aYohana 11 - Izere New Testament

Riku aLazarus

¹ Aner akak a tú se na aBetani, riyerek wu nye aLazarus, a nye atser baꞌ. aBetani nye kuwo̱p aMarya ne angasnyining wu aMarta.

² aMarya na nye angasnyining aLazarus aya a tá se nameneng be kuro̱k. Wu ne a ku kon Agwo̱m Ágwo̱m name, ne a re̱ng atak wu be nakuyo̱ng rice wu.

³ Ayong ángasnyining'e tom nufe aYeso ye, “Atekasa, di aner aya wan tá shim ame nye atser baꞌ.”

⁴ Nizen iya aYeso tá fok anong, a fe̱ ye, “Kuro̱k na tù ku fe̱r baꞌ, amma ku tà be̱e̱n Adakunom ne Igon wu kuyiik.”

⁵ aYeso shim aMarta be angasnyining wu aMarya ne aLazarus.

⁶ Gip be anong, izen iya a tá fok ye aLazarus nye atser baꞌ, a sor naro̱ wu tú ku se ma inom ifa nizham.

⁷ Ayong a fe̱ be álimazhiri wu ye, “I ku bun yir ni iben aYahudiya.”

⁸ Amma álimazhiri wu'me fe̱ be wu ye, “Aner kubo̱so̱p, nuko̱s kama áner aYahuda shim á tá ka barak be ata, ne wan bun i fe̱ ye i ra be yir azong a?”

⁹ aYeso fe̱ be ba ye, “Kuwoso se awa kuso̱k be afa aꞌa? Aner aya afe a ta tseng nunom turuk kutak baꞌ, kamok a di akanang kazatse.

¹⁰ Amma aner aya afe a ta tsang a tseng natuk, a tà turuk kutak, kamok akanang kuse baꞌ.”

¹¹ Nama aYeso tá fe̱ anong, a bun a fe̱ ye, “Afaram yir aLazarus an men ida, mi be azong ta se ku shiming.”

¹² Ayong álimazhiri wu fe̱ be wu ye, “Atekasa ke an men ida a tà dorok.”

¹³ aYeso sen nife̱ natoon riku aLazarus'e, amma álimazhiri wu sor ye a sen fe̱ itak ida tsek.

¹⁴ Ayong aYeso tú ku tak ba kanang ye, “aLazarus n ku.

¹⁵ Mi be riye̱ rikan kamok sang mi tin se azong baꞌ. Yin ti no̱o̱k yin katsak makong. Amma i tseng yir nufu.”

¹⁶ Ayong aToma, a tú ku yis ye, kafe̱e̱s, fe̱ be ribir álimazhiri'me ye, “I tseng yir gip nong ta se kus yir be wu.”

aYeso ne a nye kutser ne a nye kudorok ikom

¹⁷ Nizen iya aYeso tá tseng azong, a fok ye aLazarus n te kuko̱s kunaas nure̱k.

¹⁸ aBetani ta se kyo̱ndi akilomita ataar be aUshalima.

¹⁹ Ánerawe aYahuda dide̱ng be̱s nufe aMarta ne aMarya nong á tú ku nye ba ako̱o̱k be riku aronyining ba.

²⁰ Nizen iya aMarta tá fok ye aYeso saase, a wuruk nong a tá su ku shan niren, amma aMarya sor kari.

²¹ Ayong aMarta fe̱ be aYeso ye, “Atekasa, wan fa se aze ko ke aronyining'i ku baꞌ.

²² Amma mi ren ye ko kyo̱o̱rna'me Adakunom tà ka no̱o̱k koakye wan tù ku rip.”

²³ aYeso fe̱ be wu ye, “Aronyining wan tà bun a dorok.”

²⁴ aMarta fe̱ be wu ye, “Mi ren a tà bun a dorok nizen iya kudorok ikom katuk igang'e.”

²⁵ Ayong aYeso fe̱ be wu ye, “Mi ne i nye kudorok ikom ne i nye kutser. Aya a tin no̱o̱k katsak ni mi ko ke a ku gip a tà se̱ kutser,

²⁶ ne koangan afe a ta se be kutser gip ke a ti no̱o̱k katsak ni mi a tà ku baꞌ ma izen izen. Wan ti no̱o̱k katsak rife̱ na a?”

²⁷ Ayong aMarta fe̱ be aYeso ye, “Ei, wan nye Agwo̱m Ágwo̱m, mi ti no̱o̱k katsak ye wan ne i nye aKiristi'me, Igon Adakunom, aya a tá fe̱ ye a tà be̱ nazatse.”

aYeso tos

²⁸ Nama a tá fe̱ anong, a tseng a tá se yis angasnyining wu aMarya nukim, a tá fe̱ be wu ye, “Aner kubo̱so̱p na aze, a rip itak wan.”

²⁹ Nizen iya aMarya tá fok anong, a dorok zirik, a tá be nufe aYeso.

³⁰ aYeso tsang a no̱ kaye̱e̱r kuwo̱p'e nizham baꞌ, amma a ruresek naro̱ aMarta tú ku shan ni iren ame.

³¹ Áner aYahuda aya a tá tsang á be̱ ni inye aMarya ako̱o̱k kari di a tá dorok nong a ta wuruk zizirik. Á tú kuus ba sor ye a be ni inye riyo̱m nure̱k'e̱.

