aYakub 5 - Izere New Testament

A no̱o̱k árum itabak.

¹ Kyo̱o̱rna wesek yin kuto, yin arum, tos ni tang yin ikun kamok amaan risam a tana ka se̱ yin.

² Kurum yin nru, ne ajiji n ya ares yin.

³ Atso̱m yin a ta yis ye azinariya be azurfa nbeseng. Kubeseng ba ta fe̱ rife̱ natoon yin, ne a ya rinam kuro̱m yin kyo̱ndi kurong. Yin tusung yin kurum kaye̱e̱r inom igang'e.

⁴ Di yin, itso̱m yin ta gaar kukarang yin áfe a ta ka nye yin itomong nako̱ yin ta sen tos natoon yin. Nanak áfe itomong ishamang'e n tseng nato Ada Adakunom.

⁵ yin n sor yin kaye̱e̱r kusas nazatse ne nye yin ikeng aye̱ yin ta shim. Yin sak yin rice yin i ta no̱o̱s yin kamok kunom kutse̱k anerawe.

⁶ yin n to̱ yin aner a ta se dar rine̱n amok, ne ku fe̱r yin aya a ta ka ra yin.

Ku naka tsesek be risam

⁷ Ároneng, kamok anong na ka tsesek yin ma nizen kunom tana be̱. Yin di yin aner ikap ta tor riko̱ ta te naya natek be a ta na ka tsesek kum be iza kushik ma ishamang.

⁸ yin gip, na ka tsesek yin ne nyeseng yin be agap, kamok kube̱ Kunom mbe̱ bubarak.

⁹ Ároneng, tu fe̱ yin iriri rife̱ nace yin baꞌ, ke anong baꞌ, a ta ka to̱ yin amok. Aner ku to̱ amok'e mbe̱ bubarak.

¹⁰ Ároneng, di yin Ku naka tsesek nizen risam, di yin áner kuzarap aya a ta fe̱ rife̱ riyerek Kunom.

¹¹ Kyo̱ndi yin ta ren yin, yir sok yir áfe a ta na ka tsesek áfe awe̱ng. Yin n fok yin itak yin itak Ku naka tsesek Ayuba ne di yin ikeng iya Adakunom tu ku nye'me ni gang'e. Ada Adakunom be kuro̱ riye̱ ne kuse kutek dide̱ng.

¹² Aroneng'i nama anong, tu shu yin baꞌ, be kaza ka kazatse ka be ikeng ikak ze̱e̱r baꞌ, won a “Ei” yin tu sor a “ei,” ne a “Wayo” yin tu sor a “wayo,” ke a ta ka to̱ yin amok.

Aduwa kuno̱o̱k katsak

¹³ Akak yin se nudaam a? A ra nye aduwa. Riye̱ akak n kare̱p a? Won a tu bom abom ku tiyiik Adakunom.

¹⁴ Akak yin kuse a ta nye atser baꞌ, kaye̱e̱r yin a? A ra yis asho̱n ikilisiya nong a tu ku nye aduwa ne á ni kon name niwu kaye̱e̱r riyerek Agwo̱m Ágwo̱m yir aYeso.

¹⁵ Aduwa a ta nye kaye̱e̱r kuno̱o̱k katsak sak aner kuro̱k'e ta te atser. Agwo̱m Ágwo̱m tu ku dorok. Ke a tsang a nye rine̱n, a tu ku re̱ng'e.

¹⁶ Kamok anong naka taas yin rine̱n yin, ne i naka nye yin aduwa nong a se ta te yin atser. Aduwa aner ajel'e be agap dide̱ng ne nye itomong.

¹⁷ Iliya a nye anerawe kyo̱ndi yir ana tsek, a nye aduwa be katsak ye sang iza tu kpa baꞌ, ne iza kpa niben'e baꞌ, ife aye̱ ataar be ribir.

¹⁸ A bun a nye aduwa, ne Adakunom sak iza kpa, ne kaben te naya.

¹⁹ Ároneng'i, ke akak yin won katsak'e, ne akak yin kubun be wu.

²⁰ Yiring yin iyu, koangan ne a tu bun be aner rine̱n na amaan kunye wu, a tu ku shesh riku ne a kis rine̱n ri ta se gaan.