aRom 9 - Izere New Testament

Adakunom kasa Isarela

¹ Katsak'e, ne mi fe̱ kamok aKiristi, sang mi bo̱ abo̱o̱s baꞌ, kaye̱e̱r kuto̱ro̱ng'i ne ike̱ng iya Kabik Kazhe̱l'e tin tonong, mi no̱o̱k katsak ye i nye katsak.

² Kaye̱e̱r riye̱ mi be kudaam be riye̱ riwe dide̱ng ye̱r ye̱r ma riye̱ mi tse̱k.

³ Ye a fa fe̱ ye mi be rice mi ne a ti fiming a bun a tin kam be aKiristi nong ároneng afe izere mi ta se̱ kashesh, to̱ tsek,

⁴ áner Isarela. Ba ne Adakunom tú ku sak ba á tá te inoon wu, a tú tonong ba kuyiik wu, a tú ku nye ba kushu be Itsi iya a ta ka no̱o̱k ba, ne a ka tonong ba iren ku kuya iben ife katsak. A bun a tú ku no̱o̱k ba kuto̱.

⁵ Kunik ba ne kaye̱e̱r átukop átukop áya a tá ren dide̱ng. aKiristi, kaye̱e̱r kuto̱ro̱ng rinerawe wuruk kaye̱e̱r kuri ba. Won Adakunom aya a ti nye rigwo̱m natoon koakye tu se̱ nakerek ma izen izen. Anong!

⁶ Sang i se ye rife̱ Adakunom n kpa baꞌ. Sang koangan aner Isarela ne a nye aner aya Adakunom ta kasa baꞌ.

⁷ Sang koangan a ta nye kuri Ibrahim ne a nye aya Adakunom ta kasa baꞌ. Adakunom ban a fe̱ be Ibrahim ye, “Be Ishaku ne wan ta se̱ inoon na mi ta fe̱ be wan.”

⁸ Iyong ne i sak inoon a ta se̱ nuro̱m ne na nye inoon Adakunom baꞌ, amma naya á tin no̱o̱k kuto̱ natoon'e ne á nye inoon nafe katsak.

⁹ Kamok kuno̱o̱k kuto̱ Adakunom tá nye be Ibrahim se ye, “Ke izen'e nye mi ta bun i be̱ ne aSaratu tes igon kamitek'e.”

¹⁰ Sang anong tsek baꞌ, inoon aRifkatu se atek azining, wu ne a nye Ishaku a ta nye atukop yir.

^11-12 Kum ne an tsang a tes Isuwa be aYakub baꞌ ka kum ne ba tsang an nye ike̱ng ikak itek ka imaan'e baꞌ, Adakunom fe̱ be aRifkatu ye, “Igon kako'me tà nye kawusong'e itomong.” Adakunom fe̱ anong nong a ta tonong ye aner a tana kasa a tu ku kasa kamok kushim Adakunom sang kamok itomong aner'e.

¹³ Kyo̱ndi i ta se ni izibir rife̱ Adakunom ye, “Mi shim aYakub amma mi gaar Isuwa.”

¹⁴ Iyong yir ta fe̱ yir ane̱ e̱? Adakunom nye gye̱r baꞌ a? Wayo, cie̱k!

¹⁵ Kamok Adakunom fe̱ be aMusa ye, “Mi tà tonong ritek'e natoon aner aya mi ta shim tu ku tonong ritek ne mi ro̱ riye̱ aner aya mi ta shim ta ro̱ riye̱ wu.”

¹⁶ To̱, sang i se ye, ike̱ng anerawe ta shim ka kuren kunye wu baꞌ, amma ritek Adakunom tsek.

¹⁷ Kamok rife̱ Adakunom fe̱ be aFiruna ye, “Mi tà sak wan ta te agwo̱m nong ase̱ mi tin tonong kukyem'i natoon wan, ne kazatse cei ren riyerek'i.”

¹⁸ Kamok anong ne Adakunom ro̱ riye̱ aner aya a ta shim a ta ro̱ riye̱ wu, ne a sak aner aya wu ta shim a ta shonong, nong a ta shonong.