³² Nizen iya aMarya tá tseng naro̱ aYeso tú ku se, a di aYeso'me, ayong a kpa natak wu nong a tá fe̱ be wu ye, “Agwo̱m Ágwo̱m, wan fa se aze, ke aronyining'i ku baꞌ.”

³³ aYeso tú ku di a tá tos ne áner aYahuda'me áfe a tá se mak be wu tos gip, yong aYeso daam kaye̱e̱r riye̱ wu dide̱ng.

³⁴ Ayong aYeso tú ku rip ba ye, “Yin tú ku ne̱r yin ake̱ e̱?” Ne ba fe̱ be wu ye, “Agwo̱m Ágwo̱m be̱ ta di karo̱'me.”

³⁵ aYeso tos.

³⁶ Kamok anong áner aYahuda ame fe̱ ye, “Di yin, a tú ku shim!”

³⁷ Amma ákak ba fe̱ ye, “A karak akpato̱o̱n anyisi, ne a ra won dar a te̱ne̱ng aner na riku a?”

aYeso dorok aLazarus nure̱k

³⁸ aYeso tá bun a no̱ nudaam kaye̱e̱r riye̱ wu dide̱ng, a be nure̱k'e. Kure̱k'e nye kutas a ta whe̱e̱n kanu be agbang kuta.

³⁹ Ayong aYeso fe̱ be ba ye, “Sok yin kuta'ong.” Amma aMarta angasnyining aku'me fe̱ ye, “Agwo̱m Ágwo̱m, a tan n kpaan iko̱o̱n kyo̱o̱rna, kamok an te kuko̱s kunaas be riku.”

⁴⁰ Ayong aYeso fe̱ be wu ye, “Mi di ye, mi tsang i ka tak ye, ke wan ti no̱o̱k katsak, wan tà di kuyiik Adakunom a?”

⁴¹ Ayong á tomong kuta ame. aYeso sok anyisi naza ne a fe̱ ye, “Ada, mi be riye̱ rikan be wan kamok mi ren wan ti fok.

⁴² Mi ren ko gbugbang gip wan ti fok, amma mi fe̱ anong, nong ánerawe na aze, tin no̱o̱k katsak ye wan ne i ti tom.”

⁴³ Nama a tá fe̱ anong, ne a ta kuto̱ ba agap ye, “aLazarus, wuruk!”

⁴⁴ Aner a tá tsang a ku'me wuruk nufang, ibo̱k be atak nurosom be idun, kanyisi be itan kures kukan. aYeso fe̱ be ba ye, “Ku bisik yin, a ta tseng.”

Kanye̱k kufe̱r aYeso

⁴⁵ Kamok anong, áner aYahuda whe̱re̱ aya a tá tsang a be̱ nufe aMarya, di ike̱ng iya aYeso tá nye á ti no̱o̱k katsak na aYeso.

⁴⁶ Amma ákak ba be nufe áner aFarisi nong á tú su ku tak ba ike̱ng aYeso tá nye.

⁴⁷ Kamok anong ágbang átsi ne áner aFarisi'me yis kanyim áko̱k kasho̱o̱n. Ne á fe̱ ye, “Akye̱ ne yir ta nye yir e̱? Aner na ta nye itomong azhing dide̱ng an e̱?

⁴⁸ Ke yir tu ku won yir a ta ya kasho̱o̱n ana, koangan tin no̱o̱k katsak ni wu, ne áner aRom be̱ a tin shan kaben yir ne karo̱ kuya iben yir.”

⁴⁹ Akak kaye̱e̱r ba, riyerek wu tá nye aKayafas, aya a tá nye agbang atsi riye̱ riyong fe̱ ye, “Yin ren yin ike̱ng ikak baꞌ.

⁵⁰ I nar aner azining tana ku be ánerawe cice̱r tana wei.”

⁵¹ Rife̱ aKayafas tá fe̱ nye rife̱ riye̱ wu tsek baꞌ, amma wu ne a ta nye agbang atsi riye̱ riyong, a nye kuzarap ye aYeso tà ku kamok áner aYahuda.

⁵² Sang kamok áner aYahuda tsek baꞌ, amma nong a tà tusung áner Adakunom aya a tá te shaam tà te azining.

⁵³ Kum be katuk'ong á nye kanye̱k kufe̱r aYeso.

⁵⁴ Kamok anong, aYeso ba tseng de̱s kaye̱e̱r ánerawe aYahuda baꞌ. A tú ku bun nuwo̱p kukak a tá yis ye, aEfirem bubarak be katse, naro̱ wu tú ku sor be álimazhiri wu.

⁵⁵ Izen kunye riye̱ rikan kuyiring be aPasova tá nye, ánerawe whe̱re̱ tseng na aUshalima nong a ta se na ka kusu nong a ta te zhe̱l, kyo̱ndi a tan me̱ ne á nye.

⁵⁶ Á yiir iye̱re̱k'e ka a tá di aYeso e̱. Nizen iya ba tá nyim naro̱ kuya Adakunom iben'e, á naka risim ye, “Yin di yin ane̱ e̱? A ta be̱ riye̱ rikan'e gak?”

⁵⁷ Amma ágbang átsi ne áner aFarisi tsang á fe̱ ye, ke akak fok karo̱ aYeso'me tú ku se, ne a ku tak ba nong á tù ku yiir.