰ Iyong áner aYahuda'me bun á fe̱ be wu ye, “A sok aye̱ iso̱k inaas be igataar a ta ra no̱k agbang kutu kuya Adakunom iben na, ne wan ra no̱k kaye̱e̱r inom itaar a?”

²¹ Agbang kutu kuya Adakunom iben aYeso tin fe̱'me nye kuro̱m wu.

²² Nama aYeso tá dorok nure̱k, álimazhiri wu yiring be ike̱ng ife wu tin fe̱ natoon'e. Iyong ba ti no̱o̱k katsak rife̱ Adakunom ne rife̱ aYeso tá tsang a fe̱ be ba.

aYeso ren riye̱ koangan

²³ Nizen aYeso tá rusek na aUshalima, nizen aPasova, ánerawe whe̱re̱ di itomong azhing wu tá nye ne á ni no̱o̱k katsak ni wu.

²⁴ Amma aYeso ti no̱o̱k katsak ni ba baꞌ, kamok wu ren aye̱ ánerawe cei.

²⁵ Wu shim akak tu ku tak ike̱ng ikak natoon akak baꞌ, kamok wu ren ike̱ng i ta se kaye̱e̱r riye̱ anerawe.