¹⁹ Kashim ne akak yin fe̱ be mi ye, “To̱, akye̱ sak Adakunom bun a di rine̱n yir e̱? Angan tà kyem a gaar ike̱ng wu tá shim e̱?”

²⁰ Amma wan anerawe, wan nye akye̱ wan tana ya kanu be Adakunom e̱? “Ike̱ng ikak a tá nye ta kyem i fe̱ be aner aya a tú ku nye'me ye, ‘Akye̱ sak wan tin nye ana a?’ ”

²¹ Aser, sang ano̱k nadonong ta kyem a bo̱ rirem naro̱ kazining nong a tin nye kadonong kakak yiik ne a nye kakak fe̱re̱ aꞌa?

²² Anong ne itomong Adakunom se. Ke a shim ne a tonong riye̱ kubeseng wu, ne a bun a tonong kukyem wu kanang. Amma kaye̱e̱r acaang riye̱ wu, a tsesek dide̱ng be aya i ta se gye̱r ke di kubeseng riye̱ wu aya Adakunom tan gang kanye̱k ku ka shosh ba.

²³ A nye anong nong a tà tonong agbang kuyiik wu natoon áya wu ta ro̱ riye̱ ba, aya wu tá tsang a sak kum ni ime̱se̱ng'e nong a ta se̱ kuyiik wu.

²⁴ Yir gip, áya wu tá yis sang kaye̱e̱r áner aYahuda tsek baꞌ, amma be áya sang á ta nye áner aYahuda baꞌ gip.

²⁵ Kyo̱ndi á ta fe̱ kaye̱e̱r kufumung aHosiya ye, “Mi tà yis áner aya a ta tsang á ta nye anaan baꞌ ye, ‘Aner'i,’ ne mi ku yis ba ye, ‘Áner riye̱ mi,’ ko á ta tsang a nye áner riye̱ mi baꞌ.”

²⁶ “Dim naro̱ a ta fe̱ ye, ‘Yin nye yin ánerawe mi baꞌ,’ Naro̱ kayong ne a ta fe̱ be ba ye, ‘Inoon Adakunom afe kutser.’ ”

²⁷ Ishaya fe̱ natoon áner Isarela ye, “Kuwhe̱r áner Isarela se kyo̱ndi rize̱k kanu isho̱ng gye̱rtatan, ribir áya a tu ku tuk cie̱k kaye̱e̱r ba ne a tà se̱ kashesh tsek.

²⁸ Kamok sang i ta sok izen baꞌ, Agwo̱m Ágwo̱m tà to̱ kazatse amok cei nigang'e.”

²⁹ Kyo̱ndi Ishaya tá tsang a nye kuzarap ye, “A fa fe̱ ye Agwo̱m Ágwo̱m aya a ta be kukyem ti won yir ákak cie̱k kaye̱e̱r kuri'me baꞌ, ke yir te yir kyo̱ndi aSodom ne aGomora.”

Kudun kuno̱o̱k katsak áner Isarela

³⁰ To̱, iyong ta fe̱ yir ane̱ e̱? Aner aya sang a ta nye áner aYahuda baꞌ, a ti daam be kutse̱r kute gye̱r nasho̱o̱n Adakunom baꞌ, amma a se̱. Kuse̱ kute gye̱r ba nasho̱o̱n Adakunom ba se̱ se kamok kuno̱o̱k katsak ba.

³¹ Amma áner Isarela áya a tin te iso̱r nong a ta se̱ kute gye̱r nasho̱o̱n Adakunom kamok á kuus Itsi, á se̱ baꞌ.

³² Akye̱ sak anong e̱? Kamok sang ba tá tse̱r niren kuno̱o̱k katsak baꞌ amma be kukuus Itsi ne kunye kutek, yong a ti tu atak natoon “kuta kutu atak.”

³³ Kyo̱ndi i ta se ni izibir rife̱ Adakunom ye, “Di yin mi n sak kuta kukak na aSihiyona ku tana sak ánerawe tanin tu atak, ne ku sak ánerawe tà kpas, amma aner aya ne a ti no̱o̱k katsak ni wu a tà fok isum baꞌ.”